10 اسئلة بسيطة يومية لزيادة ذكاء طفلك
💥10 أسئلة بسيطة بينموا ذكاء الطفل
بشكل كبير جداً، لو سألتيهم لابنك كل يوم، بيغيروا شكل تفكيره، ويقووا ذكاءه، ويبنوا شخصيته ويعلموه إزاي يفكر
إحنا دايمًا فاكرين إن تنمية ذكاء الطفل محتاجة كورسات ولعب تعليمية غالية وبرامج معقدة…
لكن عايز اقولك إن أقوى أداة في إيد الأم
وهي السؤال الصح في الوقت الصح.
الطفل لما بيتسأل أسئلة مفتاحيه مش بس بيجاوب عليها
ده بيتعلم: يفكر ،يعبر، يحلل ،يتخيل ،يفهم مشاعره ،ويثق في نفسه.
دول 10 أسئلة لو دخلوا في روتين يومك مع ابنك
هيفرقوا بشكل كبير جدًا في ذكاءه وشخصيته:
1️⃣ إيه أكتر حاجة عجبتك أو فرحتك النهارده؟ وليه؟
مثال:
إيه أكتر حاجة فرحتك في يومك؟ اللعب مع مين؟ وليه؟
🔹بينمي عند الطفل
الذكاء العاطفي – التعبير عن المشاعر – الوعي بالذات.
بيعلم الطفل يلاحظ مشاعره ويفهمها بدل ما يكتمها.
2️⃣ إيه أكتر حاجة مضايقاك؟
مثال:
في حاجة حصلت النهارده خلتك تزعل أو تتضايق؟
🔹 بينمي عند الطفل
تنظيم المشاعر – الأمان النفسي – مهارة الفضفضة.
الطفل بيتعلم إن البيت مكان آمن للكلام، مش مكان للعقاب.
3️⃣ لو تقدر تغير حاجة حصلت النهارده… هتغير إيه؟
مثال:
لو اليوم يتعاد تاني، كنت هتعمل إيه بشكل مختلف؟
🔹بينمي عند الطفل
التفكير التأملي – تعلم من الخطأ – حل المشكلات.
من غير توبيخ، الطفل بيتعلم يراجع نفسه.
4️⃣ إيه رأيك في اللي حصل؟
مثال:
إيه رأيك في اللي صاحبك عمله؟ حسيت بإيه؟
🔹بينمي عند الطفل
التفكير النقدي – تكوين الرأي – عدم التقليد الأعمى.
بيفهم إن رأيه مهم ومسموع.
5️⃣ تحب تعمل إيه بكرة؟
مثال:
نفسك بكرة يكون شكله عامل إزاي؟ تحب نعمل إيه بكره؟
🔹بينمي عند الطفل
التخطيط – التوقع – الإحساس بالسيطرة على حياته.
الطفل بيتعلم يبص لقدام مش يعيش في رد الفعل بس.
6️⃣ إيه الحاجة اللي حسستك إنك فخور بنفسك النهارده؟
مثال:
إيه الحاجة اللي عملتها وحسيت إنك عملت حاجة حلوة وتستاهل عليها برافو؟
🔹 بينمي عند الطفل
تقدير الذات – الثقة بالنفس – الدافع الداخلي للنجاح والتطور.
بدل ما يستنى المدح من بره، بيتعلم يشوف إنجازه بنفسه.
7️⃣ لو صاحبك زعلان… تحب تساعده إزاي؟
مثال:
لو شوفت حد حزين في الفصل، ممكن تعمل إيه علشان تريحه او تخليه مبسوط؟
🔹 بينمي عند الطفل
التعاطف – الذكاء الاجتماعي – فهم مشاعر الآخرين.
وبيكبر إنسان رحيم مش أناني.
8️⃣ إيه الحاجة الجديدة اللي اتعلمتها النهارده؟
مثال:
معلومة جديدة سمعتها أو حاجة عرفتها لأول مرة؟
🔹بينمي عند الطفل
حب التعلم – الوعي المعرفي – ملاحظة نموه.
بيخلي الطفل يشوف إن كل يوم فيه تعلم مش بس درجات.
9️⃣ لو معاك عصاية سحرية… تحب تغير إيه في العالم؟
مثال:
لو تقدر تخلي حاجة أحسن في الدنيا، تختار إيه؟
🔹بينمي عند الطفل
الخيال – التفكير الإبداعي – القيم الإنسانية.
الخيال هو أساس الابتكار والشخصية.
🔟 إيه أكتر حاجة محتاجها مني دلوقتي؟
مثال:
تحب أساعدك؟ أسمعك في حاجة؟ أسيبك ترتاح شوية؟
🔹بينمي عند الطفل
الاحتياج الصحي – الأمان – العلاقة العاطفية مع الأم.
الطفل بيتعلم يطلب احتياجه بدل ما يعبر عنه بسلوك غلط.
ملاحظات مهمة جدًا:
❌ متقاطعيش ابنك وهو بيتكلم
❌ أوعي تقللي من إجاباته
❌ ما تحوليش الأسئلة لتحقيق وحكم
اسمعي بجد واهتمام، بصي في عينه وهو بيتكلم، احترمي مشاعره حتى لو شايفة الموضوع بسيط جداً
العقل اللي بيتسأل صح بيتدرب على التفكير( الإبداعي والتخيلي والنقدي والتخطيط وحل المشكلات والتأمل والعاطفي...)
والطفل اللي صوته مسموع في البيت
هيطلع صوته مسموع في الدنيا كلها.
ختاما:
مش محتاجة تعملي مجهود خارق هم 10 أسئلة في 10 دقايق كل يوم
ممكن يزرعوا في إبنك
ذكاء… ثقة… ووعي
يفضلوا مع ابنك العمر كله.❤️
اسأليه إنتي وساعديه يفكر صح…
قبل ما الدنيا تسأله وتجاوبه بطريقتها القاسية الصعبة.
