نظرية الفراشة و قدرتها على تكوين اعصار

تأثير الفراشة (Butterfly effect 🦋).
أغلبنا سمعنا عنو أو قرأنا.
بصراحة مفهومو سهل ولكن بحد ذاتو إذا بدنا نفهمو أكتر رح يكون معقّد.

تأثير الفراشة، بشير للأحداث البسيطة جداً يلي حدوثا ممكن تأدي لنتائج خطيرة وهامّة.
مثال، رفرفة جناح فراشة في البرازيل قد يؤدي إلى حدوث إعصار في تكساس.

لو حابب تاخد الأمور ببساطة وقف قراية هون بينتهي المنشور 🙂
لو حابب تعقد كمل قراية.

تأثير الفراشة أخدت أهمية كبيرة بالفترة الأخيرة وجذبت أنظار وعقول الناس الها، لو بتفتح عال IMDB وبتبحث Butterfly Effect رح تلاقي ٦١ فلم بيحوي باسمو Butterfly Effect هاد غير الأغاني والكتب والمقالات ووو.
والشي يلي جذب عقول الناس لتأثير الفراشة، هو أنو عم تطرح سؤال وجيه ومهم 
How well can we predict the future?
إلى أي مدى يمكننا التنبؤ بالمستقبل؟
والمنشور رح يجاوب عن هالسؤال.

قوانين نيوتن بالحركة والجاذبية الأرضية (لو متذكرها من الثانوي) جعلت الأمر أسهل لتوقع حركة الكواكب والقمر وصرنا نحسن نتوقع الكسوف والخسوف وإلى آخره.
العالم لابلاس لخص كل هالحكي، لابلاس تخيل كائن ذكي جداً بيعرف كلشي عم يصير بالكون باللحظة هي وكلشي متغيرات وحالات بالكون عم تصير بيعرفا هاد الكائن، متل أماكن وحركة الجزيئات وكيف بتتفاعل مع بعضا، فبقول " لو كانت هذه المعلومات كبيرة وكافية لإرسالها من أجل تحليلها سوف يكون المتسقبل حاضراً أمام أعيننا"

بتتذكر النواسات من البكالوريا؟
لو أخدت النواس الثقلي البسيط، الغير متخامد (يعني قوى الاحتكاك مهملة والنواس رح يضل يتحرك للانهاية) ورفعتو بزاوية ولتكن θ وتركتو يهتز رح يضل يهتز للانهاية وإذا بتتذكر من البكالوريا كان في تابع فيك تعرف من خلالو زاوية في لحظة معينة للنواس من خلال تعويض الزمن:
θ = θmax.cos(w0t + φ)
طيب أنت معناها فيك تعوض أي لحظة بدك ياها، معناها فيك تعرف النواس وين رح يكون بالمتسقبل ورح تعرف كل حركتو المتسقبلية بدءاً من الظروف والشروط البدائية يلي أنت حطيتا متل اختيار الزاوية θ.
هون بدنا ننوه عشي اسمو الشروط البدائية، النواس رح يضل يتحرك ويهتز بنفس الحركة لو كررت نفس شروط البدء، وأي تغيير بشروط البدء مثل الزاوية يلي زحت فيها النواس بالبداية رح يأدي لحركة مختلفة.

الآن كمان بدنا نعقد الأمور شوي، شايف النواس هاد؟ رح تعلق بأسفلو نواس تاني. (شوف التعليقات رح انشر جيف عن النواس المزدوج)
رح يصير اسمو نواس مزدوج هالنواس المزدوج هاد رح يورجينا شو يعني تأثير الفراشة.
النواس المزدوج توصف حركته بأنها حركة عشوائية غير متوقعة لا يمكن التنبؤ بها، لو جبت نواسين مزدوجين متماثلين عالحقيقة والتنين رفعتن بنفس الزاوية وتركتن بنفس اللحظة رح تلاحظ أنو كل واحد عم يتحرك وعم ياخد مسار مختلف عن التاني طيب والسبب؟؟؟ السبب هوي اختلاف بسيط جداً بشروط البدء ممكن يكون ضغط الهوا او الحرارة عند النواس الأول مختلف شي بسيط عن النواس التاني لهيك أدى لحركة ومستقبل ومسار مختلف تماماً عن النواس التاني أو ممكن تكون انت رفعت النواس الأول بزاوية 0.14 والنواس التاني بزاوية 0.140000001 وهاد الاختلاف رغم قديشو قلييل جدااا وبسيط ولا يذكر ولكن أدى لمستقبل وحركة مختلفة اختلاف كلي وجذري.
لهيك ممكن يكون تأثير الفراشة صح وممكن أي تغيير بالبداية مهما كان صغير يأدي لكوارث وأحداث مفاجئة.
وجواب السؤال إلى أي مدى يمكننا التنبؤ بالمستقبل بتوقع صار جوابو واضح، أكيد صعب كتير نتنبأ.

تأثير الفراشة بيندرج تحت نظرية اسما نظرية الفوضى يلي بتدرس الأنماط والأسباب الخفية يلي بتخلي الأنظمة الديناميكية(متل حركة النواس المزدوج) حساس بدرجة عالية لشروط البدء.
وتأثير الفراشة سبب تسميتو ليس المثال يلي انطرح بأول المنشور، إذا تطلعت عالصورة، هي الصورة هيي مخطط بياني اسمو phase space عم يوضح تغير ٣ متغيرات بفضاء ثلاثي الأبعاد والخطوط ما بتتقاطع لأن لو تقاطعت رح تصير قابلة للتنبؤ