مقال بعنوان "إفتكاسااات" للكاتبة أمل كُريم
إفتكاسات …
عم الجمدَّان عامل قلبان في كل مكان .. قالك دانا واد فلته ومطرقع … طأت في دماغه .. قالك فكره . دي حتة فكره .. وبأفكاري أنا جبت التايهه … عالم فكسان .. مليان قلبان وحبة تقاليع كده مش جايبه .. قالوا عنها جديد كده مُستحدث . إنما في الأصل لو جيت دورت ع أساسها؛ تلاقيها تقليعة لا ليها أصل ولا فايدة.
حياتنا بقت عبارة عن شوية إفتكاسات على حبة حبشتكانات و عالم فكسانه في الرايحه والجايه مقابلانا .. ظاهرة سلوكية غريبة انتشرت مؤخراً زي غيرها من الظواهر المجتمعية .. موضوع يبان من بره عادي وسطحي لكنه محتاج النظر في أمره وتسليط الضوء عليه بشكل ما .. و علشان كده في موضوع النهارده هنتكلم عن:
معنى الإفتكاسات.
أمثلة عن الإفتكاسات.
يعني إيه إفتكاسات ؟
دي حاجة كده م اللي هي .. مصدرها دماغ لولبية ومش هنقول دي مهلبية .. شوية حروف شبه الرتوش مش مفهومة على كام فكرة غير معلومة ..
فقالوا أسطورة، قُلت دي صورة .. قالوا دي حكاية جيل، فقُلت من غير تطبيل "جيل عَّدمان .. جيل تعبان .. جيل مَّلان وجايب أخره .. يبان مَليان كده من بره تدَّور جواه تلقاه فاضي .. تبني ما تبنيش أساسه مافيش فبلاش تشويش كده ع الفاضي".
طب زي ايه الإفتكاسات دي ؟
• زي لعبة "الصبارة الراقصة" دي لعبة على شكل نبات صبار بترقص وتردد نفس الكلام .. افتكستها الصين للتسالي .. و انتشرت في دول العالم .. ومن كتر الطلب عليها سعرها بقى في العالي.
- البعض شاف انها خطر على الأطفال وبتأثر على التواصل اللفظي للطفل .. وبتكرار إستخدامها الطفل بينعزل عن المحيط ومع الوقت بيُصاب بمرض "التَوحُد" أو مرض "الإيكولاليا" او ما يسمى بالبغبغاء.
- والبعض الأخر شاف انها وسيلة لتخفيف الضغوط وتحسين المزاج للكبار والصغار .. واعتبروها "مُحفز للكلام" عند الأطفال اللي بيعانوا من تأخر النطق.
•• و زي إفتكاسة ال"Sweet Little Rain" سويت ليتل رَيَن، في مدينة شنغهاي الصينية .. و دي أحدث إفتكاسات القهوة، عبارة عن فنجان قهوة من غير سكر، فوقه غزل بنات على شكل خيمة بتدوب من البخار المتصاعد من الفنجان وبتختلط بالقهوة .. وبالرغم من انه مشروب يبان من بره جامد، إلا إنه كان عليه تعليقات سلبية .. زي ان الفنجان بيبقى ملزق من بره، وغير صالح للشُرب.
••• و نوع أخر من الإفتكاسات و ده بقى حدث ولا حرج .. أساسه بيبقى كلام متفبرك .. نتيجة لتعرض الشخص لموقف مُحرج او مُشكلة فبيبدأ يعيشها ع نفسه وعلى غيره .. ويدخل بقى في دايرة الإفتكاسات.. زي مثلاً؛ الراجل اللي قضى ليلته بره البيت ولما رجع لقى مراته في وشه؛ فقالك أوبااا .. وقعت وماحدش سمى عليا.. وعلشان ينجا بحاله افتكسله حوار "صاحبه اللي خبطته عربية، و انه اضطر يا عيني يفضل معاه لحد ما فاق واطمن عليه بنفسه .. طبعاً مبقاش في ست بتاكُل م الكلام ده دلوقت بس عدي يا ليلة . هههه …
•••• وأخيراً وليس أخراً أحدث إفتكاسات عيد الحب لعام ٢٠٢٢ .. واللي احتل فيها المركز الأول وبجدارة بوكس "قُلة حُبنا".. وبوكس "عبد الغفور البرعي وفاطنة كُشري" .. وبوكيه الشوكولاتة اللي مفيش غنى عنه .. ده غير بقى هدية "أفيشات الأفلام" واللي بتحتوي جواها على شكولاتات وفواحات وشموع عطرية .. وكمان "كانز الفرحة" وده كانز معدني بيبقى جواه برفيوم أورچينال ورسايل حب؛ وله مفتاح شبه مفتاح كان المشروبات الغازية.
وغيرها … من الإفتكاسات اللي مابتخلصش.
وفي الختام نقدر نقول إن الإفتكاسات سلاح ذو حدين، لكن أضراره اكتر من نفعه .. فياريت نبص لقدااام شوية، وقبل أي إفتكاسات نشوف رايحين على فين يا بتوع الإفتكاسات؟
