دائرة الثقة اختيارية

يعني ايه ثقة! 

كلمة بتلخص كلام ومواضيع كتير، يعني الامان ، يعني السلام النفسي، يعني دايرة الاحتواء . و ف الاغلب بندي كلنا الثقة ل اي حد نتعامل معاه ، علشان اتولدنا ببراءة الطفل .

الدايرة بتتغير بالوقت.

 لحد ما بتحصل مشكلة بسبب اننا وثقنا ف ناس غلط وهنا ي بنتعلم ونبقى حذرين ي بنفضل زي ماحنا وبنقول على  نفسنا جملة شهيرة " اصلي طيب ومش عايز ازعل حد". وبنفضل نثق ف الناس الغلط ومش بنتعلم . ومن قوانين الطبيعة انك لو متعلمتش من غلطك هتفضل تفشل بسبب نفس الغلط ، وقالها احد العباقرة  “ لا تنتظر نتيجة مختلفة وانت تؤدي نفس الخطوات”.

نتيجة الثقة… 

 للاسف ف موضوع الثقة دا بالذات، في ناس كتير من كتر ما شافت اتعلمت تبقى كتومة جدا لدرجة انه/ها ممكن يبقى كتوم حتى مع نفسه وميرضاش يصارح نفسه بكلام كتير. وفي ناس من كتر ما فقدت الثقة ف الناس. بتخلي تعاملها سطحي، لاء وبتخاف تدخل ف حياة اي شخص علشان الشخصية دي خايفة ان حد يدخل حياتها .

وفي ناس لما بيثقوا ف الاشخاص الصح بيبقو اقوى احسن اكبر وانضج. لما تحط الناس الصح ف المكان الصح ،وتعرف تختار دايرة الثقة صح ،بتلاقي نفسك بتكبر بيهم ،وبتلاقي طل شوية بتفرح بوجودهم رغم الهزار واللعب واي حاجة بينكو بس الثقة بالذات ليها طعم مختلف ،وبتخليك مش ندمان انك عرفتهم بالعكس وفرحان انهم جزء من حياتك لمجرد انك اخترت صح. والحقيقة علشان تعرف اقوى دايرة ثقة لازم الوقت يعدي والمواقف تثبت اختيارك . ورغم الاختلاف الا ان كل الطرق بتقول انك لازم تختار صح.

الكتمان!!

 الحقيقة ان اي حد اتعلم يخبي حصلت معاه مواقف خلته يفقد الثقة، علشان كدة اتعلم يبقى كتوم. لكن الحقيقة مش كل الناس بتثق دلوقتي لكن كل الناس وثقت زمان. لكن في ناس بترجع ترتب دايرة الثقة تاني ومش بتدي الثقة ل اي حد، وفي ناس مش بتدي الثقة لحد اصلا. لكن كل الطرق بتاكد حاجة واحدة ان "في ناس اهل للثقة، وناس احسنلك تكون معاملتك معاهم سطحية. لكن كدا كدا الثقة موجودة مع الشخص المناسب.