الذهب بـ 8000 جنيه والآتي أعظم.. هل يضحي ترامب بالدولار عشان ينقذ عرشه؟
الذهب بـ 8000 جنيه والآتي أعظم.. هل يضحي ترامب بالدولار عشان ينقذ عرشه؟
لو فاكر إن اللي بيحصل في سوق الدهب اليومين دول مجرد "موجة وغالية"، تبقى لسه مش فاهم اللعبة الكبيرة اللي بتدار من البيت الأبيض! إحنا النهاردة بنشوف الجرام بيكسر حاجز الـ 8 آلاف جنيه، والأونصة عالمياً بتناطح الـ 5300 دولار.. وكل ده مش صدفة، ده مخطط مرسوم بالمسطرة، والهدف هو "جنازة" الدولار اللي إحنا بنحضرها لايف!
⚠️ الزلزال بدأ من عند “باول”
القصة بدأت لما رئيس الفيدرالي الأمريكي "جيروم باول" طلع في فيديو تاريخي وقال نصاً: "أنا بتهدد بتهم جنائية عشان مش عايز أمشي ورا تفضيلات الرئيس". الجملة دي كانت إعلان رسمي إن "العقل" اللي بيحرك الدولار في خناقة شوارع مع "الرئيس" اللي عايز يمشيه على مزاجه. النتيجة؟ مؤشر الدولار انهار لأقل مستوى من 4 سنين، وخسر في سنة 2025 لوحدها حوالي 10% من قيمته.. ودي أسوأ كارثة من أيام "صدمة نيكسون" في السبعينات!
🧐 ليه ترامب عايز يوقع عملته؟
مبدئياً، ترامب مش غبي، هو مؤمن بـ "الميركنتيلية الاقتصادية". يعني من الآخر: الدولار القوي ده "منظرة" على الفاضي وبتاخد من جيبه، لأنه بيخلي الصادرات الأمريكية غالية ومحدش بيشتريها. ترامب عايز دولار "ضعيف وجريح" عشان بضاعته تغرق العالم، ويقدر يرجع المصانع تشتغل تاني ويحقق حلمه "أمريكا أولاً".
بس الحقيقة اللي بتترعش منها إدارته هي "الدين القوي". أمريكا مديونة بـ 38.5 تريليون دولار، والفوايد بس بتاكل تريليون دولار سنوياً! الحل الوحيد عشان يسددوا الديون دي من غير ما يفلسوا هو إنهم "يوقعوا قيمة الدولار"؛ يعني يسددوا الديون بورق ملوش قيمة شرائية.. حيلة اقتصادية خبيثة بياكل نارها الناس الغلابة في كل حتة في العالم.
🏦 الهروب الكبير للذهب (ومصر مش بعيدة)
العالم شم الخبر، والبنوك المركزية بدأت تهرب من "فخ الدولار" لحضن "الذهب". في 2025 بس، الشراء العالمي للدهب زاد 3 أضعاف المعدل الطبيعي.
مصر كمان كانت صاحية للعبة؛ واحتياطي الدهب عندنا وصل لحوالي 129 طن، وقيمته دلوقتي بتعدي الـ 20 مليار دولار بفضل القفزات دي.. وده اللي مخلي الدهب في الصاغة مش عايز ينزل، لأن البنوك المركزية هي اللي بتسحب المعروض عشان تحمي نفسها من جنون ترامب.
📉 هل في أمل الدولار يرجع؟
نظرياً، مفيش حل غير "حل فولكر" (رفع الفايدة لـ 20%)، بس ده لو حصل النهاردة أمريكا هتحصل لها "سكتة قلبية"؛ عقارات هتقع، وبطالة هتنفجر، وترامب مش هيسمح بده أبداً. عشان كده، هو بيضغط بكل قوته عشان "يخفض" الفايدة مش يرفعها، وده معناه إن الدولار لسه قدامه رحلة هبوط، والدهب لسه قدامه قمم جديدة ممكن تكسر الـ 6000 و 7000 دولار للأونصة قبل نهاية السنة!
الخلاصة يا صديقي: إحنا مش قدام "أزمة عابرة"، إحنا قدام "تغيير جلد" للنظام العالمي. الدهب هو الملاذ الوحيد اللي مبيعرفش "سياسة" ولا بيخضع لـ "تهديدات". اللي معاه دهب يحافظ عليه، واللي مستني ينزل للأرض.. يمكن يستنى كتير!
لو عجبك التحليل وعايز تفهم إيه اللي هيحصل في ملف (إيران والعراق) وتأثيره على جيبك بكره، متنساش تعمل
متابعه وتستنى المقال الجاي
