البعد الرابع و كيفية تخيله ببساطة

كيفكن سامعين عن البعد الرابع؟
في تلت (3) طرق لحتى نحسن نتخيل البعد الرابع رح احكي عنن بهاد المنشور.

اول طريقة وهيي اسهل طريقة نوعاً ما، لما اعتبرنا انو الزمن بُعد رابع.
تخيل انك بدك تواعد حدا فأنت لحتى تحسن توعد هاد الشخص بتحتاج لتحدد المكان والوقت.
المكان هوي ثلاثة ابعاد (x, y, z) والوقت هوي البعد الرابع.
فأي خطأ بالمكان مستحيل تقابل الشخص ولو كان بنفس الوقت وأي خطأ بالوقت مستحيل تقابل الشخص ولو كنت بنفس المكان.

تاني طريقة، تخيل انك قاعد على كرسي مقابل طاولة، سطح هالطاولة متل ما بنعرف هي ثنائية الابعاد الها بعدين فقط الطول والعرض باعتبار انو شكل سطح الطاولة مستطيل او مربع.

اجيت انت كمشت مجموعة من الوراق وبلشت تحطن عهالطاولة بحيث كل ورقة تكون عسطح الطاولة بس (ما منحط ورقة فوق ورقة) وضليت هيك تحط وراق عسطحا لحتى مليت.
بهي اللحظة جيب نملة، حطا عهالطاولة، وقتا حتكون سطح الطاولة بالنسبة للنملة مليان ما في اي مساحة، طبعا اذا سألت النملة شو فينا نعمل بهي الحالة بتقلك ولا شي الطاولة مليانة، طيب قبل ما نكمل لازم نعرف ليش كانت الطاولة بالنسبة للنملة مليانة، ببساطة لأنو النملة كائن ثنائي الابعاد(بقصد بتتحرك على سطح ثنائي الأبعاد)، اما البني ادم هوي كائن ثلاثي الابعاد..
طيب خلينا نكمل قصتنا انت البني ادم الحباب الظريف الثلاثي الابعاد اجيت حبيت تساعد النملة تفضيلا مساحة فكمشت ورقة وحطيتا فوق ورقة تانية، وبالتالي انت فضيت مساحة الورقة عسطح الطاولة والنملة لو نطقت حتقول انو الورقة اختفت لأنو هيي ببساطة كائن ثنائي الأبعاد مستحيل تتخيل البعد التالت ووين ختفت الورقة..
طيب خلينا ننتقل لمرحلة ابعد، انت بني ادم عندك غرفة فاضية بلشت تجيب صناديق وتعبي بهالغرفة ضليت تعبي بهالغرفة لحتى مليت، وبقصد انو مليت الغرفة بكل ابعادا يعني انت فيك تحط صناديق فوق بعضها هون.
المهم، أنت كبني ادم ثلاثي ابعاد الغرفة بالنسبة الك مليت، بنفس الطريقة بيجي فضائي مدري شو دينو رباعي الابعاد بيكمش صندوق وبيختفي فجأة الصندوق، نحنا كبني ادمين رح نقول انو الصندوق اختفى بس انت فيك تتخيل انو البعد الرابع هوي متل بوابة ما فينا نوصلا او نلمسا..

الطريقة التالتة:
1-النقطة ليس لها ابعاد
2- المستقيم أحادي البعد (يتكون من نقطتين ليس لهما ابعاد)
3- المربع ثنائي الأبعاد (يتكون من اربعة مستقيمات أحاديات البعد)
4-المكعب ثلاثي الابعاد (يتكون من ستة مربعات ثنائية الأبعاد)
5- شكل رباعي الأبعاد (يتكون من ثمانية مكعبات ثلاثية الابعاد)

وهدول هني التلت طرق لحتى نحسن نتخيل البعد الرابع.