مقال قديم .. ٢٠١٩ هل هى السنة السينمائية الأفضل ؟

مشاركتى الاولى بواحد من المقالات المقربة لقلبى 

٢٠١٩ هل هى السنة السينمائية الأفضل ؟!

من وجهة نظرى الشخصية وبناء على رأيى الشخصى الذى لايمثل اى كائن فى الدنيا غيرى ... هعتبر سنة ٢٠١٩ سنة مميزة سينمائيا حاجة كدة بتفكرنا بسنة ١٩٩٤ ليه ...!!! 
تعالوا نشوف . 
فى سنة ٢٠١٩  المخرج تود فيلبس  قدملنا شخصية الجوكر عدو باتمان الرئيسى فى فيلم (جوكر ) وهو فيلم عن الشخصية نفسها مش فى مواجهة مباشرة مع باتمان كعادة سلسلة الافلام دى   ؛ علشان نشوف ليه الجوكر اصبح الشخصية  المجرمة دى اللى باتمان دايما بيطاردها ونشوف جوانب تانية من الشخصية واسباب تحولها ... وكان معيار الترقب والتشويق عالى جدا ...  ليه 
كلنا عارفين طبعا انا هيث ليدجر واخد توكيل افضل واحد قدم شخصية الجوكر ومات ؛  واللى خدمه اوى ان تقريبا محدش قدم الدور كويس بعد كدة خصوصا الكائن البغيض جاريد ليتو  اخر من قدم الشخصية ...فكان التحدى قدام تود فيلبس مخرج الفيلم المشهور بافلامة الخفيفة هيقدم الجوكر ازاى فستعان بواحد مجنون رسمى وهو واكين فينيكس اللى مكدبش خبر وقدم اداء مميز وحجز اوسكار افضل ممثل عن جداره ؛ وكان الكوميك فى الموضوع ده ان شخصية الجوكر حصلت على الاوسكار مرتين كافضل ممثل مساعد لهيث ليدجر وافضل ممثل رئيسى واكين فينيكس وده تفوق كاسح على شخصية باتمان اللى حتى محصلتش على الترشح  ... 
فيلم جوكر كان من افلام ٢٠١٩  المميزة اللى حصل على مجموعة جوايز مهمة زى الاسد الذهبى فى مهرجان فينيسيا وجولدن جلوب واسكار افضل ممثل رئيسى وافضل موسيقى تصويريه لملحنة ايسلندية وكانت سابقة واعتقد ان حصول الفيلم على الجوايز المهمة دى بسبب  انه متصنفش انه  فيلم سوبر هيروز لعين ... الفيلم اتصنف كفيلم ثورى

الجميلة سكارليت جوهانسون تالقت فى ٢٠١٩ وقدمت دورين مهمين فى حياتها المهنية  الاول دور رئيسى فى فيلم ( قصة زواج ) والتانى دور مساعد فى فيلم (الارنب چوچو ) وحصلت على ترشيحين للاوسكار كافضل ممثلة مساعدة وافضل ممثلة وبترتيب توزيع الجوايز خسرت جايزة افضل ممثلة مساعدة فكان عندها امل انها تعوض فى الفينال  لكنها خسرت الجايزة لصالح رينية زيجلر اللى كانت من مفاجات ٢٠١٩ وعادت بعد غياب وحصلت على افضل ممثلة عن دورها فى فيلم  ( جودى )... اما من المواقف البايخة لسكارليت هو ان جايزة افضل ممثلة مساعدة حصلت عليها لورا ديرن اللى كانت معاها فى فيلم (قصة زواج ) ... ٢٠١٩ كانت سنة غير سعيدة على سكارليت بس فيلمها التانى (الارنب چوچو ) اللى قدمت فيه دور جميل لام طفل متعصب للن*ازية   نضجت فيه  سكارليت حصل على جايزة اوسكار افضل سيناريو مقتبس للمخرج وكاتب سيناريو الفيلم تايكا وايتيتى اللى عرف من اين تؤكل الكتف وقدم القصة المفضله لهوليوود

عم مجانين هوليوود السفاح الدموى كوينتن تارانتينو فى ٢٠١٩ قرر انه يقدم هديتة لعالم السينما ويجمع ميسى ورونالدو هوليوود براد بيت وليوناردو دى كابريو  فى فيلمه التاسع (ذات مرة فى هوليوود ) اللى كان رسالة شكر واعتزاز من تارانتينو  عن مرحلة مهمة فى تاريخ هوليوود وكمان كان  بيتناول حادثه مهمة وهى مقتل الممثلة شارون تيت  وبرغم ان الفيلم كان ماشى بهدوء وكتير شافوا ان الفيلم ممل الا ان تارانتينو مارس هوايته  المفضلة وقلب الترابيزة على الكل وقدم نهاية صادمة ولعب كمان فى الحقيقة التاريخية اللى الصغير قبل الكبير عارفها فى جراءه ميقدرش عليها الا  تارانتينو وطبعا مش هنحرق الاحداث ... حصل براد بيت عن دوره فى الفيلم على الاوسكار الاول له كافضل ممثل مساعد وده الاوسكار التالت لممثل مساعد فى افلام تارنتينو واعتقد انه كان اختيار ذكى جدا لبراد بيت .

ولأن الدهن فى العتاقى فالكباره مارتن سكورسيزي فى ٢٠١٩  لم الكبار كلهم ... روبرت دى نيرو ورجع جو بيشى من الاعتزال وجاب ال باتشينو  وحصل اكتشاف مهم وهو ان ده كان اول لقاء بين سكورسيزي وباتشينو وهم فوق السبعين وقدموا تحفة مخدتش حقها  اسمها  ( الايرلندى ) ومش عايز اسمع حد من اللى مشفش الفيلم يقولى الفيلم قصته ايه ... لان العصابة دى لما تتجمع اكيد مش هتعمل فيلم انيميشن ... بس على مايبدو ان الفيلم مكنش على هوا هوليوود لانه مخدش اى جايزة من جوايز الاوسكار المرشح له  ...  فى الفيلم سكورسيزي المسكين مارس هوايته بانه عرى جزء من تاريخ امريكا المش لطيف ولكن يبدو ان الماما امريكا عاقبت سكورسيزي بحرمانة من اوسكار مستحق وخرج الفيلم بولا جايزة واحدة للمرة التالتة بعد افلام مهمة له  اترشحت لجوائز اوسكار زى (عصابات نيويورك )  و(ذئب وول ستريت ) وخرجت بولا حاجة .

الانجليزي المميز والمسرحى العريق اللى دخل نادى الاوسكار من اول فيلم له المخرج  سام ميندز كانت له مشاركة مميزة فى ٢٠١٩ بفيلمه الحربى  (١٩١٧ ) اللى بتدور احداثة اثناء الحرب العالمية الأولى واستخدم فيه تكنيك قديم اه بس اعتقد انه جديد على الافلام الحربية وهو تصوير الفيلم كله  كانه لقطة واحد بدون قطع والتكنيك ده اتعمل كتير لكن كان المرة الاولى فى فيلم حربى واستعان ميندز بمخرج التصوير المخضرم روجر ديكنز اللى حسم حصول الفيلم  على اوسكار افضل تصوير .

و٢٠١٩ برضة عاد بقوة السير انتونى هوبكنز فى دور مميز جدا وقدم  البابا بيندكت بابا الفاتيكان السابق فى فيلم ( بباوان )... اللى قدم فيه السير اداء اسطورى مميز اترشح بيه لاوسكار افضل ممثل مساعد وده فيلم  مهم هنتكلم عنه فى بوست مستقل لان اداء السير فيه يستحق . 

وفى ٢٠١٩ بتحصل مفاجاة فى مهرجان كان بحصول فيلم من كوريا الجنوبية  اسمه parasite  من اخراج وسيناريو مخرج اسمه بونج جون هو على جايزة السعفة الذهبية للمرة الأولى فى تاريخ كوريا الجنوبية وبيلفت الفيلم نظر العالم له  وبيحصل  برضه على مجموعة جوايز  عالمية مهمة  لكن بتكون المفاجاة الكبيرة بترشح الفيلم لست جوايز اوسكار  ... لكن بيحصل الحدث الغير متوقع فى تاريخ السينما وتاريخ جايزة الاوسكار للمرة الاولى بيحصل الفيلم على اربع جوايز وهى افضل اخراج وافضل سيناريو اصلى وافضل فيلم بلغة اجنبية وافضل فيلم وبيكسر قاعدة الاوسكار وهى ان الجوايز دى ( باستثناء الفيلم بلغة اجنبية ) لايحصل عليها الافيلم انتاج امريكى او ناطق بالانجليزية الفيلم كان انتاج كورى جنوبى وناطق بالكورية وبيدخل بونج جون هو التاريخ من أوسع أبوابه .

و٢٠١٩ السينما العربية كان ليها نصيب من المشاركات العالمية فحصل الفيلم اللبناني ( كفر ناحوم ) على جايزة لجنة التحكيم فى مهرجان كان واترشح لاوسكار افضل فيلم اجنبى وكانت المرة التانية على التوالى فيلم لبنانى يترشح لاوسكار .

وفى مصر فى ٢٠١٩حقق فيلم  (الفيل الازرق ٢ ) اعلى ايراد فى تاريخ السينما المصرية ب ١٠٣ مليون جنية ... وحقق برضه حاله من الجدل باعتبار ايراد الفيلم لايعبر عن  حاجة بسبب حسابات اقتصادية زى ارتفاع معدل التضخم وارتفاع سعر التذكرة وان البعض شايف ان  المقياس الحقيقي  الفيلم باع كام تذكرة .

وبعيدا عن السينما ففى عالم المسلسلات فى ٢٠١٩ و بعد ترقب عالمى اتعرض الموسم الاخير من مسلسل  جيم اوف ثرونز  و كانت المراجعات سلبيه والتقييمات متواضعه جدا  وغالبية مجانين المسلسل  شافوا ان النهاية كانت كارثية وكانت سوء خاتمة للمسلسل .

اخيرا ومن وجهى نظرى الشخصية  دى كانت احداث سينمائية مهمة جدا بسببها  اعتقد ان ٢٠١٩ كانت سنة مميزة جدا فى تاريخ السينما  وده مجرد راي شخصى جدا يعبر عنى انا وغير ملزم لاى حد .