اهم الكتب التي ستندم أن لم تقراءة قبل سن الثلاثين ؟
اهم الكتب التي ستندم أن لم تقراءة قبل سن الثلاثين ؟
يوجد العديد من الكتب المرشحة للقراءة من أكثر من متخصص يجب ان تقرأ هذه الكتب قبل سن ال ٣٠ عام .
يعتبر ده تجميعة بوستات كتبتها السنين الي فاتت، وأنا ليا وجهة نظر مختلفة في الكتب، انا مش بهتم بالكم على قد ما بهتم بالكيف ودايما بكرر ، أن تقرأ كتابا مرتين خير من أن تقرأ كتابين .
الكتب بالنسبالي مش حل سحري، إنما بتديك وجهة نظر للكاتب في حل مشكلة معينة أو توضيح لأمر معين .
عشان كده ممكن أشتري وأقرا كتاب كامل عشان فصل واحد أو طريقة لتناول موضوع معين، أو طريقة تفكير في مجال معين، فالكتاب والكاتب بيعملوا تركيبة خاصة .
عشان كده هرشح أهم الكتب المرتبطة بالتطوير الشخصي والإدارة والتسويق والمبيعات .
وحاولت أختار الكتب المترجمة للعربي عشان تكون أقرب للكل، وإلا فالكتب الي بالانجليزي كتير ومش كلها متوفرة في السوق المصري .. عموما يلا بينا .
الكتب الدينية:-
*أهم كتاب عليك إنك تقراه في الحياة، هو كتاب الله تعالى فيه الهدى والنور لحياتك ونجاحك في كل محور من محاور حياتك .
لكن بسبب بعدنا عن لغة القرآن وضعف علمنا بشكل عام .. بقترح عليك إنك تقرا القرآن بتفسير مبسط يشمل جوانب عقدية وفقهية وسلوكية ، وأفضل التفاسير وأبسطها في الجانب ده ، تفسير الشيخ عبدالرحمن بن ناصر السعدي رحمه الله اسم التفسير "تيسير الكريم الرحمن" ومعروف باسم تفسير السعدي .
* وتاني أهم الكتب الي لازم تقراها هي سنة النبي صلى الله عليه وسلم .. الي هي المصدر التاني للوحي .
وأهم الكتب الي جمعت سنة النبي صلى الله عليه وسلم بطريقة تجمع العلم والفقه والسلوك بشكل ممتع ومفيد وصحيح .
كتاب رياض الصالحين للإمام النووي رحمه الله صاحب العلم والفقه ،وأفضل الشروح عليه، هو شرح الشيخ محمد بن صالح بن عثيمين رحمه الله .
* وتالت أهم الكتب كتب العقيدة الصحيحة، كتاب الشيخ حافظ الحكمي رحمه الله صاحب الكتب النافعة بطريقة مختصرة ومبسطة وواضحة وبالأدلة الصحيحة .
كتاب أعلام السنة المنشورة أو مشهور باسم "٢٠٠ سؤال وجواب في العقيدة الإسلامية" ليه طبعات كتيرة اختار منها الي يناسبك.
* ورابع أهم الكتب عشان تمشي في حياتك صح كتب الفقه بدون تعصب ومبنية على الفقه الصحيح بأدلته .
وأبسطهم كتاب "الملخص الفقهي" للشيخ صالح الفوزان حفظه الله ، كانت عبارة عن حلقات بيعملها في الإذاعة، كتبها بطريقة مبسطة جدا وفيها توجيهات معاصرة جميلة ليه طبعات كتيرة .
كتب التنمية الذاتية :-
*أفضل الكتب على الإطلاق هو كتاب "العادات السبع للناس الأكثر فعالية" ل ستيفن كوفي .
كتاب فيه حكمة وبصيرة ممتاز جدا بيتكلم عن العادات الي المفروض تكون عند الي عايز ينجح نجاح كبير في حياته ومليان بالأمثلة والقصص المفيدة الممتعة .
* واحد من أجمل وأقوى الكتب الي قريتها في حياتي عن أهم عنصر من عناصر القوة في حياتنا .
كتاب "العزيمة" ل أنجيلا داكورث ، هي عالمة نفس قضت أكتر من ٢٠ سنة من عمرها في أبحاث خاصة بالعزيمة .
العزيمة هي العامل الحاسم في نجاح الناجحين ، لإننا مهما كانت قوتنا وموهبتنا، محتاجين للعزيمة عشان نقدر نكمل في الحياة الصعبة الي بنعيشها .الكتاب ممتع ومبسط .
* واحدة من أهم المهارات في الحياة الي بنحتاجها كلنا مهارة الإقناع، ومن أهم الكتب كتاب عم الإقناع في العالم روبرت سيالديني "التأثير" كتاب مهم جدا.
* أهم كتاب بيتكلم عن الطريقة الي بنفكر بيها، لأستاذ علم النفس وأحد مؤسسي علم الاقتصاد السلوكي دانيال كانمان وكتاب "التفكير السريع والبطيء" .
* الي عايز يكتسب عادات صحية جديدة بشكل مبسط وعملي يقرا كتاب "العادات الذرية" ل جيمس كلير .
* قيادة التغيير .. كتاب بيتكلم عن الكيفية الي يقدر بيها المديرين إنهم يقودوا التغيير والتكيف مع الظروف الصعبة الي بتقابل المؤسسات .. لأستاذ أساتذة القيادة والتغيير في العالم .. جون كوتر .. الكتاب للمتخصصين في القيادة في الشركات المتوسطة والكبيرة .
* كتاب ذكاء المبتدئين للكاتب ليز وايزمان .. ممتاز بيتكلم عن اهمية التعلم في بناء قوة الإنسان في العمل .. وازاي تقدر تحقق نتايج استثنائية بيه .
كتب ادارة المشاريع والتسويق له بشكل احترافي :-
* من صفر لواحد .. كتاب بيتكلم عن كيفية صناعة المستقبل وابتكار افكار لشركات جديدة عن الموجودة في السوق .
للكاتب لبيتر ثيل ، واحد من مؤسسي باي بال وأول رئيس لها واوائل المستثمرين في فيسبوك لكل الراغبين في تأسيس شركات جديدة تعمل فرق .. مناسب للمتخصصين شويه .
* من جيد إلى عظيم للكاتب جيم كولينز ، ترجمة جرير الكتاب ده واحد من الكتب الي شكلت ثقافة مديرين الشركات في العصر الحديث .
*كتاب التسويق للجميع تاليف علاء حيدر = سهل ، لو عاوز تعمل بيزنس صح مبني على آراء العملاء وتتعلم التسوق لمشروعك من البدايه .
الكتاب غني بالحالات العملية من السوق والحياة المصري والعربي ، وأحدث استراتيجيات التسويق للمنتجات والخدمات (مناسب للمتخصص وغير المتخصص). موجود بالمكتبة العربية للنشر والتوزيع صالة ١ جناح B48
* كتاب استراتيجية المحيط الأزرق كتاب استراتيجي ومهم جدا لأقصى درجة، ازاي تقدر تعمل ميزة تنافسية بعيد عن المنافسين، وتقدر تطبقها على أرض الواقع .
* مجموعة كتب Harvard Business Review .. خد لفة في عناوين الكتب والي تحس انك محتاجه اشتريه .
في كتب ممتازة ومألفها الأساتذة وبشكل مختصر ومفيد جدا ، زي( قياس الأداء .. اتخاذ القرارات .. إدارة الاجتماعات .. إعداد موازنة .. كيف تعد خطة عملك .. قيادة فريق العمل .. تطوير عمليات الأعمال .. إدارة التنوع .. كيف تدرب الموظفين .. تطوير الموظفين .. إدارة المشاريع .. فصل الموظف عن العمل .. عندما تصبح مديرا جديدا .. التعامل مع الضغط ) .
خلاصة الكلام:-
دي كتب عامة ومهمة ومفيدة في مجالات عامة هتفرق معاك في حياتك وتخليك إنسان أفضل ، وأحب أفكرك بحاجة .
القراءة ملهاش لازمة من غير تطبيق ، العمل بيثبت العلم وبيزوده .
زي ما قال أمير المؤمنين .. علي بن أبي طالب رضي الله عنه: "هتف العلم بالعمل .. فإن أجابه وإلا ارتحل" .
يعني لو مشتغلتش بالعلم الي اتعلمته هيروح منك، و في كلمة مشهورة "من عمل بما علم .. رزقه الله علم ما لم يعلم" .
دي بتنطبق على العلوم الشرعية والعلوم الدنيوية .
وحابب أفكرك بحاجة كمان ممكن بعض الكتب يكون سعرها غالي، لكن الاستثمار في العلم هو أهم استثمار تعمله في حياتك ، لإن العلم هو الي بيعمل الفرق الحقيقي الي بيحصل في تفكيرك ونتايجك.
أتمنى تكون مجموعة الكتب دي مفيدة للجميع
ربنا يعلمنا ما ينفعنا، وينفعنا بما علمنا ، إنه على كل شيء قدير.
