قائمتى لافضل الافلام صاحبة افضل مؤثرات بصرية

قائمتى للأفلام صاحبة افضل المؤثرات البصرية .

المركز العاشر : (القناع  Mask انتاج 1994) واحد من افضل افلام جيمى كارى وفيلم من انتاج العام السحرى فى السينما الامريكية 1994الفيلم معظمنا شافه وكلنا اكيد استغربنا من كمية المؤثرات اللى فى الفيلم اللى كانت بتحصل لجيمى كارى اللى خلت الفيلم مزيج من فيلم كارتون وفيلم عادى  يعنى فى افلام الكارتون بتاعة توم وجيرى بتشفهم وهما بيكسروا بعض وتوم بيدبح جيرى وجيرى يحط توم تحت القطر وتوم يقع من طياره ويتكسر كل ده كان عادى فى فيلم كارتون لكن فى فيلم سينمائى ده كان حاجة بجد فوق الوصف لدرجة ان الفيلم برغم انه خفيف وبسيط ومش فيلم جوايز خالص اترشح لجايزه اوسكار افضل مؤثرات بصرية لكن مخدهاش لان اللى خدها فيلم تانى معانا برضة فى القائمة

المركز التاسع : (تايتانيك Titanic انتاج 1997) فى فيلم ممكن  يكون في التصوير هو البطل او الديكور او الموسيقى او المؤثرات لكن فيلم واحد يجمع كل دة  ويتحول الى  اسطورة  ويحصل على 11 جائزة اوسكار اللى من ضمنها طبعا افضل مؤثرات بصرية  اللى استحقها الفيلم عن جداره واستحقاق تام وخصوصا ان كل ده حصل فى حمام سباحة !!

المركزالثامن : (فورست جامب Forrest Gump انتاج 1994) كالعادة العام السحرى 1994 وفيلم من افضل الافلام فى التاريخ وهنا احنا مش بتكلم عن فيلم خيال علمى او كوميدى فانتازيا المؤثرات  يبقى ليها دور كبير ؛ لا هنا بنتكلم عن فيلم اجتماعى واقعى التحدي كان انك تعمل مؤثرات  بحيث انها متبقاش باينة انها مؤثرات والا الفيلم الاجتماعى الواقعى ده يتحول لنكته ؛ فى الفيلم الممثل  جارى  سينيز  الظابط اللى رجليه اتقطعت  ؛ ظهر فى مشاهد كتير بمنتهى الوضوح رجليه مقطوعه ازااااى معرفش طبعا فى خدعه فى الموضوع لكن كانت متقنة جدا جدا + طبعا المشاهد بتاعت فورست وهو بيسلم على روساء امريكا ومشاهد الحرب ؛ طبعا المشاهد دى لو اتعملت النهارده مش هيبقى فيها اى انبهار وهتعتبر مشاهد عادية جدا ؛ لكن من واحد وعشرين سنه كانت  تكفى ان الفيلم يحصل على اوسكار افضل مؤثرات بصرية ؛  وطبعا الفيلم واخد 6 جوايز اوسكار

المركز السابع  : ( افاتار Avatar انتاج 2009 ) محبتش الفيلم ده لكن احب ان اكون منصف واعتبر مؤثرات الفيلم ده من افضل المؤثرات اللى شفتها مخرج الفيلم جيمس كاميرون وده اول فيلم يعمله بعد تايتانيك وبرغم ناجحه الاسطورى فى شباك التذاكر ؛ الفيلم مخد ش الا 3 جوايز اوسكار بس منهم طبعا افضل مؤثرات ؛ فى حين ان تايتانك الفيلم السابق لكاميرون خد 11 اوسكار .

المركز السادس  : (إنترستيلر Interstellar انتاج 2014 ) مخرج الفيلم هو المخضرم كريستوفر نولان اللى عودنا دايما ان احنا هنشوف حاجة فخيمة والفيلم كان مرتقب بدرجة كبيرة جدا وكلنا توقعنا بما ان الفيلم عن الفضاء ان المؤثرات هتبقى جامده جدا جدا لكن لما شفت الفيلم لقيت الموثرات جامده بس زى بالظبط لما يكون عندك طالب بيجيب على طول 9من 10 وفى مره جاب 8من 10 فجالك احباط ؛  خصوصا ان نولان عامل فيلم سابق للفيلم ده ومعانا فى القائمه ؛ فيلم كانت المؤثرات فيه تقريبا اسطورية

المركز الخامس : (ماتريكس The Matrix انتاج 1999) ممكن تكون صدفه ان الفيلم يكون فى اخر سنوات القرن العشرين علشان يقفل الباب وراءه على اى مؤثرات ممكن تكون شفتها فى حياتك ويفتح باب جديد فى بداية القرن الجديد وتحصل ثوره رهيبة فى عالم المؤثرات ؛ الفيلم مرفعش سقف التحدى لا ده شال السقف خالص ؛ و يكون تصنيف الموثرات : مؤثرات ما قبل فيلم ماتريكس وموثرات مابعد فيلم ماتريكس  ؛ و بتحصلك مشكلة كمشاهد ل الافلام انك شفت القمة وعرفت ان اى حاجة ممكن تتعمل ومش بس كده لا ده كمان ممكن اللى متقدرش تتخيلة تشوفه ؛ عشان كده بقينا احنا كمشاهدين مش اى حاجة تقنعنا او تبهرنا ؛ (وعلشان كده فى افلام كتييير محطهاش فى قائمتى دى)
سلسله افلام ماتريكس كانت طفره بكل ما تحملة الكلمة من معنى لدرجة من وجهى نظرى الشخصية 
حصولها على اوسكار المؤثرات مجرد تحصيل حاصل .

المركز الرابع : ( Inception انتاج 2010 ) الفيلم كان عنده تحدى كبير جدا لان قصة الفيلم بتدور فى عالم الاحلام يعنى مفيش منطق ؛ يعنى لازم المؤثرات تكون فوق مستوى الاحلام ؛ وحصل وقدر نولان يقدم لنا فيلم المؤاثرات كانت تقريبا اسطورية 
علشان كده كانت مستوى المؤثرات فى انترستلر بالنسبة ليا كان اقل من المتوقع يعنى كان جيد جدا بعد مشفت الامتياز من نولان فى Inception . وحصل الفيلم على اوسكار افضل مؤثرات .

المركز الثالث : (حياة باى  Life of Pi  انتاج 2012 ) احداث الفيلم كانت 90 %  منها بتدور بين ولد ونمر على ظهر مركب  ؛  انا بعد مشفت الفيلم انبهرت جدا ؛ وقلت اشوف الميكينج بتاع الفيلم ؛ وكانت الصدمة كل الفيلم ده كان مجرد اشتغالة مفيش نمر مفيش بحر مفيش حتى حمام سباحة زى بتاع تايتانك ؛ الفيلم كله جرافيك فى جرافيك ؛ وانا من الناس اللى بتكره الجرافيك لانى بخلينى احس انى بتفرج على فيلم كارتون او لعبة بلاى استيشن ؛ اى غلطة فى الجرافيك كالعاده هتحول الفيلم لمسخره (زى افلام كتيير اوى ) وده فيلم فلسفى عمييييق بجد يعنى مفيش مجال لغطة جرافيك ؛ لكن الفيلم نجح انه يقدم مشاهد جرافيك طبيعية ؛ يعنى النمر الجرافيك كان طبيعى اكتر من لو كانوا جابوا نمر حقيقى + كتييير من التحف مينفعش تتوصف لازم تتشاف ؛ الفيلم ثوره فى عالم المؤثرات وحصل على اوسكار افضل مؤثرات وكمان حصل على ثلاث جوائز اوسكار تانية ( الفيلم ده حالة )

المركز الثانى : (جرافيتى  Gravity انتاج 2013 ) "أفضل فيلم فضاء على الإطلاق" دى مش كلمتى دى كلمة جيمس كاميرون يعنى بهير انبهر  ؛ وافضل مؤثرات اتعملت فى اخر عشرين سنه ؛ السؤال هنا هم لو كانوا صوروا الفيلم ده فى الفضاء بجد كان هيبقى بنفس الاتقان ده ؛ مخرج الفيلم هو المكسيكى ألفونسو كوارون اللى اخرج الجزء الثالث من سلسلة افلام هارى بوتر (مكنش ينفع مقلش اى حاجة عن هارى بوتر ) ؛ اللى قدر يقدم مؤثرات اعتقد ان صعب اوى حد تانى هيعمل فيلم فضاء يكون فية نفس جودة واتقان المؤثرات دى ؛ حتى كريتستوفر نولان بجلالة قدرة اللى عمل انترسيلر الفيلم اللى مخدش غير اوسكار واحد بس وكان فى المؤثرات موصلش لمرحلة جرافيتى خالص (وبنتكلم عن المؤثرات ها ) وده مش رايى لوحدى ده رايى ناس كتير ؛ الفيلم خد 7 اوسكار منهم افضل مؤثرات طبعا .

المركز الاول : ( 2001: أوديسة الفضاء 2001: A Space Odyssey )  د/ احمد خالد توفيق هو اللى عرفنا الفيلم عن طريق سلسلة مقالات افلام الحافظة الزرقاء اللى تحولت لكتاب ( اضافة حقيقة لمكتبة  السينما ) ؛ وبعد ما تشوف الفيلم هتحطة فى قائمة لافضل افلام اتعملت عن الفضاء زى جرافيتى وانترستلر  وهتحتار هتحطه فى اى مركز الثالث ولا التانى ولا الاول ولو معندكش معلومات عن الفيلم هتقول ان الفيلم ده اتعمل فى التسعيينات  على اقصى تقدير ؛ ( وهنا أدرك العالم أنه أمام معجزة سينمائية كاملة) ودى مقولة د/ احمد خالد توفيق  من تحليلة للفيلم فى مقالات افلام الحافظة الزرقاء 
وانا اقدر اقول وضميرى مستريح ان مؤثرات الفيلم ده افضل مؤثرات اتعملت فى التاريخ ومش ببالغ 
لسبب بسيط الفيلم المعجزة ده اتعمل سنة 1968  ؛  كل الانبهارات دى كانت من 47 سنة ؛ وانا باعتقد ان ستانلى كوبريك صور الفيلم ده عن طريق الة زمن مش الة تصوير  الفيلم سابق عصرة بمراحل وتقدر بمنتهى الرضا انك تحطة فى قائمه افضل المؤثرات فى التاريخ  مع افلام بعده ب 45  سنة .

وبكده بتنتهى قائمتى لافضل الافلام من ناحية المؤثرات البصرية وطبعا فى ناس ممكن تعترض على افلام موجوده او افلام مش موجوده ؛ لكن انا بتكلم عن قائمتى انا يعنى رايى انا . اللى ممكن يكون صح وممكن يكون غلط ؛ لكن طبعا واكيد مش ملزم لاى حد .