"بعد اتهامه لها بالزنا".. ميار الببلاوي لـ الشيخ محمد أبو بكر: «كسرتني أنا وابني وعمي مات بسبب قهرته عليا»
أكدت الإعلامية والفنانة المعتزلة ميار الببلاوي، بأنها تعيش حالياً فترة صعبة جداً، بسبب أزمتها مع الشيخ محمد أبو بكر الذي اتهامها بالزنا، وقيامها برفع دعوى قضائية ضده أمام الجهات المختصة.
وقالت الإعلامية، خلال تصريحاتها مع “القاهرة 24”، موجهة كلامها للشيخ محمد أبو بكر:ـ “ بجد كسرتني أنا وابني، واتهمتني بتهمة باطلة ووقفت شغلي وأكل عيشي وحالي كله، ومش بس كده ده انت لسه سايب الفيديو علشان المشاهدات، ومستمر في التشهير بيا من وراء الفيديو اللي ما زال على صفحتك لحد النهاردة”.
.وواصلت الببلاوي:ـ “ وكمان رايح تحج وانت ظالمني، وقلت في النيابة أني اساءت ليك ولهيبتك وشغلك كونك داعية اسلامي، طيب والكلام اللي انت قلته عليا صحيح عندك شهود عليه”.
وأضافت ميار الببلاوي:ـ “ وعلى العموم أنا دعيت في عرفة وقلت اللهم أهلك الظالمين بالظالمين اللهم وأخرجنا من بين أيديهم سالمين، أيا كان الشخص اللي هيظلمني أو يأذيني حتى لو في الحج”.
وأكملت:ـ “ صورتي بقت مشوهه أنا وابني، وأنا مش عاوزة اركب التريند زي ما قال كتير من الناس، وده لأن ست لازم اعمل كنترول على كلامي لأني بفتكر الناس كلها طيبة وهتفهمني لكن توصل انك تخلي الناس تتكلم عليا في شغلي، وأنا مفيش بيني وبينك تار، ومش بس كده ده المحامي بيقول إني قلت انه بيسيء للدعاة لكن بالعكس هو اللي قال عليا أني بسيء للدعاة، ولكنه هو مش لاقي كلام يقوله فبيجيب من كلامي وده في القانون اسمه تضليل، والحمد لله النيابة مش سايبة حاجة ومفرغة كل حرف إتقال”.
وأنهت الإعلامية ميار حديثها:ـ “أنا أتبهدلت وحالي اتوقف وربنا يستر على ابني في اختبار الخارجية القادم ويعدي على خير، وكنت متعودة كل سنة إني أسافر في العيد البلد لأهلي، ولكن السنة دي ما روحتش عيدت معاهم من شدة كسوفي منهم بسبب اللي إتقال عني، ومفيش حد قال لي كل سنة وانتي طيبة، ومش بس كده ده عمي مات من قهرته عليا، وحقيقي اتكسرت أنا وابني وربنا يسترها في اللي جاي من حياتي”.
