تضحية بلا حدود ونكران بلا قيود، قصيدة حصرية بمجهود شخصي
في زحام الحياة وسباق الأموال ننسى أن هناك ديونا لا تسدد بالعملات بل بالبر والوفاء ولأن الوفاء هو شيمة الاحرار كان لابد من هذه الوقفة الصادقة 
اياك يابني
اياك يابني في يوم تجي عليا
يدور الزمن ويترد اللي عملته فيا
فاكر لما كنت بطنيعشان
تتخانق مع اعضائي
صحتي وجسمي وشكلي
قلت فين راحوا
قلت فداك يابني يروحوا مع اللي راحوا
فاكر لما كان التعب بيزيد عليا
وبرد الشتا يدخل جسمي ويكسر فيا
لا كان يفرق معايا شال أو جلابية
كان حضنك هو دفايا
والنظرة في عينك دوايا
وسهرت يابني بدل الليلة ليالي وانت سارح بين فكري وخيالي
طول الليل قعدين كأنك حالف مايغمضلك عين
قلت اسند على وسادة طريا
أخدك في حضني تدفا فيا
مدام حالف تعذبني شويا
في تعبك كنت بتوه توهان
في أوضة وأربع حيطان
بدعي ربنا يشفيك وينجيك
ومن عيون الناس يحميك وفي لعبك وجريك وطنطيطك
جن جنوني
وبكلمة أسف وحضن منك نتنسيني
ياعيوني
نسيت نفسي ولبسي وكل اللي كان ليا
كان همي اشوفك فرحان يا نور عنيا
فإياك في يوم يا ابني تجي عليا
وفجأة لقيتك قدامي بتكبر
خوفت عليك من الزمن يابني يغيرك
وأجي لحد عندك وأحذرك
إياك ما تخليني أشوفك اياك يا بني ما تخليني أشوفك
ويعدي أيام ورا أيام وتجي وتقول ظروفك
يلعن الظروف
لما قلب امك يبقى عليا ملهوف
وانت ولا عندك خشى ولا كسوف
سلم وبإيدي طلعته درجه درجه
ولما وقعدت سندتك وخليتك تكمل
جاي دلوقتي تقول أتحمل
اتحمل عمري اللي اتسرق مني عشانك
ويبقى مقابل الجميل حرمانك
خليتك تشتري انت الهنا
وقلت يارب خد من عمري واديله سنه
أنا اللي ضحيت بعمري عشانك
كنت ليك ضهر وسند
كنت بدعي ربنا يطول بيا الأمد
عشان محدش يربيك غيري
ولا تبقى لحد مذلول
وتبقى عينك مكسوره وعمرك يبقى مذبول
وتقول فينك يأمي ياريت كان عمرك يطول
فإياك يا بني في يوم تجي عليا
اياك تقولي كبرت
اياك ياابني تقولي كبرت وتتكبر عليا
وزمانك يأمي مبقاش يليق بيا
عاداتك وتقاليدك سلبية
وكنا بناكل على طبلية
ونشرب من زير
ونلعب على الحصير
وحاجات تانيه كتير
إياك يابني من الزمن
دا الزمن غدار
يلعب في دماغك
ويسيبك تحتار
ويزن عليك ليل ونهار
يخدك في بحوره الجميلة
يصورلك حكايات الف ليلة وليلة
كلها حكايات مش اكتر
عيش الواقع واتشطر
إياك في يوم تنسى اصلك
تنسى مين اللي رباك
وتهون عليك أمك وتنسى خيرها معاك
إياك في يوم تبقى قاسي وقسوتك تبقى نار
ويهون عليك أصحاب الدار
وتقسى على أمك وتسبها تحتار
دا اللي ربيتة؟
دا اللي من دمي وعمري اداتة؟
دا اللي كنت بقول عزوتي وناسي؟
خلاص مبقاش يفرق معاه احساسي
بكرة تشرب من نفس الكاس
وتدور على حضن أمك بين الناس
نصيحة مني يابني
نصيحة مني يابني اتقي ربنا فيا
وافتكر إن ربنا وصاك عليا
ورضايا عنك اكسبه
تكسب دعايا وتنال رضايا
وحياتك مثل الجنة
تعيش فيها وتتهنا
لكن لو خسرتني وجيت عليا
يدور الزمن ويترد اللي عملته فيا.
( في الختام تبقى الأم نهرا من العطاء لا ينضب ويبقى نكران فضلها جرحا لا يندمل.سطرت هذه الأبيات بجهد شخصي .شاركوني في التعليقات ولا تنسوا دعم المقال)
