لماذا بيتسو موسيماني من افضل المدربين
بيتسو موسيماني، دكتور كورة!
بدون تحليل عميق ودسم، هكسر نقطة إني مش بتكلم في المحلي والإفريقي، لأني عايز أقدّر الراجل ده، لأنه عُمره ما خيّب ظني أبدًا، مدرب ممتاز ومن النخبة ومش هبالغ لو قولت واحد من أفضل المدربين اللي شوفتهم في أفريقيا في حياتي،
في عالم التدريب المدرب بيتم تقييمه حسب مراحل اللعب، فيه مدرب ممتاز في الجانب الدفاعي وأول 20 متر في الملعب وجيد بس في باقي المراحل، بالتالي بيستمد قوته من الأساس ده وباقي المراحل بتترجم بعد كده لكن مش بنفس القوة، بالتالي مدربي المرحلة دي بيميلوا دائمًا للجودة المميزة في الأمام،
ومدرب آخر هتلاقيه مميز في الثلث الثاني من الملعب أكتر، الإستحواذ وتدرج الكورة وترحيل لاعبيه مركزيًا، بالتالي بيميل للجودة العالية في كل المراكز علشان أدواته ينفذوا أفكاره بشكل ممكن،
ومن هنا نقدر نستنتج بُعد بين السطور، وهو إن المدرب اللي بيدرب لاعبين كبار بجودة عالية بتكون مسؤولياته أعلى بكتير من المدرب اللي بيدرب فريق بلاعبين أصحاب جودة أقل، لأنه بيتحكم فيهم من حيث كل شيء ولو مش قادر يعمل ده اللاعبين هيكونوا سيئين معاه، لأنهم مش هيتطوروا في جزئيات معينة تخص أسلوبه، ومش هيملكوا الإستمرارية لتقديم أداء بنفس الجمل والأفكار دائمًا،
هنا، بيب جوارديولا مثال واضح.
ومدرب آخر بيميل للشق الهجومي، تسخير كل شيء في خدمة وصول الكورة للثلث الهجومي في أقل وقت وأكتر سرعة، وهنا هانز فليك وناجلزمان وكلوب ورانجنيك بيفرضوا كلمتهم، ليه؟ لأنهم بيحتاجوا نوعية معينة من اللاعبين، بيحولوا لاعبيهم لآكلات لحوم، اللاعبين حتى مش بيمرروا الكورة كتير على الأرض وتحركاتهم كلها على الجول؛
لاعب بيتحرك بالكورة، والكل بيتحرك معاه بدون كورة كلاعبين إضافيين له وبينتشروا بعرض الملعب تناسبًا مع تحركه هو، بحيث حامل الكورة ده ميفكرش كتير ويمرر للاعب منهم بسرعة، واللي إتمررله يمرر بسرعة للاعب تاني، وهكذا..
علشان كده هتلاقي بايرن مثلًا مفيش عنده أي مشكلة إنه يخاطر بدفاعه في سبيل هجومه، أنت بتتكلم عن 6 أو 7 وأحيانًا 8 لاعبين بيكونوا في هجمة واحدة في منطقة الخصم، ومفيش مشكلة لو نفس الفريق ده خسر من درجة ثالثة في كأس ألمانيا مثلًا، لأنه نفس الفريق اللي بياخد أوروبا.
كلوب مثلًا لما كان في نفس الصيف معروض عليه هو وجوارديولا إتنين لاعبين، برناردو وتشامبرلين، الأول بـ45 مليون والثاني بـ42، يعني نفس التكلفة، كل واحد فيهم إختار لاعبه، وده مش هباءًا ولا إعتباطًا، بل إن كل مدرب عنده منهجية معينة وشايف لاعب معين هيقدر يخدمها، جوارديولا عايز لاعب فاهم مراحل اللعب أكتر ويقدر يضفي بفهمه للعبة داخل الملعب،
علشان كده برناردو بيقدر يلعب في 8 مراكز من الـ11! ومدرب تاني عايز لاعب سريع، سريع في كل شيء حتى لو جودته في تنفيذ القرار أقل.
بعد كل الكلام الكتير ده، وبدون مبالغة يعني، موسيماني مدرب عنده معرفة بكل حيثيات ومراحل اللعب، وده شيء غريب في أفريقيا أصلًا، لو إنتهج نهج دفاعي بيكسب، ولو إنتهج نهج الإستحواذ بيصنع فرص بالكَم والكيف، ولو حب يفرض سطوه بيسجل كتير، موسيماني وصل لمرحلة إنه بيحرك لاعبيه زي قطع الشطرنج فعلًا،
جزء كبير من جماهير الأهلي مثلًا إنتقدت موسيماني لما أحيانًا لعب بـ3 مدافعين، وشايفين إنه بيحترم الخصوم في الدوري المصري بشكل مبالغ فيه، رغم إنه كسب به الزمالك والإسماعيلي بـ9 أهداف في ماتشين، وأنا فاهم المبرر ده خرج ليه، لأن الناس دائمًا بتبحث عن كبش الفداء في أي لحظة خسارة، محدش بيبحث بجهد وبفِكر عن الأسباب الفعلية فعلًا،
موسيماني لاحظ ضعف دفاعي في فترة من الفترات، قدر إنه يصنع هيكلة معينة، بلاعب واحد بس إتحرك في الخلف قدر الأهلي من خلاله يكسب زيادة عددية على أي خصم في كل الخطوط؛ قدرت من خلاله تكسب مدافع زيادة، إتنين فاتحين الملعب، بالتالي حتى لو الخصم لعب بـ4 في الأمام وده مستحيل أنت كسبان الخط الخلفي،
بالتالي هتقدر تسند ديانج مثلًا في الخروج بالكورة، ولاعب زي حمدي فتحي في رفع عينيه عن الملعب وتحويل اللعب، بالتالي قدرت تكسب ثلاثي في الوسط كمان وإتنين فاتحين الوسط، يعني خماسي ضد رباعي بيلعب به أي خصم أو ثلاثي،
وثلاثي هجومي بجناحين insider بيضم للعمق وقت التحول ولاعب عمق وهمي، بتقدر من خلال الحركة دي كمان تكسب overload بين الظهير والجناح بسهولة، بتخلّي الظهير يفتح الخط والجناح يدخل العمق، وكل حركة بتحصل بتكون بتفصيلة معينة حسب حيثيات المباراة والخصم، بالتالي كسبت تاني أفضل فريقين في مصر بتساعية، وده مش غريب.
بالتالي أنا عارف إن صعب تكون 1+1=4 مثلًا، لكن موسيماني قدر يكسب المعادلة دي.
موسيماني النهارده قدر تاني وتالت ورابع ومليون، يفرض سطوه، بجودة أقل وبغيابات كتير، لكن الـ1+1 ممكن تساوي 4 عادي لو مع مدرب فاهم بيعمل ايه، مع مدرب ذكي، وموسيماني ذكي.
