في هذا المقال
المفارقة الغربية في زماننا إننا بقينا متصلين بكل حاجة طول الوقت، بس في نفس الوقت ناس كتير حاسة بمسافة كبيرة بينها وبين اللي حواليها.
وهنا ييجى السؤال المهم:
إيه اللى يخلي وجودنا وسط الناس حقيقي ومريح، مش مجرد روتين أو مجاملة عابرة؟
الحياة المجتمعية
الحقيقية مش شعارات كبيرة ولا مناسبات رسمية بنلبس فيها أحسن حاجة ونقعد ساعتين وخلاص. الحياة المجتمعية هي التفاصيل العادية جدًا: الجار اللي يسأل عليك لما يلاحظ إنك مش ظاهرة من كام يوم، الصاحب اللي يسمعك من غير ما يقاطعك أو يحكم عليك، القعدة البسيطة اللي بتضحكوا فيها من القلب بعد أسبوع طويل ومليان ضغط.
إيه اللي بيحصل لما العزلة تزيد بينا ؟
لما كل واحد يقفل بابه على نفسه ويكتفي بالشاشات، الدنيا بتبان أهدى فى الأول، بس مع الوقت بنحس إن في حاجة ناقصة. الإنسان بطبيعته محتاج يحس إنه جزء من دايرة أمان ؛مكان لو وقع فيه يلاقي إيد تتمد له، ولو تفرح له من قبلها من غير حسابات.
المشاكل الصغيرة بتكبر في دماغنا لما بنشيلها لوحدنا، و الهموم بتنقل أكثر لما مفيش حد نحكى له كلمة تريحنا.
حتى الفرحة نفسها بتكون أضعف لما مفيش حد نشاركة بيها؛كوباية الشاى أو الأكلة الحلوة ليها طعم تانى خالص لما تتقاسم مع ناس قريبة مننا.
ملامح المجتمع اللي يطمن القلب
المجتمع الكويس مش معناه إن الناس كلها شبه بعض أو مفيش بينهم خلاف، بالعكس ،الخلاف طبيعى وموجود، بس الفرق الحقيقي بيبان في طريقة التعامل وقت الزعل والاختلاف:
الوجود الحقيقي مش الشكلى: إننا نكون حاضرين بوقتنا و انتباهنا، مش قاعدين بجسمنا و عقلنا في مكان تاني أو في شاشة الموبايل.
السند وقت الجد: الجدعنة الحقيقية مش فى الكلام وقت الرخاء، لكن في الوقفة الصادقة وقت الأزمات، حتى لو بكلمة تطمن أو مساعدة بسيطة على قد الاستطاعة.
قبول الناس زي ماهي : إننا ندي مساحة للغير يلغط و يتعلم ويكون مختلف، من غير ما نعلق على كل صغيرة و كبيرة أو نوع أحكام جاهزة.
مش لازم خروجات غالية ولا ترتيبات معقدة؛زيارة خفيفة،مكالمة من غير مناسبة،أو كلمة طيبة في وقتها بتفرق أكثر بكثير مما نتخيل.
إزاى نرجع الدفء ده خطوة بخطوة ؟
مفيش حد فينا هيقدر يغير الدنيا كلها في يوم وليلة، بس كل واحد يقدر يبدأ من دايرته القريبة. خطوة صغيرة منك ممكن تشجع غيرك يعمل زيها. نبدأ نسأل بجد مش لمجرد الواجب،نسمع كويس قبل ما نرد، ونحاول نكون مصدر راحة للي حوالينا بدل ما نكون عبء أو مصدر توتر.
وحتى في شكل شغلنا وحياتنا اليومية، بنشوف ده بوضوح؛ ناس كتير بقت تشتغل من البيت أو أونلاين بالساعات، وده بيوفر وقت ومجهود، بس في نفس الوقت بيحتاج وعي إننا ما ننسلخش عن الناس، حتى في وسط الشغل عن بعُد أو الزحمة، كلمة حلوة في شات، أو سؤال على زميل، أو خروجة خفيفة في وقت فراغ بتفكرنا إن ورا كل شاشة في إنسان زينا ليه مشاعره و ظروفه.
في النهاية العمر بيجرى بسرعة، واللي بيفضل في الذاكرة مش الإعلانات ولا المظاهر، اللى بيفضل هو الناس اللي هونت علينا الطريق، و اللحظات الصادقة اللي حسينا فيها إننا مش لوحدنا. الحياة المجتمعية لما بتكون مبنية على الصدق والرحمة بتتحول لبيت كبير يضمنا كلنا، مهما اختلفت ظروفنا.
تابع جديد هدى محمد
اختر إشعارات الموقع أو البريد أو الاثنين. الزائر يقدر يشترك ببريده دون تسجيل حساب.
الإبلاغ عن المقال
لو لاحظت مشكلة في المحتوى، أرسلها لفريق المراجعة. لن تظهر بياناتك لكاتب المقال أو للقراء.
تعذّر إرسال البلاغ الآن. حاول مرة أخرى لاحقًا.
سجّل الدخول لإرسال بلاغ

النقاش
التعليقات (0)
فكرة تضيفها، أو سؤال يفتح حوارًا.
الرجاء تسجيل الدخول لتتمكن من التعليق