معلوات عن الحيتان الموجودة على الارض
كلّو يوسّسسع.. الكبير جَه يا رجالة
الكبير أوي (( الحوت 🐳 ))
١- الحوت الأزرق Blue whale أكبر حيوان عاش على وجه البسيطة منذ الأزل بطوله الي بوصّل ل 30 متر! ووزنه الي بيوصل لأكتر من 180,000 كيلو 🤯 يعني مشان نتخيل الرقم إذا جبنا لعبة "أبّينو جعّيصو" وحطينا 30 فيل -من يلي الو خرطوم مو رفيقك وقت يسمن- بجهة وزتّينا حوت أزرق عالجهة التانية بطيروا ال30 فيل!
أو إذا ما بدكم تعملوا هي التجربة الخطيرة، فحجمو قريب من حجم طائرة Boeing 737 يلي بتسع 189 راكب بالإضافة لمضيفات الطيران😍 احم.. قصدي 🤯
٢- طبعًا الحيتان ثدييات؛ فبتتنفّس عن طريق الرئة لكن بشكل إرادي مو متلنا لا إرادي، وأكفأ جهاز تنفّسي فيهم عند حيتان العنبر Sperm whale الي بيسمحلا تضل ساعة ونص تحت المي، ويحمل أحد حيتان كوڤييه ذو المنقار Cuvier's beaked whale الرقم القياسي لأطول فترة تحت الماء بين الثدييات (138 دقيقة)، وعندو رقم تاني قياسي ببرّر الأولاني وهو أعمق عمق تعمّقه متعمّق بالأعماق من الثدييات والي بيبلغ 3 كيلومتر تقريبًا! ولسبب واحد بس؛ بيعنّ على بالو ياكل حبّار 🦑 (من اسمو هالحوت مبيّن شغل نق وتأنيف وآنشانتييه 💅).
٣- سبب هي القدرة الكبيرة على حبس النفس هو وجود نسب عالية من الهيموغلوبين والمايوغلوبين المسؤولين عن تخزين الأوكسجين بالدم والعضلات، وكمان بتقدر الحيتان تقلّل معدل ضربات قلبها وتوقّف بعض وظائف أعضائها بشكل مؤقت مشان تستهلك الأوكسجين بشكل أبطأ.
٤- البحر بالنسبة للحوت متل المسبح بالنسبة لبعض جماعة؛ حيث يقوم الحوت الزعنفي Fin whale الواحد بتفريغ أكثر من 1000 لتر من البول في مياه البحر يوميًا؛ اضربو هاد الرقم بعدد الحيتان بيطلع معكم انّو بول الحيتان هو جزء لا يتجزأ من مياه البحر التي تسبح/ين فيها في إجازاتكم السعيدة 😬
٥- مادة العنبر Ambergris باهظة الثمن (الغرام ب35$ يعني أغلى من نص غرام دهب) ذات الرائحة "المسكية" -والي بتستخدم في صناعة العطور، وبيستخرجوا منها كمان مادة كحولية اسمها الأمبرين Ambrein لاستخدامها كمثبّت رائحة- هي بالواقع "قيء" حوت العنبر Sperm whale لا تقرفوا؛ وهي مادة شمعية صلبة تنشأ من تجمّع الأجزاء يلي ما بتنهضم -متل المناقير- من البلاوي الزرقا الي بياكلها الحوت؛ على وجه الخصوص رأسيات القدم Cephalopods متل الأخطبوط والحبار.. وبتضل بتتجمّع بأمعاء الحوت إلى أن تصبح مزعجة كفاية ليلفظها على شكل كتل تطفو وتعوم لتوصل لشي شاطئ بطرطوس مثلًا وبيلاقيها شي واحد سعيد حظ (غالبًا سائح، حظنا السوريين ومنعرفو😂).
٦- طيب.. حكينا على بول الحوت وقيء الحوت شو صفي؟ شمع الأذن (مبينة! ليش شو فكرتوا؟😂)..
بأشهر الصيف (الله يعجّل بخلوصها) الحيتان بتفرز شمع أذن earwax لونو فاهي، بينما بأيام البرد بأيام الشتي والرصيف بحيرة 🎶 -سوري اندمجت- بتفرز شمع أذن لونو غامق (لأنّو بيهاجروا لمناطق دافية)؛ ومع الأيام ولأنّو الحيتان ما بينكشو أدانهم بعد الحمام لأنو طول حياتهم عم يتحمّموا، بيتراكم هاد الشمع بتعاقب درجاته فاهي-غامق-فاهي..الخ وبيتصلّب مشكّلًا سدادة أذن earplug تستخدم لتقدير عمر الحوت 👌
٧- في تصنيفين رئيسيين للحيتان: حيتان بالينية Baleen ( ادعشر نوع) وحيتان مسنّنة Toothed (ستّوسبعين نوع), المسنّنة يعني عندها سنان، والبالينية يعني عندها بالين 😂 -عنجد آسف- البالينية يعني عندها صفيحة فلترة من الكيراتين keratin تعمل عمل المصفاية كالتالي: بيفتح الحوت تمّو متل يلي مو شايف أكل بحياتو؛ الفك السفلي حرفيًا بينخلع وبيفتح بزاوية 90° تقريبًا والأرضية تبع تمّو بتمطّ 4 أضعاف قياسها الطبيعي، وبيدوس بنزين فبيشفط وبيعبّي بتمّو كمية مياه أكبر من حجم جسمو بعدين هو وعم يسكر تمو بتبلّش المي كلها تندفع لبرّا من خلال صفيحة الفلترة (البالين) يلي ممكن يوصل طول الألياف فيها ل4 أمتار! وبيعلق وراها وجبة سي فود معتبرة سمك وجمبري ومن مجاميعو.
٨- معظمكم سمعان عن رواية (موبي ديك Moby-Dick) 😍؛ ويلي مو سمعان فيا يترك كلشي من ايدو -بعد ما يكمل المقال طبعًا- ويقرأها حتى لو عندك فاينل بكرة الرواية أهم.. أوك مو أهم بس أحلى😂
الرواية مستلهمة عن واقعة حقيقيّة صارت ب1820 لمّا سفينة التحويت (إسكس Essex) تهاجمت من قبل حوت عنبر عملاق وغرقت، والطاقم ضل شي شهر ونص بالبحر قبل ما يتم إنقاذه!
٩- الحيتان أكتر حيوانات بتطفي شموع أعياد ميلاد بين الثدييات؛ حيث يصل متوسط عمر الحوت مقوس الرأس Bowhead whale ل 200 سنة! (أكبر حوت مسجّل عاش 211 سنة) يعني ممكن نلاقي حوت منهم هلأ بيعرف نابليون معرفة شخصية!
١٠- طبعًا كلنا منعرف انّو الحيتان عندها فتحة براسها من فوق بيطلع منها نافورة من ماء البحر وقت تطلع عالسطح تتنفّس، صح؟؟ غلط، هي النافورة هي في الحقيقة خليط هواء ساخن وبكتيريا، وسبب وجود قطرات ماء فيها هو "تكثف" الهواء الساخن لأنو الجو بكون أبرد، بالمناسبة الفتحة بتكون مفردة عند الحيتان المسنّنة ومزدوجة (متل الأنف) عند البالينية.
١١- متل مو الفنانين يلي ما حدا عم يكتشفهم منّا بيغنّو بالحمّام؛ فشي طبيعي الحيتان يلي حياتها عبارة عن دوش مطوّل تكون بتغنّي برضو، وخاصّة ذكر الحوت الأحدب Humpback whale يلي بيغنّي ألحان بائسة ممكن تستمرّ ل30 دقيقة (https://bit.ly/3mcdDxP) فشر بافاروتي 😂 وانعمل ألبومات لسيمفونياتهم (عنجد!).
*بالمناسبة الحوت الأحدب اسمو التاني "جمل البحر" لأنو بيضل نص السنة تقريبًا بدون أكل معتمد على مخزونو من الدهون.
١٢- الحوت الرمادي Grey whale بيهاجر (شبكم لهف قلبكم؟؟ 😂) خلال حياته مسافات مجموعها يعادل رحلة للقمر (ذهاب وعودة) لأنو كل سنة بيقطعو 10-16 ألف كيلو من موطنهم بالصيف مياه الألاسكا لمياه أكثر دفئًا بالمكسيك روحة رجعة.
١٣- شويّة أفلام مشهورة فيها حيتان: (In the Heart of the Sea - Moby Dick - Big Miracle - Free Willy) مالي شايف ولا واحد منها يلي شاف أو شايف شي منها يكتبلنا رأيو بركي اذا في شي حلو منشوفو..
