في هذا المقال
لماذا تشعر أنك لا تنجز رغم أنك مشغول طوال اليوم؟
عمرك صحيت الصبح وقلت لنفسك: "النهارده هخلص كل اللي ورايا"، وبعدها تلاقي اليوم خلص وأنت تقريبًا معملتش حاجة؟
الغريب إنك طول اليوم حاسس إنك مشغول. بترد على رسائل، تمسك الموبايل شوية، تفتح حاجة على النت، تعمل مهمة، تسيبها وتروح لحاجة تانية، وفي آخر اليوم تحس إن دماغك تعبت جدًا… لكن لما تيجي تسأل نفسك: "أنا أنجزت إيه؟" تلاقي الإجابة مش كبيرة.
وده مش معناه إنك شخص كسول.
المشكلة في أوقات كتير إننا بنخلط بين إننا نكون مشغولين وإننا نكون منتجين.
ممكن تقعد خمس ساعات قدام الكمبيوتر، لكن لو نص الوقت بين إشعارات ورسائل وسوشيال ميديا، فأنت فعليًا ما اشتغلتش خمس ساعات بتركيز.
وأكتر حاجة بتعمل الموضوع ده هي الموبايل.
تدخل ترد على رسالة، وبعدها تقول "هشوف فيديو واحد بس"، تلاقي نفسك بعدها بتقلب في فيديوهات لمدة نص ساعة. ترجع للمهمة اللي كنت بتعملها، تحاول تفتكر كنت واقف فين، وبعد شوية تلاقي إشعار تاني شد انتباهك.
الموضوع بيحصل بشكل بسيط جدًا، لدرجة إننا ساعات مش بنلاحظ الوقت اللي ضاع.
عشان كده، جرب حاجة بسيطة: لما تبدأ مذاكرة أو شغل، حط الموبايل بعيد عنك واقفل الإشعارات اللي ملهاش لازمة. مش لازم تختفي من العالم، بس ادّي نفسك فترة صغيرة من غير مقاطعات.
كمان متحاولش تعمل عشرين حاجة في نفس اليوم.
اكتب مثلًا 3 حاجات أساسية عايز تخلصهم. لو خلصتهم، اعتبر إنك عملت المطلوب منك. وبعدها لو عندك طاقة، كمل باقي الحاجات.
لأن لما يكون قدامك عدد كبير جدًا من المهام، ساعات بتفضل تفكر فيهم بدل ما تبدأ في أي واحدة.
وفي حاجة تانية مهمة: متستناش إنك تكون متحمس عشان تبدأ.
بصراحة، لو فضلت مستني المزاج المناسب، ممكن تستنى كتير جدًا.
ابدأ حتى لو مش طايق. قول لنفسك: "هعملها خمس دقايق بس". افتح الكتاب، ابدأ أول جزء، اكتب أول سطر، أو اشتغل على أول خطوة. في الغالب، أصعب جزء هو إنك تبدأ أصلًا.
وحاول كمان تعرف إمتى بتكون مركز أكتر
لو أنت مثلًا. بتكون صاحي ومركز الصبح، خلي الحاجات الصعبة في الوقت ده. ولو تركيزك بيقل بالليل، خلي الوقت ده للحاجات البسيطة.
وفي النهاية، متقيسش يومك بعدد الساعات اللي كنت فيها مشغول.
اسأل نفسك سؤال أبسط:
“إيه الحاجة المهمة اللي عملتها النهارده؟”
لو عرفت تجاوب، فأنت غالبًا ماشي في الاتجاه الصح.
مش لازم تكون منتج كل دقيقة، ومش لازم تشتغل طول اليوم عشان تحس إن يومك كان مفيد. ساعات ساعة واحدة بتركيز حقيقي تساوي ساعات من التشتت.
فالمرة الجاية اللي تحس فيها إن اليوم خلص وأنت معملتش حاجة، متلومش نفسك على طول.
بص الأول على وقتك راح فين.
ممكن تكتشف إن المشكلة مش إنك محتاج وقت أكتر… أنت بس محتاج تشتت أقل.
الإبلاغ عن المقال
لو لاحظت مشكلة في المحتوى، أرسلها لفريق المراجعة. لن تظهر بياناتك لكاتب المقال أو للقراء.
تعذّر إرسال البلاغ الآن. حاول مرة أخرى لاحقًا.
سجّل الدخول لإرسال بلاغ
النقاش
التعليقات (0)
فكرة تضيفها، أو سؤال يفتح حوارًا.
الرجاء تسجيل الدخول لتتمكن من التعليق