حلم الثانوية العامة

بداية رحلة الثانوية العامة
دلوقتي اقدر اقول إن رحلة تالتة ثانوي بدأت مش متخيل إن الوقت عدي بالسرعة دي وبعد ما كنت بستنى اطمن ع قرايبي وصحابي وكل اللي اعرفهم دلوقتي هيجي عليا انا الدور 
وهستني ان شاء الله زي اليوم دا البوست هيجي في ال"memories" واقول اني حققت كل حلم حلمت بيه ودخلت الكلية اللي بحلم بيها وإن ربنا اداني كل اللي نفسي فيه واي حاجة ربنا كاتبهالي انا راضي بيها جداً و واثق ان ربنا هيجبرني وهيكرمني ويعوضني بالايام اللي فاتت دي واجي ف يوم زي الايام دي واقول "قد جعلها ربي حقًّا" وانا في ثانوي كان عندي حلم، كنت عاوز ابقي طيار، وكنت مجهز نفسي على كده ومتعرف على كمية طيارين ماليين الصفحة الشخصية عندي لدرجة ان في ناس اجانب فكرت اني طيار من كتر وجودي وسط الفئة دي، كنت عايش حلم جميل اوي لمدة تجاوزت ال ٧ سنوات .. مكنتش بحب اقول أحلامي دي لحد، بس من جوايا كنت فاكر اني هموت لو مدخلتش الحاجة دي
في شهر ٢ في سنة الثانوية العامة بتاعتي حسيت اني بصدع كتير، نظري ملغوش كتير، ف قلت إرهاق عادي وغبت من الدروس اسبوع كده ارتاح، بس لما رجعت لقيت نظري برضو ملغوش! صوت جوايا عمال يقولي لا متقلقش انت تمام، يعم لا انت كويس .. عدي اسبوع .. اتنين .. تلاتة .. وانا من سيئ لأسوأ، ف رحت كشفت ف شهر ٣ وكانت الصدمة .. نظري ضِعِف! مش عين واحدة، لا، الاتنين!
فضلت قاعد قدام الدكتور مبلّم كده اللي هو "ببساطة كده؟ نظري ضعف؟ بس ازاي يدكتور ده انا مفيش حد في عيلتي كلها لابس نضارة أساسًا! ازاي؟"
كانت صدمة مفجعة بالنسبالي، حسيت اني خسرت كل حاجة حقيقي، وقتها من جوايا كنت متدمر بس مكنتش ببين، وقررت اذاكر وخلاص وأأجل حزني لحد ما اخلص وزي ما تيجي تيجي، مذاكرة بجد، هموت نفسي، وقد كان .. جه وقت الامتحان ومكنتش مهتم، اصل حلمي اللي كنت بحلم بيه انتهى من أربع شهور يعني ف اشطا مش فارقة، لدرجة اني كنت بروح اصلي تهجد وانا عندي امتحان الصبح ومبنامش ومش مهتم اوي، وعدت الامتحانات، طلعت النتيجة لقيتني جايب 98%! تعرف؟ مفرحتش، آه والله محستش بأي حاجة، 
مش عشان انا بتبطر، لكن عشان انا مكنش ده حلمي ولا هدفي .. كنت مطفي بمعنى أصح 
اول ما التنسيق نزل، مكنتش لسه عارف هدخل ايه، لدرجة اني كنت بلف ع الأكبر مني ف كليات اسألهم واخد رأيهم، كنت محتار بين أسنان وصيدلة، وكله بالنسبالي كان حلو، مش فارقة معايا اصلا .. وليا صديق، هو صاحب عمري، فارس، خاله قال "هتدخلو طب ومفيش نقاش"
طبعا انا وقتها لااااا انا مش عاوز، انا عاوز ابدأ حياتي بدري والطب طويل وبتاع، وخناقات بقى ف بيتي وأخوالي ويبني متضيعش مجموعك وحوارات كبيرة كده، بس انا فعلا كنت رافض الفكرة من قبل ما تتعرض، ويشاء ربك اكتبها رغبة أولى "متسألش ازاي لاني والله والله والله معرفش ده حصل ازاي " ودخلت طب الزقازيق بكلمك وانا مريت بعد ثانوي بأسوأ ايام عمري، لاني كنت مأجل زعلي لحد ما أخلص السنة .. ومن سذاجتي وقتها ارتكبت أخطاء افدح وزاد حزني اكتر وحياتي ضلمت اكتر، بس بكلمك دلوقت وقد ايه انا مبسوط اني خسرت كل ده واني اكتئبت بتاع ٦ شهور لحد ما بدأت اتقبل الحياة تاني ورجعت لنفسي، النهارده بكلمك وانا كلي رضا اني اتاخدت من حلم عشته طول ٧ سنين، بنام وبصحي اتخيل نفسي فيه، حلم في لحظة اتبخر قدامي .. 
واول ما دخلت الكلية مكنتش فرحان اوي زي الناس، عادي
بس مع الوقت .. بدأت الرؤية تكون أوضح، بدأت افهم انا هنا ليه، اتعرفت على ناس معينة، بدأت اتماشي مع الكلية، وبدأت مداركي تتفتح، وبعدها فكرت في البيدج دي، اللي انت بتقري من عليها البوست ده، وفعلا بدأت، وبدأت اتعلم عن ديني اكتر، اتعرف ع ناس اكتر، دايرة معارفي بتزيد، حاسس اني بعمل حاجة، بعدها بدأت أدرك انا عاوز ابقي ايه!
متستغربش، لأن كتير مننا "حقيقة" مش عارف هو عاوز يبقى ايه، لكن أنا لقيت نفسي فعلا وعرفت انا جاي هنا ليه، جاي للحياة ليه، دوري هنا ايه، ويمكن ده أكبر إنجاز وصلت ليه، اني عرفت انا عاوز ابقي ايه
شوفت اللفة دي كلها والسنين دي كلها والحزن وضياع الأحلام ده كله؟ ده كله عشان ربنا يحطني في المكان المناسب .. مكاني!ده كله عشان هو رحيم، وانا كنت غبي وفاكر انه ظلمني عشان خد مني حلمي اللي كنت ليل نهار بدعيه يحققهولي، كنت مقهور بيني وبينك، بس دلوقت، والله ثم والله ثم والله اني ابكي من رحمة هذا الرب .. من حكمته .. من لطفه!خد مني أغلى حاجة كانت معايا .. حلمي وقلبي
عشان يديني درس ويوجهني لمكان لو كنت فضلت سنين ودفعت كل ما أملك مكنتش عمري هعرف طريقه ..
بكتب الكلام ده دلوقت عشان اقولك انه الحياة بتدار بحكمة انت مش هتقدر تفهمها، ممكن تعيش عمرك كله وبرضو متعرفش الحكمة من كل اللي حصل ده ايه، مش مهم تعرف! المهم بس تبقى عارف انه بيحبك .. ويريد ليك اليسر والخير، واللي مش بالضرورة يتحقق ف أحلامك، وانك مش لازم تبقى زي حد او ظروفك شبه حد او تحقق نفس إنجازه
ربنا رحيم ومطلبش منك انك تحقق إنجاز معين في حياتك، ومحملكش فوق طاقتك، ومقالكش انه لو مجبتش المجموع الفلاني مش هرزقك ولا هرفع قدرك! ومقالكش أنه بيظلم، حاشاه يظلمك سبحانه .. ف انت محمّل نفسك فوق طاقتك ليه؟ مش انت ذاكرت واجتهدت وخدت بالأسباب؟
طيب بقي قلقان ليه؟ ده ربنا رحيم اوي يبني والله، رحيم وكريم وبيسبب الأسباب عشان يرزقك والله وعشان يوهبك من كرمه ويوديك للخير اللي عمرك ما كنت هتعرف طريقه لوحدك مهما حاولت .. 
انا مبقولكش متحلمش، بقولك بس انه لما تحس انه بيقولك "مش مكانك" تقوله حاضر يا رب، آمنت بيك وكلي يقين اني رايح للخير، حتى لو على عكس هوايا، فهو الخير يا رب
وثِقْ تمامًا انه لو رأى منك الرضى، هيرضيك صدقني، وعطاء ربنا مش زي عطاء البشر، تخيل كده لو رئيس أمريكا هيديك هدية قدام العالم كله، هتكون ايه؟ تخيلت؟
ما بالك بقى بربنا - ولله المثل الأعلى ولا مقارنة-؟ ما بالك بعطاء الذي خزائنه لا تنفد!
خلي الامتحانات بالنسبالك مجرد امتحانات، مجرد أسئلة، جاوبتها خير وبركة، مجاوبتهاش خير برضو، متاخدش الأمر على محمل الجد، ودايما قول الحمد لله يا رب، انا احسن من غيري كتير، ومتحملش نفسك فوق الطاقة، عشان ربنا قال "لا يكلف الله نفسا إلا وسعها"، وارمي كلام الناس ورا ضهرك، انت مش فاشل ولا ضايع ولا أقل من حد، انت بس ربنا قسملك رزقك في طريق مختلف، والمجتمع ضحك علينا كلنا، مفيش كليات حلوة وكليات وحشة، كله حلو للي يجتهد فيه ويسعى، لكن الدكتور الفاشل هيبقى أقل من السباك الشاطر، واختلاف المسميات لا يهم طالما تساوت النتايج أو تقاربت، ميفرقش بقى بيقولو لك يدكتور ولا يا مستر ولا يا اسطي، طالما ف كل الأحوال وصلت لمبتغاك، ف انت أنجح الناس صدقني
طولت عليك انا آسف، روح بقى كمل مذاكرة عشان الامتحان الجاي يا بطل، هتعدي متقلقش، بس اهم حاجة تكون مؤمن انه ربنا رحيم بيك وبحالك، وأنها مش لازم تمشي زي ما انت مخططلها .. تخطيط ربنا أجمل صدقني .. ف رفقًا بنفسك وبقلبك يبطل
#ثانوية_عامة
طلاب الثانوية العامة كلها ادبي وعلمي 
عارف انكم قصرتم كتير في رمضان ومش بمزاجكم نتيجة لعوامل كتير منها :
الزهق من طول السنة والصيام والحر والنزول مرتين وعدم التركيز بس دا وارد 
المهم بعد رمضان والعيد تبدأ تنظم وقتك ومذاكرتك تعمل جدول لنفسك انت ال تعمله لنفسك مذاكرة صبح ليل يعني معسكر مغلق 
خاصة أن كله هيبدا المراجعة بعد العيد 
خد بالك هيكون ناقص شهر ونص يعني قربت جدا 
اعتمد علي نفسك اكتر حد
انت ال عارف امكانياتك وقدراتك 🫵🏿
أنت ال عندك حلم عايز تحققه
انت ال عايز تفرح نفسك وولي امرك ومدرسينك 
انت ال مش عايز حد يشمت فيك
اعتمد علي في الأول والآخر💖❤
عافر حلمك مستنيك
مشوار الثانوية العامة اوشك علي الانتهاء 🦾اوعي تخلي الضغط الي عليك يخليك تتخلي عن حلمك ، بكرهً لم توصل للكلية الي انت عايزها هتحس بطعم النجاح ومتعه المشوار 
اتعب واسعي واكيد ربنا مش هيضيع تعبك 
اللي وصلوا قبلك لحلمهم مش احسن منك في حاجه كلنا عدينا بضغط ووقعنا بس العبره باللي يقدر يقوم ويكمل المشوار حلمك يستاهل تتعب شويه عشانه 
افتكر دايما كلام ربنا " لا يكلف الله نفسا إلا وسعها " ربنا ميزرعش حلم جوانا غير وهو عارف انك قده ♥️
اتعب وكما مشوارك للآخر وخليك واثق في ربنا
اللهُم بكي طلاب ٣ ثانوي فرحاً وليس حزناً♥️🌙🤲🏻قول ورايا!
‏يارب إجعلني أسجد لك باكياً من حلمٍ ظننته مستحيلاً فتحقق
بمناسبة اقتراب امتحانات الثانوية العامة 
من ٣ سنين و انا ثانوية تقريبا كنا في شهر ٤ قبل الامتحانات بشهرين 
كنت أنا و مجموعة من صحابي قاعدين في  السنتر قبل درس الفيزياء و كل واحد مننا بيسال التاني انت ان شاء الله ناوي تخش كلية ايه ؟؟
فا كل واحد قال بيحلم بكلية ايه ، طب بشري ،  علاج طبيعي ، اسنان 
و جي الدور علي اخر واحد فينا سألنا عايز كلية ايه ، قال طب بيطري !!!
فانا سألته : اي هي كلية طب بيطري ده 🙂 ( مكنتش اعرف  ان في كلية بالاسم ده في القطاع الطبي ) 
قالي :  أنهم بيدرسوا  الحيوانات و يعالجوهم زي طب بشري و ان الكلية ده حلم حياته 
انا :  يا ابني  مش حرام عليك بعد تعبك  و تعب اهلك و المصاريف ده تخش طب بيطري  🤷
هو : يعم انا هتخرج من كلية طبية كا دكتور  في الاخر هو انت مفكرني هدرس في معهد 
انا : مستحيل ادخل طب بيطري و اكون دكتور بهايم في الاخر 😏
المهم بعد شهرين عملنا المستحيل هو دلوقتي في معهد و انا في طب بيطري 😂
ياريت يا جماعة محدش يتريق او يقلل من   أي كلية عشان هتلبسها يا نجم *
فاللّهم اني استودعك مستقبلاً لا اعلم خفاياه ولكني اعلم انك خير مدبر وخير من أودعت لهُ الودائع فاجعل القادم اجمل من مامضى .. يارب إليك رفعت حاجتي و انت بحاجتي اعلم، فاللهم يَسر ولا تُعسر وبارك ووفق وطمئن قلبي وانت أعلم بما فيه يا الله ❤️
ألف مبروك لطلبة الثانوية العامة ،
ودايما من نجاح لنجاح بإذن الله♥️
سعيك وإجتهادك طول السنين الدراسية مش هينحصر ف نتيجة الثانوية ، لسه السعي مش هينتهي والتحديات مش هتخلص .
الثانوية مجرد مفترق طرق لبداية مرحلة جديدة بطموحات أكبر  ،مش انت أبداً اللي بتحدد الطريق نت بتسعى وربك هو الميسر والمعين♥️
تفوقك ف الثانوية مش معناه النهاية بل هيفرض عليك تحديات أقوى وأكبر  ، و تعثرك _والنجاح عمره ماكان تعثر _ هو بداية حلم جديد ف مجال جديد  بعزيمة أكبر وخبرات أفضل 
بالتوفيق لكل طلبة الثانوية العامة  
بالتوفيق لكل مجتهد تعب وقدر الحمل والمسؤولية اللي كانت عليه❤