الدولار الأمريكي مقابل الجنيه المصري
ببساطه
فاكرين لما قولتلكم سعر الدولار سوق سودا ب ٢٣ وكمان احيانا بيوصل ٢٤ جنيه
القصة ان ارتفاع القمح والبترول والزيوت بعد ازمة اوكرانية رفع فاتورة الاستيراد وكمان بسبب الازمه كان لازم مصر تشتري اللي يأمنها شهور من السلع الضرورية تحسباً لاي ازمه
فتسبب ذلك في تآكل العمله الصعبه في البلد
وبقى مفيش دولار ولما المستورد يروح البنك يقولوله مفيش
وطالما المستورد مش عارف يتحصل على عمله صعبه يبقى مفيش نجيب علف مواشي ودواجن واسماك ، مفيش نستورد مستلزمات الانتاج ، يعني المصانع هتقفل والكتاكيت هتموت !!!
ومن هنا اتجه المستوردين للخليج علشان يشتروا دولارات المغتربين وبقت سماسرة العمله في الشوارع وعلى الجروبات وبسعر وصل ل ٢٤ جنيه للدولار
ودا اثر اكتر على اقتصاد مصر لانها فقدت مصدر مهم للعمله الصعبه وهم المغتربين
👈اصل المغترب هيحول على البنك ليه ب ١٩.٥ طالما حد هيشتريه ب٢٣ يعني فرق ٣.٥ جنيه في الدولار الواحد
والمفروض ان المستورد مسعر بضاعته على السعر دا يعني مفيش حاجه زادت عليه
ومن هنا قررت الدولة رفع ايدها عن الدولار مجددا للسيطرة على السوق
وهنا فيه سؤال مهم : مش الدولة محرره سعر الصرف وخاضع للعرض والطلب من ٢٠١٦ ؟
نعم لكن من بداية الازمه الاقتصادية العالمية اللي بدأت في مارس ٢٠٢٢ تدخلت الدولة لتحديد السعر لعدم ارتفاع الدولار وللسيطره على التضخم
لكن لما الوضع ساء اكتر ونقصت العمله الصعبه كان لازم تسيب الجنيه لالية العرض والطلب علشان تمشي الدنيا وتجبر المغترب على التحويل الرسمي وكمان علشان الاستثمار مش هيجي عندك وانت عندك اكتر من سعر للدولار
وكمان وتقدر توفر العمله للمستوردين ولاصحاب مزارع الكتاكيت اللي فضحو الدنيا وكان من حقهم .
وانا كشخص متابع فقط ولا خبير ولا غيره كنت متوقع ان دا هيحصل بداية نوفمبر والله على ما اقول شهيد.
تخيل يا ابن ادم تبقى في ٢٠١٤ بتقبض ٤٠٠٠ جنيه يعني حوالي ٦٠٠ دولار وقتها، قعدت بعدها تنحت في الصخر وطالع عين اهلك ٨ سنين يا مؤمن عشان مثلًا مرتبك يوصل لـ ١٠٠٠٠ او حتى ١٢٠٠٠ جنيه اللي هو ما يوازي تقريبا ٥٠٠ دولار حاليًا ده لو وصل لكده اصلاً فا تيجي انت بعد ٨ سنين تعب و شقى وسحله تلاقي نفسك لسه واقف في مكانك وكمان خسران و ماتقدمتش خطوة !
لو مرتبك 5000 الاف في مصر = 256 دولار ( الدولار 19.5 قبل التعويم )
بعد زيادة المرتب هيبقي 5300 جنية فإنت يا غلبان فرحت بال 300 جنية .. راح تاني يوم معوم لك الجنية والدولار وصل 22.65
عارف مرتبك بعد الزيادة بقي كام (233 دولار ) يعني قيمة مرتبك قلت أكتر من 23 دولار حوالي 520 جنية
الله يكون في عون الغلابة في مصر
كوميديا سوده والله
قصة قصيرة حزينة
