ما يريده الرئيس بوتين من اوكرانيا وحلف الناتو

صرح الرئيس بوتين عن اهدافه في الغزو الروسي علي اوكرانيا بعد اجتياحه لها ولجيشها دون مقاومه منهم وكان الغزو الروسي علي اوكرانيا بسبب ان اوكرانيا حاولت ان تنضم لحلف الناتو وهنا خشي رئيس روسيا فلاديمير بوتين من ان يكون مهدد من جانب حدود اوكرانيا وذالك يمس الأمن القومي لبلاده وهدد فنلندا والسويد علي ان من ينضم لهذا الحلف سوف ترد روسيا واول امس بعثت اعضاء من حلف الناتو اسلحه الي اوكرانيا لدعمها لمحاربه روسيا ولكن اصبح من الصعب مقاومه الجيش الأوكراني للجيش الروسي بعد ما اجتاح بلادهم فقد فات الأوان علي ذالك ودول الغرب يقفون وهم يشاهدون فقط خائفين من التدخل مكتفين بمشاهده فقط لان روسيا لديها حلفاء مثل الصين و كوريا الشماليه وقد صرح الرئس بوتين ان افضل قرار يمكن ان تتخذه اوكرانيا هوا ان تتخلي عن حلمها في الأنضمام لتحالف الأطلسي وقد كانت مساعدات روسيا لاكأوكرانيا علي مدار عقود تبلغ حوالي ١٥٠مليار دولار وقد حذر وزير القوات المسلحه البريطانيه من حرب سيموت فيها الاف اذا اجتاحت روسيا أوكرانيا لو أنت متعرفش الموقف الكارثي اللي بيحصل دلوقتي على الناحية التانية من الكوكب، فخليني أقولك إن روسيا حشدت قواتها على الحدود استعدادًا لغزو شامل لأوكرانيا، وأمريكا وحلف الناتو بيحضروا قواتهم هما كمان لما يمكن أن يكون بداية حرب عالمية تالتة هتغير شكل خريطة العالم كله!!

طب أيه اللي بيحصل بالظبط، وليه أصلًا روسيا عايزة تحتل أوكرانيا؟!.. أيه أصل الصراع اللي على وشك إنه يدخل الكوكب كله في دوامة من الخراب والدمار محدش شاف زيها قبل كده؟!

حضر كوباية شايك الحلوة والنعناع، وتعالى أحكيلك على التفاصيل من البداية، عشان تفهم العالم متوجه لفين دلوقتي ❤☕

***

ملحوظة: المقال ده هو (جزء أول) بيحكي عن تاريخ الصراع الجيوسياسي ما بين روسيا والغرب على أوكرانيا، وإزاي وصلنا للكارثة اللي احنا فيها دلوقتي.. ولسه هيتبعه جزء ثاني بكره بإذن الله في نفس الميعاد.

***

بص يا سيدي..

مبدئيًا عشان تفهم تطورات الموقف السياسي المعقد اللي حاصل دلوقتي، وليه هو وصل للي وصله ده، لازم نرجع مع بعض بالتاريخ شوية لورا، لعصر ما بعد نهاية الحرب العالمية الثانية.. تحديدًا سنة 1949..

في الوقت ده، كان الإتحاد السوفييتي USSR، اللي هو روسيا حاليًا، بيناطح في أمريكا على سيادة العالم.. وكانت في مخاوف أوروبية إن السوفييت ممكن يبدأوا يتحولوا لدولة فاشية زي ألمانيا النازية، ويتوسعوا في أوروبا ويحتلوا بلدان جديدة يضموها لإمبراطوريتهم الضخمة.. وعشان كده، الدول الأوروبية الفائزة في الحرب العالمية الثانية، قرروا إنهم يعملوا تحالف عسكري ضخم، ويبقى أساس التحالف ده هو تعاهدهم على إنهم يحموا بعض بجيوشهم كلها، لو أي دولة فيهم تم الهجوم عليها من أي طرف..

التحالف ده كان إسمه (منظمة حلف شمال الأطلنطي North Atlantic Treaty Organisation).. واللي تم اختصاره فيما بعد للإسم اللي كلنا عارفين دلوقتي.. حلف الناتو NATO..

وفي البداية.. الحلف ده كان بيضم 12 عضو تم تأسيسه على إيديهم.. الدول دي كانت: (الولايات المتحدة الأمريكية - كندا - بريطانيا - فرنسا - إيطاليا - النرويج - بلجيكا - هولندا - الدنمارك - البرتغال - لوكسمبورج - أيسلندا).. والدول دي مع بعض كانت قوة ضاربة صعب على أي دولة في العالم إنها تقف قدامها أو تتصدى ليها.. حتى لو كانت قوة عظمى ونووية زي الإتحاد السوفييتي..

فهل الروس كانوا هيسكتوا؟!.. لأ طبعًا..

الروس قرروا إنهم يعملوا هما كمان تحالف ضخم عشان يواجهوا به الناتو، ويحفظوا بيه مكانتهم في العالم.. ومحدش أحسن من حد.. ومن هنا اتكون (حلف وارسو Warsaw Pact) اللي ضم جواه دول شرق أوروبا الشيوعية كلها تحت لواء واحد، وخلاهم قوة ضاربة تحت قيادة الإتحاد السوفييتي..

ومن هنا بقى، كانت البداية الحقيقية لما يعرف بإسم عصر الحرب الباردة Cold War، ما بين روسيا ووراها حلف وارسو، والولايات المتحدة الأمريكية ووراها حلف الناتو..

والعصر ده مكانش فيه حرب عسكرية بالمعنى المفهوم.. نقدر نسمي الموضوع سباق ما بين الدول الكبرى، على أنهي دولة هتكون أعظم قوة في العالم.. والسباق ده كان مستمر في كل المجالات تقريبًا، سواء في التسليح النووي أو العسكري أو حتى سباق الوصول للفضاء، والهبوط على القمر.. وتفاصيل السباق ده كتير مش هنتكلم عنها دلوقتي لإنها مش موضوعنا.. خلينا ف المهم..

تعالى بقى دلوقتي ننط بالزمن لقدام، لحد سنة 1991..

السنة دي بقى كانت السنة اللي انهار فيها الإتحاد السوفييتي USSR، واتفكك لدويلات صغيرة، بعد سنين طويلة قضاها في صراعات الحرب الباردة مع الولايات المتحدة الأمريكية، قرب فيها العالم أكتر من مرة لكابوس الحرب النووية..

وبعد التفكك ده، حصلت فوضى ضخمة في شرق أوروبا، واتغيرت موازين القوة في العالم كله ناحية أمريكا.. وظهرت دول كتير جديدة ف شرق أوروبا، وانفصلت عن الإتحاد السوفييتي القديم.. وكان من بين الدول دي الدولة اللي احنا هنتكلم عليها النهارده.. أوكرانيا..

الدولة دي طول عمرها من ساعة ما بدأت، وروسيا نفسها ترجع تضمها تاني ليها.. وحسب كلام الرئيس الروسي فلاديمير بوتن Vladimir Putin، فهو شايف إن روسيا وأوكرانيا هما دولة واحدة وشعب واحد، وبيتكلموا لغة واحدة، والمفروض كانوا عمرهم ما ينفصلوا بعد انهيار الإتحاد السوفييتي..

وده طبعًا جزء من طموحات بوتن اللي سنه كبر وداخل على ال 70، وعايز قبل ما يسيب الحكم أو يموت، يحقق أكبر حلم كان بيحلمه من ساعة ما دخل الكريملين.. إنه يرجع تاني قوة ومهابة روسيا الكبرى، ويرجع زمن الإتحاد السوفييتي من جديد..

بس طبعًا، ومن ساعة ما الإتحاد السوفييتي إنهار، الولايات المتحدة الأمريكية وحلف شمال الأطلسي أو الناتو NATO انتهزوا الفرصة، وضموا دول كتير من الدول اللي كانت يومًا ما جزء من الإتحاد السوفييتي العظيم.. وده عشان يطوقوا الروس استراتيجيًا من كل الجوانب، ويوقفوا أي فرصة ليهم في إنهم يتوسعوا أو يرجعوا قوتهم العظيمة تاني.. ووصل عدد الدول المنضمة لحلف الناتو 30 دولة لحد دلوقتي.. نصهم تقريبًا من دول شرق أوروبا اللي هي كانت جزء من ال USSR زمان!!

طب وأوكرانيا؟!

أوكرانيا يا سيدي كانت في مفاوضات للإنضمام لحلف الناتو، بس لسه مبقتش عضو حقيقي.. هي مجرد حليف أو Partner للناتو.. وطبعًا ده كان مجنن فلاديمير بوتن اللي شايف إن أوكرانيا هي جزء من روسيا، وإنها عبارة عن ساحة روسيا الخلفية Russia's Backyard.. ف كان رافض الإنضمام ده شكلًا وموضوعًا، وبقاله سنين بيطالب أمريكا والناتو بضمانات إنهم عمرهم ما هيضموا أوكرانيا للتحالف، عشان دي مسألة أمن قومي بالنسبة لروسيا..

عايزين تحطوا قواتكوا على حدود البلد يا ولود الكلب؟!.. ليه هو أنا لطخ لا مؤاخذة؟! 😅

بس طبعًا أمريكا والناتو كانوا رافضين لأي تدخل روسي في المسألة، وشايفين إن الموضوع كله ف إيد الأوكرانيين، وهما اللي ليهم القرار سواء عايزين يبقوا جزء من التحالف ولا لأ.. وعلى هذا يا صديقي يبقى الوضع بقاله سنين طويلة..

طيب جميل أوي.. كده إحنا فهمنا ال Back Story بتاعت الصراع، وعرفنا أصل الموضوع جاي منين بالضبط.. تعالى بقى نعمل Fast Forward لقدام شوية، ونجري الأحداث والسنين لحد ما نوصل لسنة 2014..

في الوقت ده، أوكرانيا قامت فيها ثورة كبيرة ضد الحاكم بتاعهم، اللي هو كان إسمه (فيكتور يانوكوفيتشViktor Yanukovych)..

طب ليه ثورة؟!

عشان الرئيس ده يا سيدي كان متحالف مع فلاديمير بوتن Vladimir Putin رئيس روسيا، وكان مؤيد لفكرة إن أوكرانيا هي جزء من روسيا، وكان رافض تمامًا لفكرة إن أوكرانيا تنضم لحلف الناتو.. وطبعًا الشعب مكانش عايز كده.. وفي شوية حاجات تانية بردو كانت مضايقة الناس منه، بس مش موضوعنا.. المهم إن الثورة قامت والرئيس ده اتشال، وجابوا مكانه رئيس تاني قلبه على أوكرانيا وشعبها..

قوم أيه بقى؟!.. فلاديمير بوتن يتجنن، ويحرك الجيش الروسي عشان يضم (شبه جزيرة القرم Crimea) اللي هي جزء من جنوب أوكرانيا، لروسيا!!

طبعًا العالم وقتها اتقلب، وأمريكا وحلف الناتو اتجننوا هما كمان، وقرروا ينشروا قواتهم الدولية متعددة الجنسيات لأول مرة، في كذا بلد شرق أوروبي قريبين من حدود روسيا، زي بولندا ورومانيا وإستونيا ولاتفيا وليتوانيا.. وبدأوا يدعموا أوكرانيا استراتيجيًا..

ومن هنا بدأت حرب شوارع في جنوب أوكرانيا ما بين ميليشيات مسلحة مؤيدة لروسيا، بتدعمها روسيا بالطيران والسلاح، وما بين الجيش الأوكراني المدعوم من الغرب.. حرب راح ضحيتها أكتر من 14 ألف شخص لحد دلوقتي..

طبعًا فلاديمير بوتن كانت دماغه متربسة في الموضوع ده، وراسه وألف جزمة إنه يوقف التوسع الغربي لحلف الناتو في المناطق ذات الأهمية الإستراتيجية لروسيا.. وقال إن الناتو وعدوا زمان سنة 1990، قبل انهيار الإتحاد السوفييتي بسنة، إنهم مش هيتوسعوا خالص في شرق أوروبا.. بس نقضوا وعدهم ده بمجرد سقوط ال USSR، وفتحوها سبيل لأي كلبة معدية 😅 وهتلاقي خريطة تحت في أول كومنت 👇 توضحلك قد أيه الناتو توسع في شرق أوروبا بعد سنة 1991..

بس الناتو أنكروا وعدهم بأي حاجة، وقالوا إنه محصلش نقاش في المسألة دي من الأساس قبل كده..

وهوب ننط لقدام تاني لوقتنا الحالي سنة 2022، هنلاقي إن أوكرانيا بتخطط بالفعل للإنضمام للناتو، ضاربين بكلام فلاديمير بوتن عرض الحائط.. وبالتالي بدأ الأخير ينشر عدد خزعبلي من القوات يقدر ب 100 ألف مقاتل على الحدود مع أوكرانيا، ده غير 30 ألف كمان موجودين في بيلاروسيا حليفة روسيا اللي على حدود أوكرانيا من الناحية التانية.. والمرة دي واضح جدًا إن الكلام مش تهديد، لإن الإستعدادات وتقارير أجهزة المخابرات الأمريكية والأوروبية كلهم بيأكدوا إن الحرب ممكن جدًا تقوم، ومحدش عارف يتوقع ولا يتخيل أيه اللي بيدور جوه دماغ بوتن!!

ف ياترى أيه اللي ممكن يحصل، والحرب لو قامت هتقوم إزاي، وهل هتقدر أمريكا والناتو إنهم يوقفوا الطموح الروسي، ولا شرار المعركة خلاص انطلق بالفعل؟!

وأيه مدى تأثير حرب محتملة زي دي على روسيا وأمريكا، والعالم كله؟!

هو ده اللي هنعرفه في الجزء الثاني من المقال بكره بإذن الله، واللي هيكون مصحوب بفيديو مصور هينزل بكره على Cairo Time.. ف لحد وقتها خليكم مستنيين ❤

ولو الجزء ده عجبكم، وقدر يلخصلكم أصل الصراع وأيه اللي بيحصل دلوقتي بالضبط وجذوره ممتدة لفين، فحابب أفكركم إنه نتاج مجهود عقلي وزمني كبير وطويل.. فلو حابب تدعمني، ممكن تعمل ده من خلال الشير للبوست، والمنشن لصحابك وحبايبك يقرأوه معاك ويسيبوا رأيهم  المحتوى لناس أكتر، فمتبخلش به لو شايف المجهود يستحق ❤

ودي بعض المصادر لو عايز تتابع الموقف لحظة بلحظة 👇
https://www.bbc.com/news/world-europe-5672