شرم الشيخ: رحلة إلي مدينة السلام
شرم الشيخ و حسب تصنيف BBC تعتبر من اجمل اربع مدن في العالم واختارتها منظمة اليونيسكو من افضل 5 دول مدن عالمية في السلام.
النصب التذكاري
أول حاجه حنشوفها و احنا في طريقنا النصب التذكاري، و اسمه أيقونة السلام و هي مصممه علي شكل عناقيد من الجرانيت الاسود تحمل اوراق زهرة اللوتس الشهيرة يعلوها 8 اجنحة مستوحاه من اجنحة الاله رع تحمل نموذج للكرة الارضية عليها خريطة العالم وكلها مصنوعة من الصلب غير القابل للصدأ موقع مصر متحدد عليها باللون الذهبي ويطير فوقها الحمام اللي بيحمل غصن الزيتون رمز السلام والاجنجه ال 8 تشير الي الجهات الاصلية و الفرعية
ارتفاع النصب 34,5 م والعرض 24 م.
خليج نعمة
يقع خليج عند ملتقي قارتي اسيا و افريقيا و هو واحد من افضل اماكن الجذب السياحي.
خليج القرش
و المشهور بالمناظر الطبيعية الخلابه فيه و بيرجع تسميته بالاسم ده لان اسماك القرش كانت بتعيش فيه لحد تقريبا ً 12 سنة مضت
بس دلوقتي الخليج خالي من اي نوع من انواع اسماك القرش فتقدروا تعوموا و تستمتعوا بالمياه براحتكم و من غير خوف.
محمية رأس محمد
واحدة من أهم محميات سيناء و البحر الاحمر و تقع عند التقاء خليج السويس بخليج العقبة مساحة المحمية 850 كم المحمية بتتميز بوجود اشجار المانجروف اللي بتمنو علي سواحل البحار والمياه المالحة وكمان مجموعه نادرة من الاسماك الملونه والسلاحف البحرية المهددة بالانقراض والاحياء المائية النادرة
المحميه بيحيط بيها الشعاب المرجانية من جميع جوانبها داخل البحر واللي حينزل يغطس حيشوف اسفل شبه جزيرة رأس محمد مجموعه من الكهوف المائية متنوعه الاشكال
المحمية فيها 150 نوع من الشعاب المرجانية والعديد من الحفريات اللي عمرها بيتراوح بين 75 الف سنة و 20 مليون سنة.
منطقة الغرقانة
المنطقة كل سنة بيجيلها مجموعه كبيرة من محبي الغطس لأنها بتحتوي علي اندر انواع الشعب المرجانية والاسماك الملونة النادرة المنطقة اتسمت بالاسم ده نتيجة اصطدام سفينة تجارية المانية بالشعاب المرجانية المتحجرة سنه 1956 مما ادي لغرقها و السفينة مقسومه جزئين جزي كبير تحت سطح البحر والجزء اللي باين قدامنا دلوقتي فوق سطح البحر والسفينة مازالت محتفظه بكامل ادواتها اللي كان بيستعملها البحارة قبل غرقها وبتعتبر مقصد للسائحين من هواة الغطس.
حديقة السلام او حديقة النباتات الدولية
الحديقة علي مساحة 33 فدان وتحتوي علي 37 نوع من النباتات الطبية النادرة جوة الحديقة في متحف السلام والبيئة اللي بيضم قاعة بتحتوي علي صور ووثائق لأتفاقية طابا 1989 و معاهدة كامب ديفيد.
" سوهو سكوير"
مكان بيجمع بين الطابع المصري و الانجليزي، المكان رائع حقاً و مقتبس اسمه من ميدان سوهو الشهير بلندن و هو عبارة عن مجموعة من المطاعم و الكافيهات اللي بتحمل طابع البلدين.
اهم حاجة فيه عرض النافورة الراقصة و هي نافورة كبيرة بيتم تشغيل أغاني و مياه النافورة بتعمل عليها عرض راقص.
و كمان في مجموعة من التماثيل المصغرة لأهم تماثيل اوروبا تقدروا تتصوروا معاها و تستمتعوا بالسهرة.
اتمني تكونوا استمتعتم بالرحلة القصيرة دي داخل مدينة السلام " شرم الشيخ" و تكونوا عرفتوا بعض المعلومات المفيدة عنها.
