كسل ولا اكتئاب 😢😡🤔
ليه مريض الاكتئاب بيبقى مش قادر يتحرك رغم إنه عايز؟ وليه أبسط حاجة بتبقى تقيلة كأنها جبل؟
تعالوا نتفق فالبداية إن ده مش كسل ولا دلع ولا ضعف إرادة دا واقع بيعيشه المريض بالفعل
🌀أول حاجة بتحصل لمريض الاكتئاب هي فقدان الوقود مش فقدان الرغبة (دي حاجة ودي حاجة تانية خالص)
في الاكتئاب (Major Depressive Disorder) المشكلة الأساسية مش إن الشخص مش عايز يعيش لكن إن جهاز المكافأة في المخ مش شغال بكفاءته. الدوبامين قليل والإحساس بالتحفيز ضعيف فالمخ مش بيدي الإشارة الطبيعية اللي بتقول يلا نتحرك. هو عايز يتحرك لكن مافيش طاقة تشغيل زي عربية فيها بنزين ضعيف جدا يعنى مفيش حافز.
🌀تاني حاجة بيحس إن كل حاجة بقت بلا معنى بلا حياة
في الحالة الطبيعية إحنا بنتحرك لأن فيه معنى متوقع زي إني هفرح – هنجح – هرتاح – هتحسن لكن في الاكتئاب الجزء المسؤول عن الإحساس بالمكافأة المستقبلية بيبقى باهت فالمخ يسأل هتقوم ليه؟ وإيه الفايدة ود مش تشاؤم لكن انطفاء عصبي في مراكز الأمل
🌀تالت حاجة الجسد بيدخل في وضع الحفاظ على الطاقة زى الموبيل اللى قرب يفصل بالضبط
الاكتئاب بيخلي الجسم يدخل وضع شبيه بالسبات. بطء حركة ، بطء تفكير ، إحساس بثقل في الأطراف ، نوم زيادة أو أرق شديد
الجسم هنا بيتصرف كأنه بيحمي نفسه من استنزاف إضافي عشان كده أبسط مهمة (الاستحمام – الرد على رسالة – لبس هدوم) بتتحس كأنها مجهود ضخم وبلا فائدة ولا معنى
🌀رابع حاجة المريض بيدخل في مرحلة جلد الذات
المشكلة بتتعقد لما يبدأ الصوت الداخلي يقول إنت كسول ، إنت فاشل ، الناس بتعمل أكتر منك وده بيخلق طبقة تانية من الألم فوق الألم الأصلي. يعني مش بس مكتئب كمان حاسس بالذنب لأنه مكتئب وده بيقفل الدائرة ويخلى المشكلة تتفاقم اكتر.
طب ليه المريض بيقول أنا عايز أتحسن ومابيعملش حاجة؟
لأن فيه جزئين: جزء واعي عايز يتحرك وجزء عصبي منهك مش قادر يشغل الجسم. الصراع ده بيخليه حاسس إنه خائن لنفسه لكن الحقيقة إنه محبوس جوه جهاز عصبي بطيء
طب نساعد إزاي؟
💥أول حاجة مش بنقوله شد حيلك لكن بنشتغل على تقليل حجم المهمة
يعني بدل مانقوله نضف البيت نقوله لم حاجة واحدة من على الأرض لأن المخ المكتئب بيستجيب للخطوات الصغيرة جدًا
💥تاني حاجة الحركة قبل المزاج
يعني ما نستناش نحس بالطاقة عشان نتحرك. الحركة البسيطة نفسها هي اللي بتولد شرارة صغيرة لكن نستبعد النشاط المفاجئ.
💥تالت حاجة منع جلد الذات
يعني نفصل بين أنا مكتئب وأنا فاشل لأن المرض مش هواية ولا الفشل مزاج.
💥رابع حاجة العلاج المتخصص
سواء علاج معرفي سلوكي أو دوائي عند الحاجة لأن أحيانًا الموضوع مش إرادة لكن كيمياء عصبية محتاجة تعديل وعلاج شافى كافى.
الخلاصة :
ضرورى جدا نفرق بين الاكتئاب والكسل بين المرض والدلع ونستوعب جدا أن اعراض الاكتئاب رغما عن المرض ومش بمزاجه.
