ازاي انظم وقتي بين المذاكرة والشغل من البيت؟

ازاي انظم وقتي بين المذاكرة والشغل من البيت؟

عايزة تشتغلي وتجيبي فلوس وانتي لسه بتدرسي بس خايفة دراستك تبوظ احساس طبيعي جدا وكل البنات اللي بدأت تشتغل من البيت حست بيه في الاول

المشكلة مش ان اليوم قصير المشكلة اننا مش عارفين نرتب يومنا صح بنبدأ اليوم متحمسين وبعد ساعتين بنلاقي نفسنا تايهين بين المذاكرة والشغل والموبايل وفي الاخر بننام واحنا حاسين اننا معملناش اي حاجة

انا جربت ده كتير لحد ما فهمت ان السر مش في الشغل الكتير السر في الترتيب وفي انك تعرفي انتي عايزة ايه من يومك بالظبط

اول حاجة لازم تعمليها هي انك تخلي المذاكرة هي رقم واحد في يومك الشغل مهم وبيجيب فلوس بس شهادتك هي اللي هتفتح ليكي كل الابواب بعد كده عشان كده انا ببدأ يومي بالمذاكرة وانا لسه فايقة ومركزة بذاكر من اربعة لسبعة وبعدها باخد راحة ساعة اكل فيها واصلي واتكلم مع اهلي واريح دماغي

بعد الراحة ببدأ الشغل ودي اهم نقطة الشغل لازم يكون ساعة او ساعتين بس في الاول متقعديش خمس ساعات على الموبايل وتقولي انا بشتغل لانك هتتعبي وهتكرهي الشغل ساعة واحدة مركزة احسن بكتير من خمس ساعات وانتي بتقلبي في الواتساب في الساعة دي ممكن تكتبي مقال كامل في اموالي او تعملي تصميم في كانفا وتبيعيه او تردي على رسايل صفحة بتديريها

تاني حاجة مهمة اكتبي جدولك في ورقة وعلقيها قدامك متعتمديش على دماغك لما تكتبي مواعيدك هتحسي انك ملتزمة اكتر اكتبي مثلا من اربعة لسبعة مذاكرة من تمانية لعشرة شغل من عشرة لحداشر مراجعة ونوم ولو يوم باظ منك عادي جدا متزعليش ومتقوليش انا فاشلة قومي تاني يوم وكملي من غير جلد ذات

تالت حاجة اقفلي كل حاجة بتشتتك وانتي بتذاكري او بتشتغلي حطي الموبايل على الصامت وقولي لاخواتك انك مشغولة ساعة هتتفاجئي انك بتنجزي في ساعة اللي كنتي بتنجزيه في تلات ساعات لما تركزي بجد

رابع حاجة خلي ليكي يوم اجازة كامل انا بخلي الجمعة اجازة لا مذاكرة تقيلة ولا شغل اليوم ده بيرجع لي طاقتي وبيخليني اكمل الاسبوع كله بحماس وبدون زهق

خامس حاجة جهزي مكانك قبل ما تبدأي كوباية ماية وكشاكيلك وشاحنك جنبك عشان متقوميش كل شوية وتكسري تركيزك الترتيب الصغير ده بيفرق جدا في انجازك

اخر حاجة عايزة اقولها ليكي متستعجليش على الفلوس ابدأي بحاجة واحدة بس وركزي فيها اسبوعين لما تنجحي فيها زودي ساعة كمان النجاح بيجي خطوة خطوة مش مرة واحدة

انتي شايفة ايه اصعب حاجة في تنظيم وقتك المذاكرة ولا الشغل اكتبيلي في التعليقات وخلينا نشجع بعض ونكمل مع بعض للاخر ابدأي النهاردة مش بكرة وصدقيني هتشوفي الفرق بنفسك في اسبوع واحد بس يلا بينا نبدأ سوا