الحقيقة الحتميه " الموت "
ليه بنخاف من الموت؟!
السؤال الأكثر رعبًا في الحياة!
الموت حقيقي، كلنا مصدقين بوجوده، كل ثانية بتمر، بيزور الموت شخص ما!
طيب ليه بنخاف الموت؟!
ليه بنخاف من حقيقة ذهابنا من الحياة؟!
ليه الإنسان عنده القدرة المهولة دي للحرب من أجل البقاء.
حتى لو سعى للانتـ* ـحار ورمى نفسه في بحر هيعافر من أجل الحياة؟!
فعلًا.
ليه بنخاف من الموت؟!
سألت نفسك؟!
وأنا كمان سألت، ليه بنخاف منه.
الوحش المهول الكبير المرعب الخفي دا، اللي قادر يغير كل حياتك في غمضة عين لو خد منك عزيز.
ليه بنخافه؟!
(طاهر طناحي) في كتاب الساعات الأخيرة بيتفه من الموت وبيقول إنه شيء مايستحقش أي خوف مننا
يا عزيزي (طاهر طناحي) أصلًا وهو بيألف الكتاب دا كان على فراش الموت، يعني كل كلمة كان بيكتبها نابعة من إحساسه هو، من إحساس موت بيحوم حواليه.
(طناحي) بيقول إن الناس بتخاف من الموت علشان أربع أسباب.
- شخص بيخاف من الموت لأنه بيجهله، مايعرفش إيه هو الموت!
- وشخص بيخاف من الموت لأنه خايف من الألم اللي هيحس بيه وقت الموت.
- وشخص بيخاف من الموت لأنه خايف من العقاب بعد الموت.
- وشخص بيخاف من الموت لأنه خايف على الناس اللي هيسيبها بعد موته، أو على أمواله وملذاته.
الإنسان كائن عجيب، مشكلته الحقيقية في إنه لما بيألف الشيء بيتمسك بيه وبيكون صعب يبعد عنه، بالظبط زي لما تتجوز وبعد 20 سنة تقرر تنفصل، الموضوع بيكون صعب جدًا ومؤلم.
كذلك الدنيا، لما بتألفها وتتمسك بيها وتعيش فيها فترة أكبر بيكون صعب إنك تسيبها، وعلشان كدا هتلاقي إن الشخص كل ما عمره زاد كل ما تمسكه بالدنيا زاد، ولذلك هتحس دايمًا إن الشاب بيرمي نفسه في التهلكة على عكس العجوز اللي دايمًا بيكون متبت فيها بشكلٍ ما ومش عاوز يمشي وصعب يعرض نفسه للخطر!
لو إنتَ بتخاف من الموت لأنك بتجهل الموت ومش قادر تفهمه، فلازم تعرف أن الموت ما هو إلا فناء للجسد، محطة بتعدي عليها علشان توصل لمحطة تانية، جسدك بس هو اللي بيموت، وروحك بتفضل موجودة.
ولو إنتَ بتخاف من الموت لأنك خايف من الألم اللي هتحس بيه وقت الموت، فخليني أقول لك إن يُقال إن السبب في الاعتقاد دا هو الإنسان القديم!
في بداية الزمن الإنسان كان بيعيش في الصحاري والأدغال وغيرها من الأماكن الخطرة، كان بيواجه زواحف سامة وحيوانات مفترسة، ولما كان بيتعرض لهجمة ما كان بيموت، وقبل الموت كان بيحس بألم فظيع من افتراس الحيوان له، ولذلك الإحساس دا ترسخ في عقل الإنسان واتنقل مع مرور الزمن لحد ما الإنسان الحديث بقى معتقد إن الموت فيه ألم.
أنا عارف والله إن الموت فيه سكرات، ولكن اللي لازم إنتَ تعرفه إنه ألم لحظي، والحقيقة إن الموت تخليص من آلام الحياة وأعبائها ومشاكلها، يعني الموت أصلًا لو معتقد إن له ألم، فهو في الحقيقة بيخلصك من ألم الدنيا.
ولو بتخاف من الموت لأنك خايف من العقاب، فالحل الوحيد إنك تعمل لدا، اسعى إن ميكنش لك عقاب بعد موتك، إنك تتحط في كفة الفوز.
ممكن تكون بتخاف من الموت علشان خايف تسيب اللي حواليك، أو فلوسك الكتير اللي بتحاول تتمتع بيها ولسه مشبعتش من لذة الدنيا، خليني أقول لك لو دا تفكيرك فإنتَ كدا شخص أناني، لأن اللي خايف عليهم بعدك دول أصلًا هيموتوا في يوم من الأيام لو همَ بشر، ولو فلوس، فهي مجرد وسيلة.
ولذلك إنتَ هنا بتفكر في نفسك، لأن الكل هيموت.
خليني أقول لك على السر، تعرف إنك ممكن يموت جسدك وتفضل عايش!
خلينا متفقين إن الدنيا مجرد وقت قليل جدًا بيمر في حياة الإنسان وبينتهي، ولكن ممكن تصنع شيء مؤثر في الدنيا دي يفضل عايش بعد موتك.
الشعراوي كان إنسان زيه زي أي إنسان اتخلق، ولكنه قدر بعلمه يسيب بصمة في الدنيا تخليه خالد بعد موته، ليه لما بتذكر اسم الشعراوي لحد دلوقتي بتحس إنه لسه عايش؟! لأنه فعلًا عايش مماتش.
د.مصطفى محمود لحد وقتنا هذا عايش واسمه موجود، لأنه قدر يصنع طفرة في حياته هتعيش سنين طويلة قدام، ومستشفياته وصدقاته لسه مستمرة.
نجيب محفوظ، طه حسين، أحمد ديدات، تشارلز ديكنز، شكسبير، دوستويفسكي، فيكتور هوجو، بيتهوفن، دافنشي، وغيرهم أسماء كتير لسه عايشة، لأنهم قدروا يصنعوا مجد خالد يعيش بعد موتهم.
إنتَ كمان تقدر تعيش، بمجدك تقدر تعيش، بنجاحك تقدر تعيش، اصنع اللي يفتكرك بيه العالم بعد موتك.
اعرف إن الموت موجود، بيجي في لحظة، "كُلُّ نَفْسٍ ذَائِقَةُ الْمَوْتِ".
اعرف إنك هتفضل كل ما تفتح الفيسبوك وتقلب في بوستات هتلاقي ناس بتموت، هتمشي في الشارع هتلاقي عزاء هنا وهناك، شخص كان عزيزي عليك هتلاقي نفسك فجأة واقف بتاخد العزاء بتاعه، لحد ما الناس هتعزي فيك، ولكن هل بعد موتك الناس هتفتكرك وهتفضل عايش؟ ولا هتموت؟
الموت مجرد محطة، كلنا هنعدي عليها، الموت شيء ضعيف، حدث لا بد منه، تقدر تتغلب عليه، وعلى خوفك منه، طبيعي تخاف من الموت، ولكن لو قدرت تتخلص من أسباب خوفك منه، هتعيش براحة غير متناهية.
-
