* لحظات من التأمل .... وسط ضوضاء الحياة *

 

لحظات من السكون والتأمل تعنى الكثير :

 

في الوقت إللى الأيام فيه بتمر بسرعة وكأنها بتهرب مننا ، بقينا بنجري ورا الشغل ومطالب الحياة من غير ما نفكر في نفسنا . ساعات بننسى حتى ناخد نفس عميق أو نريح عقولنا من الزحمة اللي جواها. وهنا بييجي التأمل كأنه باب صغير نهرب منه للحظة، مش علشان نسيب الدنيا، لكن علشان نشوف اللي جوانا بوضوح أكتر ونبقى كأننا بناخد ساعة راحة فى عمل شاق و مجهد للجسم.
التأمل فن وإصغاء فى لحظاتٍ من الإدراك.
التأمل مش مجرد جلوس في صمت أو إغلاق للعينين، التأمل فن الإصغاء إلى النفس. وهو لحظة نقرر فيها أن نوقف الضجيج الخارجي، لنسمع صوت قلوبنا وأفكارنا بهدوء. التأمل غذاء للروح التى أنهكتها الحياة.
هل جربت يوماً تجلس في مكان هادئ ، دون التعلق بأى مغريات تكنولوجيه ، وتجعل حواسك تلامس الطبيعه النقيه  وتبدأ تلاحظ تنفسك ، تحس بكل شهيق وزفير كأنك بتستعيد حياتك من جديد.
لو بتجرب لأول مره في البداية هتحس بالملل أو إن الأفكار بتهاجمك ، لكن مع الوقت ، هتتعلم تسيبها تمشي من غير ما تمسك فيها ، وهتعرف قيمة السكون اللي كنا مفتقدينه كلنا.

فوائد التأمل :

بتبدأ بسيطة بس تأثيرها عميق جداً. بيساعد على تقليل التوتر، تحسين التركيز ، والنوم بشكل أفضل. كمان بيخلي الإنسان أكثر هدوءاً في التعامل مع المواقف الصعبة. لما تتعلم تسيطر على أفكارك وقت التأمل ، هتعرف تسيطر على ردود فعلك في الحياة.
اللي بيعيش تجربة التأمل بانتظام بيكتشف إنه بقى أكثر وعيًا بنفسه وبالناس، بيبطل يضيع طاقته في الجدال والغضب ، وبيتعلم إن الهدوء مش ضعف ، ده قوة داخلية بتخليك تتعامل مع العالم بثبات واتزان .

التأمل فى القرآن الكريم :

كل الكلام اللى إتقال عن التأمل مش شطاره منى ولا من غيرى لأن ربنا سبحانه وتعالى بيدعونا للتأمل فى كل شئ فى حياتنا وده تم ذكره فى مواضع كثيره فى القرآن الكريم منها تأمل فى الكون وفى المخلوقات وفى علم الله بل والتأمل فى القرآن الكريم نفسه .
وهذكر لحضراتكم بعض الأمثله قال تعالى .

 (إنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ وَالْفُلْكِ الَّتِي تَجْرِي فِي الْبَحْرِ بِمَا يَنفَعُ النَّاسَ وَمَا أَنزَلَ اللَّهُ مِنَ السَّمَاءِ مِن مَّاءٍ فَأَحْيَا بِهِ الْأَرْضَ بَعْدَ مَوْتِهَا وَبَثَّ فِيهَا مِن كُلِّ دَابَّةٍ وَتَصْرِيفِ الرِّيَاحِ وَالسَّحَابِ الْمُسَخَّرِ بَيْنَ السَّمَاءِ وَالْأَرْضِ لَآيَاتٍ لِّقَوْمٍ يَعْقِلُونَ)

(أَوَلَمْ يَرَوْا إِلَى الْأَرْضِ كَمْ أَنْبَتْنَا فِيهَا مِنْ كُلِّ زَوْجٍ كَرِيمٍ)

(وَفِي أَنفُسِكُمْ ۚ أَفَلَا تُبْصِرُونَ) 

(قلْ سِيرُوا فِي الْأَرْضِ فَانظُرُوا)

والكثير الكثير من هذه الآيات فى القرآن الكريم 

وفى النهاية:

في وسط السرعة اللي بنعيشها ، التأمل هو التذكرة الوحيدة للعودة إلى ذاتك ، مش محتاج أدوات ، ولا وقت طويل ، كل اللي محتاجه هو قرار بسيط إنك تتوقف ، ولو لخمس دقايق في اليوم ، وتسمع نفسك .
وقتها هتفهم إنك مش دايمًا محتاج تسافر علشان ترتاح...

 أحيانًا الرحلة الحقيقية بتبدأ جواك ... 
سافر إلى روحك المفقوده وإبحث عنها ...