صفقات نادي الزمالك 2025: هل هي بداية العودة للبطولات؟
في موسم الانتقالات الصيفية لعام 2025، قرر نادي الزمالك أن يقلب الطاولة على الجميع ويبدأ مرحلة جديدة من البناء الكروي تعتمد على الذكاء في الاختيار والطموح في التنافس على كل البطولات. النادي العريق دخل السوق بكل قوة وأبرم تسع صفقات رسمية حتى الآن، في خطوة وصفها البعض بأنها "ثورة تصحيح" تهدف إلى إعادة الفريق إلى منصات التتويج.
أول ما يلفت النظر في صفقات الزمالك هو التنوع بين الخبرة والشباب، وكذلك التوازن بين المراكز داخل الملعب، وهو ما يُحسب لإدارة الكرة وعلى رأسها المدير الرياضي جون إدوارد، اللي بيبان دوره بوضوح في كل صفقة تم التعاقد معها. جون أدوارد أثبت إنه مش بس بيدور على اسم أو شعبية، لكن بيختار اللاعب اللي يناسب طريقة لعب الفريق واحتياجاته، وده بيدل على ذكاء كبير في إدارة المشروع الرياضي.
نبدأ بالحارس المخضرم المهدي سليمان (38 سنة) اللي جاي يضيف خبرة كبيرة لمركز حراسة المرمى، ويمكن يكون عنصر دعم قوي للحراس الشباب. المهدي لعب في أندية مصرية كبيرة زي بيراميدز وسموحة، وجاي الزماللك ومعاه رصيد من الخبرات والمباريات الصعبة.
وفي مركز الهجوم، النادي ضم أحمد ربيع (24 سنة) لاعب موهوب بيمتاز بالقوة والسرعة، ومعاه كمان أحمد شريف (22 سنة) اللي كان بيلعب في غزل المحلة، وبيعتبر من أبرز المواهب الهجومية في مصر.
ومن اللاعبين اللي ممكن يشكلوا خطورة كبيرة على دفاعات الخصوم، انضم عمر ناصر (26 سنة)، بالإضافة إلى شيكو بانزا (26 سنة) اللاعب الكونغولي الدولي المعروف بسرعته ومهاراته. شيكو جاي من الدوري البرتغالي، وكان مطلوب في أكتر من نادي.
وفي خط الدفاع، الزمالك دعم صفوفه بـ محمد إسماعيل (26 سنة) مدافع قوي كان بيلعب في الداخلية، وكمان ضم عبدالحميد معالي (19 سنة) المدافع المغربي اللي يعتبر من أصغر الصفقات، لكنه واعد جدًا.
كمان النادي دخل بقوة في السوق العربي، وضم جناحين فلسطينيين هم آدم كايد (23 سنة) وعُدي دباغ (26 سنة)، اللي اتنين بيلعبوا على الأطراف وبيتميزوا بالمهارة والسرعة والقدرة على التسجيل وصناعة اللعب.
اللي يميز الصفقات دي مش بس السن أو الأسماء، لكن الأهم هو التناغم المتوقع بينهم، والقدرة على تقديم حلول مختلفة داخل الملعب. جون أدوارد هنا كان ليه بصمة واضحة، لأنه ركّز على اللاعبين اللي يقدروا يلبوا احتياجات الزمالك مش بس في الدوري، لكن في دوري أبطال أفريقيا وكأس مصر والسوبر.
والملاحظ كمان إن إدارة الزمالك ركزت على مراكز كانت بيعاني منها الفريق في السنوات اللي فاتت، زي الجناحين، والدفاع، والهجوم، وحتى حراسة المرمى. وبكده ممكن نقول إن الفريق بقى عنده توليفة قادرة على المنافسة.
لكن السؤال اللي بيدور في ذهن الجمهور: هل الصفقات دي كفاية عشان الزمالك ينافس على كل البطولات؟
الإجابة مش سهلة، لكنها مبشرة. الفريق بقى متكامل إلى حد كبير، وعنده عناصر خبرة وشباب، لكن اللي هيفرق هو الانسجام، وطريقة لعب المدير الفني، والحفاظ على الاستقرار داخل النادي. لو ده تحقق، الزمالك يقدر يرجع ينافس وبقوة.
وفي النهاية، لازم نقول إن الزمالك بدأ يتحرك في الاتجاه الصح، وعنده فرصة حقيقية إنه يرجع يقاتل على كل البطولات. وجمهور الزمالك مش طالب المستحيل، هو بس عايز يشوف فريق بيقاتل، وبيقدم كرة حلوة، وبيحترم تيشيرت النادي. ومع صفقات زي دي، وذكاء إداري من جون أدوارد، الحلم ممكن يبقى واقع.
