غزو السعودية والقصف الجوي وزيارة لدولة الكويت

- السعودية بقالها فترة طويلة بتتعرض للقصف الجوى.. كان أغلب الهجمات بتنفذها طيارات بدون طيار.. لكن أخطر قصف جوى فيهم.. كان الأخير.. واللى استهدف منشآت نفطية بصواريخ باليستيه.. حضرتك تقولى ليه أخطرهم؟.. ما زيه زي غيره.. أقولك لأ الفرق كبير.. وخلينى أشرحلك..

- قبل القصف الجوى الأخير.. بأربع أيام.. وزير الطاقة السعودى زار الكويت علشان يبدأ مع الكويت تطوير حقل نفط اسمه "آرش أو الدرة.. آرش بالايرانى والدرة بالخليجى.. حضرتك تقولى هو ليه الحقل ده ليه اسمين.. واحد ايرانى والتانى خليجى.. أقولك ما هى دى القصة.. الحقل ده قبل ما أحكيلك حكايته.. خلينى أقولك ان فى بطنه 11 تريليون قدم مكعب من الغاز.. وأكتر من 300 مليون برميل نفط.. حاجه كده فى وسط أزمة الطاقة اللى بنعيشها اليومين دول وحرب روسيا وأوكراينا.. تقدر توصفها بمنجم الدهب.. زبادى خلاط مش بالمنجه.. ده بالفواكه كلها.. 

- أيوه برده يعنى الحقل ده قصته ايه؟.. الحقل ده اكتشفوه فى الستينات.. ومشكلته ان كل حته منه فى مياه اقليمية لدولة مختلفة.. يعنى حته منه فى السعودية وحته فى الكويت وحته فى ايران.. والتلات دول مبيحبوش بعض.. لا ايران بتحب السعودية والكويت.. ولا الكويت والسعودية بيطيقوا ايران.. ففضل الكل متجاهل حقل النفط ده علشان المشاكل..

- لكن تيجى ايران سنة 2015 وتعلن انها هتبدأ فى تطوير الحقل علشان تشوف جواه ايه وتبيعه وتلم فلوس.. لكن تقريبا اعلان ايران فى 2015 كان مجرد جس نبض.. لأنها معملتش حاجه.. لكن تيجى فى 2016 وتبدأ فعلا تشتغل على الحقل ده.. فتحصل مشكلة دبلوماسية كبيرة جدا بينها وبين السعودية والكويت.. اللى هو انتى رايحه فين.. امشى العبى بعيد.. 

- تلف الأيام وتدور.. ونيجى فى سنة 2019 وتقعد الكويت مع السعودية ويتفقوا ان هما اللى يطوروا حقل النفط ده.. لكن برده ميحصلش حاجه.. لحد يوم الاتنين اللى فات.. اللى هو قبل 4 أيام بس من عمليات القصف الجوى لمخازن شركة أرامكو السعودية.. ايه اللى حصل؟.. اللى حصل هو ان وزير الطاقة السعودى زار الكويت علشان يفعل مشروع تطوير حقل النفط ده.. ايران تتكلم؟.. لأ متكلمتش.. كل اللى حصل ان جماعة الحوثى المدعومة من ايران فى اليمن.. طلعت يوم الجمعه بليل.. يعنى بعد الاتفاق ده بـ 4 أيام.. ضربت مخازن شركة ارامكو بالصواريخ.. وتانى نقول صواريخ باليستية.. مش أى صواريخ.. حد جاب سيرة حقل الدرة أو آرش زى ما الايرانيين بيسموه؟.. محدش جاب سيرته.. لحد تانى يوم عمليات الصقف.. اللى هو السبت 26 مارس 2022.. تطلع ايران بيان رسمى تنتقد فيه اتفاق السعودية والكويت على تطوير حقل النفط ده.. 

- ببساطة وبالبلدى كده ايران بتلعب مع السعودية لعبة الترهيب والترغيب.. الأول بتثبت لها ان اديها طايلاها وطايله مخازنها النفطية فى قلب المملكة.. وبعدها بيوم واحد.. تطلع ببيان دبلوماسي تنتقد فيه تعدى السعودية على حقها فى حقل النفط المشترك ما بينهم..

- يخلص الموضوع هنا؟.. الإجابة طبعا لأ.. لأن مشاكل ايران مع السعودية لسه منتهتش.. من فترة قريبه السعودية عملت حركة ضايقت أمريكا ودول الغرب بشكل عام.. ووجعت قلب ايران بشكل خاص.. ايه هى الحركة دى؟.. هقولك..

- من فترة السعودية أعلنت انها قبضت على 81 عنصر من جنسيات مختلفة.. يمنيين وسوريين وسعوديين.. واتهمتهم بالإرهاب.. حلو كده؟.. تقولى حلو.. أقولك لأ مش حلو.. لأن السعودية أعدمتهم كلهم.. حضرتك تقولى طيب ما أكيد اللى حصل ده كان بأحكام قضائية.. يعنى الناس دى ارتكبت جرايم تستحق الحكم ده.. أقولك طبعا ممكن.. لكن المشكلة بالنسبة لإيران.. ان كان من بين اللى اتحكم عليهم بالإعدام.. 41 شيعى.. والشيعه بالنسبة لإيران خط أحمر.. مفيهوش هزار.. تقولى طيب عرفنا ليه ايران مضايقه.. امريكا والغرب مضايقين ليه؟.. أقولك لأن منظمات حقوق الانسان.. كدبت التصريحات السعودية وقالت ان الناس دى ملهمش علاقة بالإرهاب.. كل اللى حصل انهم اشتركوا فى مظاهرات حقوقية ضد النظام السعودي.. فالسعودية اعتبرت ان اللى عملوه محاولة للمد الشيعى فى المملكة.. وبناء عليه حكمت عليهم بالأحكام اللى ذكرناها..

- حد من حضراتكم يقولى بس شركة أرامكو السعودية طلعت وقالت ان القصف الجوى كان بسيط ومكنش فى خساير بشرية.. عادى يعنى.. أقولك ان ورغم تعاطفى مع الشعب السعودى.. حقيقى ربنا يكون معاهم.. إلا إننا لازم نعترف بالمشكلة علشان نقدر نتعامل معاها ونحلها.. القصف مكنش بسيط.. خالص.. السعودية النهاردة بتتعرض لقصف جوى بالصواريخ الباليستية فى قلب المملكة.. يعنى مش قذيفتين هاون على الحدود فى الصحراء.. بقول لحضرتك صواريخ باليستية بتضرب مخازن بترول فى قلب المدن.. وخلينى أحكيلك مشهد غالبا محدش حكهولك.. 

- كورنيش مدينة جده.. بتقام فيه المسابقة العالمية فورميلا 1.. عادى جدا تمام مفيش حاجه.. لكن اللى مش عادى.. هو ان وخلال تدريبات المتسابقين قبل البطولة.. واحد منهم وهو جوه عربيته شم ريحة دخان.. فكلم الفريق بتاعه فى اللاسلكى وسألهم.. هى عربيتى بتتحرق؟.. ردوا عليه وقالوا لأ.. السعودية هى اللى بتتحرق.. انت متخيل المشهد؟.. احنا بنتكلم عن أبطال العالم فى سباق الفورميلا.. اللى خلاص بيجهزوا علشان البطولة.. يشوفوا القصف الجوى للسعودية بعنيهم.. لايف.. حضرتك تقولى للدرجة دى القصف الجوى كان قريب من مكان البطولة؟.. أقولك ان المخازن اللى انضربت بينها وبين مكان البطولة فى مدينة جدة.. كام كيلو بس.. ومن شدة الانفجار اللى حصل والدخان اللى طلع من الحرايق.. الدخان وصل للمكان اللى بتقام فيه بطولة فورميلا 1.. وهنا حضرتك تسأل سؤال مهم؟.. هو لما مكان البطولة قريب أول كده من مخازن البترول.. ليه ايران أو جماعة الحوثى يعنى.. مضربتش مكان البطولة نفسه.. خصوصا ان حاجه زى دى هتسمع دوليا أكتر.. وهتوجع الحكومة السعودية أكتر وأكتر..

الناشر :مصعب سعيد