ليه الشركات بتعمل ريبراندينج ؟

خلينا متفقين في البداية ان مصمم الجرافيك مش فنان، بل هو أقرب الى "دكتور" بيوجد حلول لمشاكل عن طريق الـVisuals.

ليه شركات كبيرة بتعمل ريبراند وتغير هويتها التجارية مع انك شايفها ناجحة، وليه انت ممكن تعمل ريبراند اصلًا؟

الريبراندينج مش بالضرورة يكون سببه تحسين في شكل العلامة التجارية او تطوير في الألوان وخلافه، احيانًا بيكون حل لمشكلة معينة موجودة في الشركة.. دي بعض العلامات الي لو شوفتها يبقى يفضل تلجأ للـRebranding.

◽️دخلت سوق في بلد جديدة وزودت نطاقك الجغرافي:

بلد جديدة معناها تقاليد جديدة، سوق جديد وتارجت اودينس جداد، هتحتاج تغير من جلدك عشان تندمج مع المجتمع الجديد الي انت دخلته وتقدر تتواصل معاه، خد مثال كوكاكولا لما دخلت اليابان وبالمناسبة السوق الياباني من اصعب الأسواق في العالم بسبب تمسكهم الشديد بعاداتهم وتقاليدهم، كوكاكولا اضطرت انها تتخلى عن جزء كبير من هويتها التجارية عشان تقدر تتماشى السوق الياباني لدرجة انها وصلت تقريبًا انها تنتج اكتر من 850 طعم مختلف ومازالت بتحاول عشان تنشر ثقافة المشروب الأصلي بتاعهم الي مبياعته لا تتعدى الخمس من اجمالي المبيعات!!

◽️مش قادر تفرق البراند بتاعك عن المنافسين:

الهدف من البراندينج في المقام الأول هو التمييز، لو كل الناس في السوق زي بعضها العميل مش هيقدر يفضل حد عن حد تاني لأن مفيش اختلاف يبرز منافس عن منافس تاني. ريبراند يغير شكلك ويميزك عن المنافسين هيكون الحل.

◽️الخدمات الي بتقدمها زادت والبراند كبر:

الدنيا بتطور وانت كمان بتتطور معاها، بدأت توسع في نطاق خدماتك وتزود عن الي كنت بتقدمه، في الأعلب البراند بتاعك هيحتاج يتغير عشان يواكب التطور الي انت بتعمله ويعبر عنه.

◽️شركتك اندمجت مع شركة تانية او تم الاستحواذ عليها:

علامة مباشرة لعمل ريبراند، تقريبًا اي شركة عملت دمج او استحواذ لازم تغير في هويتها التجارية بطريقة ما عشان تعبر عن التوجهات والسياسات الجديدة للشركة او عشان تبان كجزء من كيان الشركة المستحوذة.

◽️بتحاول توصل لفئة عمرية وجيل جداد:

دلوقتي جيل اواخر التسعينات واوائل الألفينات او ما يسموا بـ Gen Z، قوة شرائية رهيبة وتارجت ممتاز تقدر تستفيد بيه، وبعد كدا فيه Gen Alpha ودايمًا هيكون فيه جيل جديد، والجيل الجديد بيحب يقرب من الي شبهه. لو بتخطط انك تستهدف الجيل ده لازم تغير من جلدك عشان تكون شبهه وتبني  ثقة عشان تقدر توصله.

◽️محتاج تعلي اسعارك وبتواجه مشكله في رفع الأسعار:

لو تغيرات الأسعار مأثرة عليك بشكل كبير بسبب ارتفاع اسعار التكاليف او اي سبب تاني والبراند مش متحمل انك ترفع اسعارك بشكل اكبر من الي هي عليه في الوقت الحالي، ريبراندينج  قوي ممكن يديلك حل للمشكلة دي.

فيه قاعدة اسمها ROI أو Return of investment بالبلدي كدا العائد الأستثماري.
الـROI of branding بيقولك أن كل ما كان البراند بتاعك اقوى بتجذب عملاء بشكل اكبر وبتكلفة اقل وكمان الناس الي هتجذبهم هيكونوا مبسوطين وهما بيدفعولك اكتر من المنافسين وكمان هيشتروا منك اكتر.

◽️عملت مصيبة وشركتك بقى ليها سمعة وحشة:

السوشيال ميديا ليها مزايا وعيوب، ومن عيوبها سرعة الإنتشار خصوصًا في السلبيات.. لو البراند بتاعك طلعت عليه سمعة وحشة ومش قادر تتخلص منها في الأغلب هيكون حلك هو الريبراند، تطلع بهوية جديدة واسم جديد ومع الوقت الناس في الأغلب هتنسى.... أو لأ :"D

◽️ببساطة شكلك بقى قديم:

قد يكون شئ منطقي وده في الأغلب اول حاجة صدرت لبالك لما سألتك السؤال ده، الـVisuals بتاعتك بقت قديمة ومحتاج تغيرها وتطورها عشان تواكب التقدم والذوق العام الي بيتطور وممكن كمان تعمل Debranding.

ايه الفرق بين الـ Rebranding والـ Debranding دي قصة هنحكيها في وقت تاني.
 

لو وصلت لحد هنا فأنا اشكرك جدًا، وعندي ليك سؤال.. من رأيك ايه الفرق بين الـ Rebranding والـ Debranding ؟