عندما بكى عشماوى

فى لقاء تلفزيوني مع عشماوى أشهر منفذ إعدام.. سالته المذيعة 

هل فى مرة شعرت أن المتهم مظلوم وانت بتنفذ حكم الإعدام؟

عشماوى حكى انه بكا بعد تنفيذ حكم الإعدام فى شاب من أسيوط بسبب الظلم الذى تعرض له هذا الشاب..

والحكاية عسكرى من أسيوط شغال في الشرطة اتنقل إلى الإسكندرية للعمل بها.. خد بنته وسافر الإسكندرية.. زوجته ماتت ومعاه طفلة صغيرة لا تتعدى السادسة من عمرها.. قعد في شقة بالايجار وفضل يدور على قطعة أرض يبنيها بيت.. نفسه يجيب امه من البلد تقعد معاه ومع بنته 

المهم لقا قطعة أرض معمولة مقلب قمامة موجوده بين عمارتين عند شركة النحاس المصرية قال اشتريها وابنى عليها بيت.. الناس حذرته قالوا له أصحاب العمارات مش هيسبوك فى حالك الناس دى تقيلة وشغاله فى اى شئ ممنوع..

قال وانا شغال في الشرطة والحكومة تحمينى.. راح سأل عن صاحب الأرض واشتراها منه والراجل ما صدق حد يشتريها لانه مش عارف يبيعها او يستفيد منها لان الجميع خايفين من أصحاب العمارات..

العسكرى جاب لودر وشال القمامة وابتدا يبنى اوضة على الارض لغاية ما ربنا يكرمه ويقدر يبنى بيت.. أصحاب العمارات متركهوش فى حاله.. كل يوم مشاكل ومضايقات وفى يوم كان رايح شغله ومعاه حرز عبارة عن طبنجة راح يسلمها القسم.. الناس جيرانه قالوا له الحق بنتك الصغيرة جرى لقا جيرانه أصحاب العمارات بيضربوا فى بنته بقسوة ورموها فى مصرف مياه الصرف.. جرى العسكري وطلع بنته ووداها على الحجرة وقفل عليها الباب.. جت واحدة من جيرانه وفضلت تشتم فيه وتسب فيه انه لازم يمشى والا هيقتلوا بنته ومسكته من رقبته وكادت ان تخنقه.. العسكري كان ضعيف البنية وفضل يكح مش قادر ياخد نفسه.. طلع الطبنجة من جيبه وعاوز يضرب رصاصة فى الهواء عشان تتركه وهو بيضرب الرصاصه الست دفعته والرصاصه جت فيها ولقت مصرعها فى الحال.. العسكرى راح سلم نفسه لقسم الشرطة وسلم الطبنجة وقال مشاجرة... اهل الست خدوا الجثة على البيت ووضعوها على السرير وجابوا شهود ومحامين انه اقتحم المسكن وقتلها..يعنى قتل مع سبق الإصرار والترصد  واتحولت القضية للمحكمة واتحكم عليه بالإعدام.. العسكرى فضل يقول انا مظلوم وكان نفسه يشوف امه قبل الإعدام.. قالوا الام جايه من أسيوط وفضل منتظرها وبعد كده قالوا له تعالى عشان تنفيذ حكم الإعدام.. فضل يبكى بهسترية عاوز يشوف امه قبل موته..وفضل يوصيهم على بنته لأنها أصبحت يتيمة الام والاب 

لدرجة ان المامور طلب من عشماوى يسرع بالتنفيذ لان كل الموجودين مش قادرين يتحملوا المشهد.. تم تنفيذ الحكم وعشماوى بيقول نزل عند الجثة وفضل يبكى ودى الحالة الوحيده اللى بكى فيها عشماوى فى خلال تنفيذ أكثر من 1100 حالة إعدام