لي بنفكر كتير قبل وقت النوم؟

لي التفكير بيزيد قبل النوم؟

كتير مننا بييجي وقت النوم ويفضل يفكر في مواقف حصلت خلال اليوم أو يقلق من المستقبل، وبدل ما يرتاح يفضل عقله مشغول بأفكار كتير. يا ترى ليه التفكير بيزيد قبل النوم؟ وإزاي نقدر نقلله وننام براحة؟ ده اللي هنتكلم عنه في المقال.

إيه اللي بيخلّي عقلنا يفتكر مواقف قديمة قبل النوم؟ 

أحيانًا بنفتكر مواقف قديمة قبل النوم، سواء كانت مواقف فرحتنا أو ضايقتنا، لأن الهدوء بيدينا فرصة نفكر في حاجات مكنش عندنا وقت نفكر فيها خلال اليوم. وممكن موقف بسيط حصل من سنين يرجع لذهننا فجأة، ونفضل نفكر في تفاصيله ونتخيل لو كنا تصرفنا بطريقة مختلفة، وده ممكن يخلينا نفضل صاحيين فترة أطول. 

إزاي نقدر نقلل التفكير الزائد قبل النوم وننام براحة؟ 

ممكن نقلل التفكير قبل النوم بطرق بسيطة، زي إننا نبعد عن الموبايل شوية قبل ما ننام، ونحاول نهدّي نفسنا ونبعد عن أي حاجة بتسبب لنا التوتر. كمان ممكن نكتب الأفكار اللي شاغلة بالنا في ورقة، وده يساعدنا نرتب أفكارنا بدل ما نفضل نفكر فيها طول الليل.

التفكير الزائد ممكن يخلينا نتأخر في النوم، ونفضل نتقلب في السرير وإحنا مش عارفين نريح دماغنا. وأحيانًا بنصحى تاني يوم وإحنا حاسين بالتعب، لأننا منمناش بشكل مريح. علشان كده، مهم نحاول نخلي مواعيد نومنا منتظمة قدر الإمكان.

كمان مش لازم نحاول نحل كل مشاكلنا وإحنا في السرير، لأن فيه حاجات ممكن تستنى لبكرة. لو فيه مشكلة شاغلة بالك، حاول تفكر في خطوة بسيطة تقدر تعملها لحلها، وبعدها سيب الموضوع لحد ما تصحى وتكون أهدى.

ومن الحاجات اللي ممكن تساعدنا كمان إننا نتعلم نفرق بين التفكير المفيد والتفكير اللي بيتعبنا. يعني لو بنفكر في مشكلة علشان نلاقي لها حل، فده شيء طبيعي، لكن لو فضلنا نعيد نفس الموقف في دماغنا من غير ما نوصل لأي نتيجة، فالأفضل ناخد استراحة ونشغل نفسنا بحاجة هادية. كمان مهم نفتكر إن المواقف القديمة خلاص عدت، وإننا مش هنقدر نغير اللي حصل، لكن نقدر نتعلم منه ونستفيد من تجربتنا. أما المستقبل، فمهما فكرنا فيه مش هنقدر نعرف كل اللي هيحصل، علشان كده الأفضل نعمل اللي نقدر عليه النهارده، ونسيب بكرة لوقته، من غير ما نحرم نفسنا من النوم والراحة راحة بالك مهمة، فمتخليش التفكير يسرق نومك، وافتكر إن بكرة فرصة جديدة لبداية أفضل وخلي أملك في بكرة أكبر.

وفي النهاية، افتكر إن مش كل فكرة بتيجي في دماغك محتاجة إنك تفضل تفكر فيها طول الليل. اهتم براحتك، وادي لنفسك فرصة تهدى، ومتضغطش على نفسك علشان تحل كل حاجة مرة واحدة، لأن راحتك مهمة، ومش لازم يكون عندك إجابة لكل سؤال قبل ما تنام.