ولاد رزق القاضيه

انطباع سريع على ولاد رزق 3 (( بدون حرق ))

الفيلم بيحكي عن مجموعة من الصدمات اللي بيمر بيها ولا رزق لما بيظهر ليهم عدو قديم بيقرر يهد المعبد على اللي فيه .. وزي ما بيقولوا المصائب لا تأتي فرادى ف بيكون عندهم اكتر من تحدي "اشبه بصراع من اجل البقاء على قيد الحياة" بسبب وجود عدو تاني .. وده بيخليهم يروحوا لـ اخر واهم عملية .. اللي طبعا عارفين انها ((( اخر مره وبعدين هنبطل ))) 🤣

- مبدئيا كده اكتر حاجه كنت خايف منها وانا داخل الفيلم والتوقعات بتقول (انه مصروف عليه جامد) ان يكون صرف على مفيش .. زي افلام كتيره عالميه بتلم عدد ضخم من الأبطال وبيكون مصروف عليها وفي النهاية بتكون تعبانه .. ولكن ده محصلش .. الصرف واضح من اول فيلم

- مشاهد اكشن معموله بحرفية شديدة .. مطاردات عربيات وموتسكيلات غالبا مشوفتش زيها في فيلم عربي قبل كده ..  اشتباكات قوية .. يمكن (كان الاشتباكات الفردية كانت تكون اقوى شوية بس في النهاية معموله حلو مش وحشه)

- نخش بقى على الأداء التمثيلي ع طول (احمد الرافعي) مفاجأة الجزء ده .. عامل كاركتر مختلف من الأشرار اللي بتواجهم ولاد رزق بالنسبة لي يمكن اتقل من خالد الصاوي ف الجزء التاني .. اما ولاد رزق ورؤوف حمزاوي فـ محافظين على مستواهم محدش فيهم اقل من الأجزاء اللي قبل كده

- هل اتأثرت بغياب داود وفيشاوي؟ .. بصراحة لأ .. دور فيشاوي في الجزء التاني يكاد يكون لا يذكر .. يمكن الجزء الأول فيشاوي كان توب بس كان عادي جدا في الجزء التاني وبالتالي لما غابوا عن الجزء التالت محستش بفجوة كبيره خاصا ان ظهور شخصية "كوري" علي صبحي اللي عوض الجانب الكوميدي ل داود والفيشاوي بشكل جميل .. وشخصية الشايب عوضوا الدنيا .. ويمكن مفيش اتنين يختلفوا على ان كاركتر الشايب كان تقيل بس كنت اتمنى يتمهدله اكتر من كده حاجه زي ما حصل مع عباس الجن في الجزء التاني" وكنت اتمنى اشوفوا في مشاهد اكتر ولكن حقيقي كان من اجمل اضافات الجزء ده

- مشاكلي مع الفيلم هو الايحاءات وبعض المشاهد الجريئة .. وان الأدوار النسائية حاسسها مهمشة كان ممكن تكون افضل وليهم مساحات اكبر عن كده ..

واخيرا حقيقي حابب اشكر المخرج طارق العريان اللي قدر يوظف الانتاج بالحجم ده انه يطلع حاجه بالمستوى ده اللي مشاهد الأكشن فيها متقلش عن اي فيلم اجنبي والمؤلف صلاح الجهيني اللي قدم كتابه ناجحه وتويستات رهيبة متقلش عن الأجزاء السابقة

الفيلم بيستكمل نفس تيمه ولاد رزق ف لو انت عجبك الجزء الأول والتاني ومتقبل النوع ده من الأفلام ف تأكد انك هتستمتع جدا بالجزء التالت .. وزي ما قال ( محمود صاحبي ) تخيل مع تويست وقفله الجزء ده .. لو شفنا رجب وربيع رجعوا تاني ومعاهم الشايب وكوري .. هنشوف جزء رابع عامل ازاي ف حقيقي انا متحمس جدا لاجزاء جديدة من الفيلم ده ♥

وتاني وتالت شابوه احمد الرافعي على اداءك حقيقي مفيش حد هيشوف الفيلم الا ودوره هيعلم معاه .. ده كان مفروض انطباع سريع بس واضح اني اندمجت شويتين 🤣 مشاهدة ممتعة ♥️