مراجعة لمسلسل ماوراء الطبيعة للكاتب الراحل دكتور احمد خالد توفيق

مراجعة للمسلسل الحلم  

 

               ما وراء الطبيعة 

 

 

 

 

 

     

          

تحذير لمن لم يرى المسلسل فى حرق لبعض الاحداث 

قبل كل حاجة لازم نعترف بشجاعة عمرو سلامة ومجهودة الخرافى اللى ظهر فى المسلسل ... عمرو خاص التجربة  وهو ملفوف  بحزام ناسف الريموت بتاعه فى ايد حضرتك ... اما بقى احمد امين فخاص التجربة كواحد محكوم عليه بالاعدام وداخل ينفذ الحكم ... فشكرا ياعمرو وشكرا يا احمد على التجربة فى العموم 
الخلاف الحاصل دلوقتى بين ناس شايفه المسلسل تحفة وحاجة عبقرية وناس تانية شايفه المسلسل اسوء حاجة حصلت فى الحياة وانه لايفرق عن الكورونا كتير فده ببساطة ان احنا فى مرحلة الصدمة من  ان الحاجة اللى كانت فى خيالنا بقيت واقع من لحم ودم   وهستخدم اكلشية من اكلشيهات السينما المصرية وهو لما واحد يجيله صدمة  فالدكتور يقول بحكمة نفس الصدمة اللى ممكن تحصل من الحزن ممكن تحصل من الفرحة والحمد لله محدش اتشل من الفرحة او الحزن  ... وفى النهاية ده الطبيعى والمنطقى ...  مفيش اجماع على حاجة مهما كانت حلوة او وحشة ومهمة كان رايك مهم وعندك منطق له فهو مش الراى الوحيد والنهائى ولو تعاملت مع المشروع كلة ان رايك هو الوحيد والنهائى فانت فى مشكلة يا عزيزى ... لولا اختلاف الاراء مش مكنش المسلسل اتعمل لاء مكنش دكتور احمد الله يرحمه كان ظهر اصلا 
و هفضل اكرر ان عمرو عمل مجهود خرافى فعلا والتجربة هنا صعبة جدا جدا اول مسلسل رعب اول مسلسل مع نتفلكس اول مسلسل بنظام جديد فى المشاهدة اول مسلسل مش معمول عن روايه لاء ده معمول عن سلسلة قعدت عشرين سنة يعنى استقرت استقرار تام فى دماغ جمهورها ومننساش ان راى دكتور احمد الله يرحمه كان هيبقى حاسم جدا جدا فى مواضيع ممكن تكون عاملة جدل دلوقتى ...  بجد شكرا يا عمرو تانى

ومع وضع كل  الحاجات دى  فى الاعتبار لكن السؤال هو فين الحاجة الناقصة اللى عملت الانقسام ده ؟   
اول حاجة ناقصة المسلسل ان دى التجربة الاولى  ( اللى بجد  )  مفيش  ناس قبل كدة جربوا تجربة (زى دى ) ففشلوا فجاه ناس بعدهم  جربوا تانى والدنيا ظبطت فناس تانية جربوا فحصلت تراكمات فعرفنا الغلط فين والصح فين فخدنا خبرة ... تجربة ماوراء الطبيعةهى الاولى من نوعها اللى بعد كدة هتبقى معيار (احسن او اسوء ) ... وده طبعا منلمش فيه ابدا المسلسل بالعكس داحنا نقدملهم الشكر لانهم هم اللى جازفوا 

المسلسل مستوحى من السلسلة  ... والسلسلة ليها كذا خط 
١- رفعت اسماعيل الكهل  الوحيد المنحوس  وده نص السلسلة 
٢- رفعت اسماعيل وعلاقته بمعارفه ( اعدائة واصدقائة وعيلتة وهويدا )
٣-رفعت اسماعيل وعلاقته بماجى 
٤- الاطار او السور اللى  بيحيط بالعالم ده وهو عالم ماوراء الطبيعة (المسوخ والاشباح والظواهر الخارقة )
عمرو وهو بينقل ده من السلسلة للمسلسل اعتقد انه معملش تمهيد كفاية للاحداث ففى علامات استفهام كتير ... ففى  الحلقة الاول شفنا كل الشخصيات  رفعت المنحوس اللى بيقابل عيلتة وخطيبته وماجى والاشباح وجرعة كوميديا ورومانسية ورعب ... هل عمرو كان خايف ان رتم المسلسل يكون بطيء فحب يدخل فى الموضوع على طول ويكون المسلسل ايقاعه سريع ...  بس فى حاجات كتير اوى وقعت فى النص وده عمل احيانا خلل فى ربط الاحداث واحيانا عدم منطقية  
مثلا ليه رئيفة مش فلاحة هل خاف عمرو يقدم اكلشيه الفلاحة اللى بتخبز الفطير المشلتت وبتزغط البط ( لو كدة ماشى ) وانا مش تافه اوى كدة علشان حد يعتقد ان دى  مشكلة المسلسل ده مثال بس 
المهم هنعدى الحاجات دى مش منة ولاصدقة مننا ...  لاء  ده تقدير للمجهود الخرافى اللى اتعمل  وبرضة تقديرا ان اى عمل فى الدنيا له اخطاء ومن حق المخرج انه يكون له رؤيته الخاصة ولازم كلنا نفتكر ان المسلسل  اتصور فى عز الكورونا اللى هو مش المسلسل هيعمل ايه  بعد كدة  لاء  ياترى احنا كبشر هنعيش بعد كدة ولا لاء  وكلنا منسناش الايام دى ومننساش كمان ان احنا لسه فيها ... وبناء على كدة فى حاجات اتقدمت كويس اوى كمشروع عمل يحمل اسم دكتور احمد خالد الله يرحمه فى المجمل  ...  شفنا رفعت اخيرا والبدلة الكحلية وسمعنا فى الردايو برنامج بعد منتصف الليل ودمعنا ورفعت  بيقول حتى تحترق النجوم تفاصيل وتفاصيل وتفاصيل رجعتنا لاجمل ايام عمرنا وخلتنا نعيش لحظات ممتعة... لكن مش كل الناس عاشت اللحظات دى ومش كل الناس قرت الروايات ومش بقول انهم اقل هى القصة كلها انهم مش فاهمين احنا عجبنا ايه ... وبكرر ده طبيعى جدا مش كل الناس بتحب حاجة واحدة او بتكرة حاجة واحدة ...  

المشكلة ان الجزء بتاع الرعب فى المسلسل يعنى مكنش مناسب شوية ... معلش يا عمرو احنا بالغين ومينفعش تحطلنا اصوات مرعبه كدة وخايف اقول مينفعش يكون كينج كونج فى ليبيا يعنى منقعش فى فخ درايكولا فى مصر فنجيب كينج كونج فى ليبيا  ... وعلى العموم افلام الرعب فى العالم كله مبترعبش بما فيه الكفاية  وفيها مشاكل

وده خلا محبى افلام الرعب ينتقدوا المسلسل بالشكل ده لان  وهما  بيتفرجوا  على المسلسل اللى كان بالنسبة لهم حاجة رعب بس مع رصيد كبير فى خيالهم من مشاهدة افلام رعب سواء حلوة اوحشة عمل المقارنة فالانتقادات دى 
وبصراحة ومن غير زعل شق الرعب فى المسلسل سحب  من نجاح المشروع اللى اتقدم كويس اوى وكان فيه مجهود جبار .

بمخى المتواضع مكنتش فاهم ليه احمد  امين لكنى ققررت اكون منصف واستنى لما اشوف المسلسل  وشفت و فهمت ... 
ده مشروع مش مسلسل لرمضان يجي فيه حد يقول زودلى مشاهد ونقصلى مشاهد وخلينى احب ملكة جمال واتجوز واحدة تانية واتخانق واتحط فى السجن واخرج انتقم ...كان لازم يكون ممثل فاهم هيشتغل فى ايه وينفذ توجهات  المشروع  من غير مايحط التاتش بتاعه فيطلعلنا مسلسل تانى .

ونجح احمد امين  فى الاختبار وقدر يكون رفعت اسماعيل عن جداره واستحقاق تام  وبجد مش لاقى  كلام اقوله تانى عليه . 
بالنسبة لفنيات المسلسل فالمسلسلات عندنا اتطورت جدا ومن فترة طويلة فاصبح الممتاز عادى وده انجاز للجيل اللى طور المسلسلات بالشكل ده .

بس كان نفسى المسلسل يكون له  موسيقي  خاصة بيه زى المسلسلات التانية المشهورة اللى اول مابنسمعها بنفتكر المسلسل ...هنا الموسيقى كانت موسيقى  رعب مش موسيقى خاصة بما وراء الطبيعة نفتكر بيها المسلسل .

شكرا نتفلكس لكن برضه  مش هتكون فوق النقض علشان انتجت المسلسل اللى كنا بنحلم نشوفة .

واخيرا رحم الله دكتور احمد خالد توفيق اللى برغم كل حاجة كويسة وبرغم فرحتنا بتحقيق الحلم  هيفضل فى الم كبير وحزن حقيقى انة  مش معانا فى لحظة مهمة فى حياتنا زى دى .