ليه الفلوس بتخلص قبل نص الشهر؟ تحليل حياتي من قلب الشارع المصري
- ليه الفلوس بتخلص قبل نص الشهر؟ تحليل حياتي من قلب الشارع المصري
- تعالي اقولك لي
فيه حالة غريبة بتحصل لينا كل شهر، كأن المرتب أول ما ينزل يصرخ ويجري… وبمجرد ما نقول “يا ربّاه!” نلاقيه اختفى. والمصيبة إننا بنسأل نفس السؤال كل مرة:
“هي الفلوس راحت فين؟ أنا صرفت على إيه؟”
الحقيقة إن الفلوس مش بتتبخّر… إحنا اللي بنصرف بطريقة تضحّك شوية وتعيّط شوية. خلّيني أشرحلك من الآخر كده، من واقع حياتنا اليومية.
١- مصاريف صغيرة… بتعمل كوارث كبيرة
أخطر مصاريف في الدنيا هي المصاريف اللي نقول عليها “حاجة بسيطة”.
تيجي تقول:
– فطار بـ ٨٠جنيه
– قهوة ب٣٠
– شيبسي وسناكس
– مشوار “كده عالسريع”
– تاكسي بدل ما تستنى الميكروباص
وتلاقي اليوم مشي والدنيا جميلة… لحد ما تيجي آخر الشهر وتحس إنك كنت بتصرف على مزرعة مواشي مش على نفسك.
اللي بيوقعنا دايمًا إننا بنستهون بالحاجات الصغيرة… وهي اللي بتحطّنا في الزنقة والزنقة تحطّنا في “من أين لك هذا؟”
الإعلانات اللي بتسحبك سحبة
لو في حد في العالم نجح يخدع الشعب المصري… فهو المعلن.
يا عم إعلان واحد يعملك سيشن convincing يخليك تصدق إنك محتاج سماعة، شواحن، مريات، نظارات، مشايات، وتلاجة صغيرة للديسك!
تشتري الحاجة… توصل… تلاقيها شبه اللي في الإعلان لو كنت حاطط فلتر سناب.
وبرضه نرجع نشتري تاني!
ليه؟
عشان باختصار إحنا بنتأثر بسرعة… وده جزء من شخصيتنا اللطيفة اللي بتضيع فلوسنا
- “سيبها علىّ… ومروان بتاع المستقبل يشيلها
ي بقى أحلى نكتة بنعملها في نفسنا.
تيجي تشتري حاجة غالية وتقول:
“ما هو آخر الشهر هيعدّي. ربنا يسهل.”
طب ما آخر الشهر ده هو إنت؟
هو نفس الشخص اللي هيقف يلعن نفسه بعد ١٥ يوم.
لكن لأ… نفضل نرمي المصايب على نفسنا المستقبلية لحد ما ييجي اليوم اللي نقول فيه:
“أنا ليه بعمل كده؟”
٤- أول ما المرتب ينزل… لازم نحتفل
في ناس أول ما القبض يتبعت، بتنزل تدلع نفسها كإنها كسبت اليانصيب.
تيشيرت جديد… أكل من برّه… خروج… “نعيش يوم جميل”.
ومايعرفوش إن اليوم الجميل ده… هو أول مسمار في نعش المرتب.
٥ - ما بنعملش ميزانية… ولا بنفكّر نعمل
أكتر حاجة سهلة في الدنيا إنك تكتب مصاريفك… ومع ذلك معظمنا مش بيعملها.
نشتغل بنظام:
“اللي يحصل يحصل… وربنا كريم.”
ومع إن ربنا فعلًا كريم… بس إحنا بنستعمل الكرم ده غلط خالص.
حتى لو كتبت ٥ سطور في نوتة… هتلاقي الدنيا اختلفت، وهتفهم الفلوس بتروح فين
الفلوس مش قليلة… إحنا اللي بنصرفها من غير ما نفكّر.
ولو ركّزت شوية، وعرفت بتصرف على إيه، حياتك هتتعدّل، والزنقات هتقل، والقبض هيعيش معاك أطول من ٣ أيام.
مش لازم تبقى بخيل… بس خليك واعي.
عشان بصراحة… مفيش أسوأ من إنك تبقى مفلس ومش عارف ليه
