علاقات زوجية: ازاي تصالح مراتك؟
في محاضرة لمعالجة العلاقات الزوجية يحضرها رجال و نساء، وقف المحاضر يسأل:
لو انت كزوج زعلت مراتك تصالحها و تسترضيها ازاي؟؟؟؟
كل راجل جاوب اجابة من دول :
١) اكلم معاها و اشرحلها وجهة نظري و اقولها حقك علي انت صح
٢) افكرها بالايام الحلوة اللي بيننا و اراضيها و اقولها اني بحبها و ما اقدرش استغنى عنها
٣) اغني لها الاغنية بتاعتنا و اروح استناها قدام شغلها و في ايدي ورد و اخدها اليوم دة اغديها برة و اكسر روتين حياتنا عشان تحس اني سايب الدنيا عشانها
٤) اعملها زي شباب اليومين دول و اقف اغنيلها و ابعت لها رسايل حب و احضر مفاجأة كبيرة لها و اصورها و انزلها عالفيس بوك عشان تلم likes بالهبل و تبقى مبسوطة
المحاضر قرأ كل الإجابات وسط تنهدات السيدات و ابتسامات الرجال لغاية ما وصل لرجل في الثلاثينات من عمره و لقى ورقته فاضية ما كتبش حاجة!!!! المحاضر سأله قاله ما جاوبتش ليه؟؟؟؟ مش ناوي تصالح مراتك لو زعلتها؟؟؟؟ طبعاً جملة زي دي خلت كل الموجودين مترقبين ..
الرجالة خايفة أنه يقول حاسيبها تنفلق و هم كدة يطلعوا رومانسيين و حبيبة و الستات، مترقبة عشان لو غلط في مراته ياكلوه مع انهم ما يعرفوهاش….
بعد لحظات صمت الشاب اتنهد و قال للمحاضر :
( تعرف حضرتك انا بحب مراتي اوي اوي و عمري ما عرفت اصالحها) طبعاً الاجابة لم تلاقي استحسان الحاضرين و ابتدى الغمز و اللمز حتى المحاضر بدا يتأفف و يستعد للسؤال المتوقع و عايز يقوله امال انت جاي ليه!!!!!!! وقبل ما يسأل بدا الشاب تاني يتكلم ويقول :
انا مراتي قبل ما اتجوزها كانت حلم جميل بحلم أوصله و يوم لما فاتحتها في الإرتباط و ابتدت تديني أمل كنت حاسس اني ملكت الدنيا و يوم خطوبتنا كان قلبي حيقف من السعادة و حاسس اني باحلم و يوم الفرح و انا ماسكها و بارقص بيها كنت شايفها اجمل ست في الكون و ان كل اللي حواليا حاسدني عليها و على حبها ليا... لغاية بعد الجواز بكام شهر كنا بنختلف كتير و نغضب كتير بس كانت هي بتستحمل و تصبر و تسامح لغاية ما خذلتها و اتخليت عنها مرة، و كانت اول مرة تثور علي لانها حست بعدم الامان و ابتدت تتغير معايا بقت عنيفة عصبية ردودها مش حنينة بقت بتنجح في شغلها عشان تعوض احساسها بالفشل في حياتنا لغاية ما مرة قالتلي أنا مش شايفاك، و انت مش فارق معايا صهينت و طيبت خاطرها بكلمتين و سيبتها تهدي.... بعدها بمدة مش كبيرة حصلت مشكلة كبيرة مراتي اللي كانت واثقة فيا خذلتها للمرة التانية بس هي المرة دي ما ثارتش ما قالتش لحد بطلت تتكلم و تحكيلي حاجة بقى التعامل بيننا في الحاجات اللي تخص ولادنا بس و ابتدت تبعد.....
أنا بصراحة قلت طالما في البيت و الاولاد كويسين يبقى فترة و تعدي و صحيت بعدها بأسبوع على أحزن يوم في حياتي مراتي ما بتردش علي و ساقعة متلجة..... ماتت و هي نايمة جنبي و ما حستش بيها زي ما كانت عايشة معايا و ما حسيتش بيها و فهمتها....
ماتت و هي نفسها تعمل حاجات كتير أنا مش عارفها.... أنا أما شوفت صحاب و زمايل مراتي في العزا و حزنهم عليها و الكلام الحلو اللي بيتقال عليها حسيت قد ايه أنا عشت غافل عن نعمة كبيرة كانت معايا.....
انسانة كانت تتمنالي الرضا ارضى بس انا خذلتها انسانة كان نفسها تعمل كل حاجة معايا بس انا سيبتها لوحدها....
واحدة كانت بتحبني و بتحب اهلي بس كنت اناني ما حبيتش غير نفسي و شكلي و بس. ..... عرفت ليه ما عرفتش اجاوب لاني لو كنت تعبت نفسي و فكرت ايه اللي يرضيها و عملته يمكن ما كانتش اتقهرت يمكن ما كنتش اكتئبت و خبت عالناس كلها انها مش سعيدة معايا.... لو كنت فهمتها. .. انت عارف انا جاي هنا ليه لان هي ياما اتحايلت علي نيجي هنا عشان نقرب من بعض..... لو رجعتلي تاني حتعرف عليها و اعرف تفاصيل حياتها عشان اعرف اسعدها.... مش حاضحك لما الاقيها بتتفرج على king kong و بتعيط او ازهق و هي بتشوف (تيمور و شفيقة) للمرة المليون او حخليها تشغل الاغاني اللي بتحبها و ترقص عليها من غير ما اقولها ايه الهبل دة...... حعملها كل اللي نفسها فيه بس هي ترجع تاني)
المحاضر سكت و كل اللي قاعدين اتاثروا في منهم دموعه غلبته و فيهم اللي صوت بكاها كان مسموع.... وقف المحاضر و قالهم دي اجابة سؤال النهاردة لما تزعل مراتك صالحها بالطريقة اللي بتحبها حتى لو انت شايفها طريقة تافهة بس هي حتشوفها منك اهتمام.... صالحها و ما تنطش نظرة الحزن اللي في عينها طالما شايفها بتكلم و مش عاملة نكد..... خليك زوج ذكي و اوعى تفقد ثقة مراتك لان الست لما تفقد ثقتها في جوزها بينزل من نظرها و بتحس انها ضيعت عمرها مع الشخص الغلط بالنسبة لها..... خليك ذكي.....
