هو انا عندي قرين
هو أنا عندي قرين؟!
يعني فيه شيطان جنبي دلوقتي قاعد معايا في أوضتي شايفني وبيتابع كل تحركاتي؟!
خليني اصدمك واجاوبك وأقول لك: أه.
فيه شيطان جنبك دلوقتي، بل إن الشيطان دا يا عزيزي هيفضل جنبك مدى الحياة، بيلزق فيك من أول ما تتولد لحد ما تروح على قبرك.
بس قبل ما نبدأ، عاوزك تركن كل المؤلفات وأي حاجة جت في دماغك دلوقتي عن القرين، وتعالى أقول لك الحقيقة العلمية والدينية كاملة من غير أي هبد وكلام يخوف وخلاص.
أنا هنا علشان اعرفك حقيقة اتلوثت بآلاف المؤلفات عبر التاريخ، حقيقة لها أصل ديني، ولازم تصحح مفاهيمك عنها.
جاهز؟!
يلا بينا.
بص يا سيدي، القرين زي ما إنتَ عارف، علميًا أو دينيًا هو شيطان النفس اللي بيكون موجود مع الإنسان في الأرض.
ربنا -سبحانه وتعالى- ذكر الجن في القرآن، ودا دليل على وجوده معانا على الأرض، والشيطان من فصيلة الجن، ولكنه وصل لمرحلة من الكـ* ـفر كبيرة خد بسببها لقب شيطان، وكلمة شيطان بتتقال لكل متمرد مفسد، ولأن (إبليس) تمرد على الله -عز وجل- اتسمى شيطان، واتلعن في الكتاب.
والشيطان يا عزيزي واخد عهد على نفسه إنه يوسوس للإنسان ويتسبب في ارتكابه للمعصية ويغويه، (قَالَ رَبِّ بِمَا أَغْوَيْتَنِي لَأُزَيِّنَنَّ لَهُمْ فِي الْأَرْضِ وَلَأُغْوِيَنَّهُمْ أَجْمَعِينَ (39) إِلَّا عِبَادَكَ مِنْهُمُ الْمُخْلَصِينَ (40)) سورة الحجر.
والطريقة للتخلص من الشيطان هي الاستعاذة والحذر منه زي ما اتذكر في القرآن والأحاديث النبوية وأقوال العلماء.
الإمام (ابن القيم) قال:
(أعلم أن لفظ عاذ وما تصرف منها يدل على التحرز والتحصن والنجاة، وحقيقةً معناها الهروب من شيء تخافه إلى من يعصمك منه، ولهذا يسمى المستعاذ به معاذًا كما يسمى ملجأ ووزرًا).
وقصده هنا إن الاستعاذة هي الالتجاء والاعتصام بالله من الشيطان.
الإنسان من بداية الخلق وهو نفسه غير سوية، مليان شوائب، بيُخطئ كتير، ملئ بالشهوات، ودا كان السبب الأساسي في صعوبة الامتحان من الله -سبحانه وتعالى-.
ربنا من بداية الخلق قال إن الشيطان لك عدو مبين، لازم تحذر منه، هو السبب في خروج سيدنا (آدم) -عليه السلام- من الجنة، وقالها صراحةً لربنا إنه هيغوينا ليوم الدين، وربنا حذرنا منه كتير، (يَا أَيُّهَا الَّذِينَ آمَنُوا ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُّبِينٌ (208)) سورة البقرة.
ربنا خلق للإنسان رفيق، قرين من الشيطان، يلازمه دايمًا ويحاول يوسوس له على ارتكاب المعصية، وخلي بالك وفرق بين القرين اللي مُسلط عليك ليك وحدك، وبيكون مع كل إنسان على وجه الأرض قرين، وبين الشيطان المكلف من (إبليس) في غواية البشر، دا حر طليق يغوي أي شخص هو يختاره، ولكن القرين دايمًا لازق فيك.
والقرين ميقدرش يأذيك أذى نفسي أو جسدي، مينفعش يتسبب لك في مس، بل هو مجرد وسواس في عقلك، ومينفعش تشوفه مهما مر من حياتك، هيفضل مختفي ولكنه موجود، ويُقال إنه ميقدرش يبعد عنك أكتر من 800 متر.
الرسول -صلى الله عليه وسلم- قال، حديث ورد في صحيح مسلم:
(- ما منكم من أحدٍ إلا وقد وُكل به قرينه من الجن.
قالو:
- وإياك يا رسول الله؟
قال:
- وإياي إلا أن الله أعانني عليه فأسلم فلا يأمرني إلا بخير).
يعني الرسول -صلى الله عليه وسلم- بنفسه له قرين، شيطان ملازمه، ولكنه مسلم بأمر من الله وبيأمره بالخير، ولكن قرين باقي البشر كافـ* ـر.
في يوم الرسول -صلى الله عليه وسلم- خرج بالليل وساب السيدة (عائشة)، ولما رجع لقاها غضبانة منه، فسألها:
- أغيرتي يا عائشة؟!
قالت:
- ومن لا يغار على مثلك.
فقال لها:
- أجاءِك شيطانك؟!
قالت:
- ألي شيطان؟!
قال:
- نعم، ما من ابن آدم إلا وله شيطان، حتى أنا لي شيطان فأعني الله عليه فأسلم، فأصبح يأمرني بالمعروف وينهاني عن المنكر.
والقرين أحيانًا بيكون سبب في عدم التوبة.
شخص ارتكب معصية وقرر يتوب إلى الله، القرين دايمًا بيفهمه في عقله إن ذنبه لا يُغفر، وبيبصم على قلبه بالشر وبيقنعه، فيستمر الشخص في ارتكاب المعاصي.
القرين شيطان، ضعيف، ولكنه مبيبعدش بالاستعاذة زي باقي الشياطين، هيفضل لازق بيك مهما حصل، وبتنتهي مهمته بموتك.
القرين شيطان كل مهمته إغوائك وإضلالك، وميقدرش يتدخل في قدرك أو يغير في حياتك تغيير مادي، زيه زي أي شيطان، وكل ما إيمانك ضعف كل ما قوة القرين زادت، ولو إيمانك قوي هو بيكون ضعيف جدًا وواهن وصعب يوسوس لك.
(ابن عثيمين) قال إن القرين ربنا بعته للإنسان وسلطه عليه اختبار له، يأمره بالفحشاء وينهيه عن المعروف، علشان يشوفه هيتبع الشيطان ولا هيتمسك بمغفرة الله، (الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ ۖ وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ (268)) سورة البقرة.
والعبد الصالح اللي قلبه نقي وصادق هو اللي يقدر يتغلب على القرين، (وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ ۖ إِنَّهُ هُوَ السَّمِيعُ الْعَلِيمُ (36)) سورة فصلت.
تمسك بربك والجأ له والقرين هيكون دايمًا ضعيف، ومعنى نزغ الشيطان إنه يأمرك بفعل معصية، فعلشان كدا ربنا بيقول نستعذ بيه من الشيطان عمومًا، حتى من نفسك الأمارة بالسوء استعذ بربك وهو هينجيك.
لازم تعرف يا عزيزي إن ربنا مخلقش إنسان إلا وخلق معاه قرين، ملازم البشر في كل شيء، أكل، شرب، نوم، كل حاجة في حياتك هو موجود فيها، بيوسوس لك دايمًا ترتكب المعاصي، ومينفعش تشوفه، والدجالين اللي قالوا لك إن القرين بيمسك أو بيأذيك أو بيسحرك بيكدبوا عليك، هو ممكن يُستخدم في إن الدجال يعرف عنك أخبار أو معلومات، وفي 50% من كلامه بيكدب ومبيقولش الحقيقة كاملة.
يعني هو جنبك دلوقتي؟!
أه جنبك، وشايف الكلام دا وبيقرأ معاك، وممكن يكون بيوسوس لك دلوقتي حالًا، وهيفضل جنبك ومعاك لحد ما تموت.
بس متخافش، عمرك ما هتشوفه، وعمره ما يقدر يأذيك، أقصى حاجة ممكن يعملها إنه يوسوس لك بذنب ومعصية.
-
وآخرًا كلها اجتهادات من العلماء في تفسير كتاب الله، والله أعلى وأعلم بصحتها.
-
المصادر:
القرآن الكريم.
صحيح مسلم.
ابن القيم.
ابن عثيمين.
