زرار ريموت الحياة
التفكير للايجابي.
انك تلاقي حياة شبه الجنة دي معتمدة عليك من جوة زارع ورد ولا زارع شوك . ارضك من جوة صالحه للزراعة ولا بارت . بس مش معنى انك شايف الحياة جميلة انك متتعرضش لظلم لاء . كل الناس شافو القسوة والظلم والزعل والحزن والياس وحجات ملهاش نهاية . لكن مش كل الناس مشيو نفس الطريق ، فيه الي فضل مصدوم ودا حقه ، بس لو طوِّل هيفضل حاسس نفسه في فجوة زمنية ، اخر حاجة فاكرها الحزن . لكن ممكن نقلب الفجوة دي بضغطت زرار اسمه التفكير الايجابي .
عيوب و مميزات التفكير الايجابي .
سعات التفكير دا بيبقى له مساوئ وانه ممكن يبقى ساذج من كتر طيبته/ها . او انه ممكن يتفاجئ كتير . لكن الي واثق منه ان مفيش حد مش بيتعلم من الي فات . كل الحكاية انك ماسك زمام الامور ، انت الي ماسك ريموتك وبتختار تضغط ع انهي زرار .
اختار صح ومتستناش.!
وهنا ي اما تضغط ع زرار يخليك تشوف الحلو وتعدي الي فات ، ي اما هتضغط ع زرار يوقفك ف مكانك ومتشوفش غير الي فات ، ي اما متمسكش الريموت وحد تاني يمسكه . المشكلة ان الناس مش مدركة ان هي حياة واحدة ب شعور واحد ب قلب واحد ب عقل واحد ب خبرة ومواقف واحدة . الي نفسك تعمله متستناش عليه . اصلك هتندم لما تقول يارتني عملت كدة وقتها . طب وليه افتكر انها حياة واحدة و ولو معملتش الي انت عاوزه دلوقتي هيفوتك . اختار زرار تبني ب ايدك تحب ب ايدك ترسم ب ايدك وحتى تعالج ب ايدك . متبقاش عامل زي المبنى الفاضي الي مستني عوامل الزمن توقعه حتى لو كان قوي مسالة وقت مش اكتر ، لاء خليك زي المبنى الي فيه ناس وكل يوم بيترمم وبيتجدد وبيوسع فكره وعقله .
ايه الي ممكن يخليك تتغير،،؟
اليوم الواحد بيقدر يغير حياتك كلها بالعكس دا الكلمة الواحدة . مبالك ممكن تتعلم كام كلمة او تقول كام كلمة ف اليوم الواحد . مش شرط تكون عبقري بس كفاية ان انت انسان ذكي ، انت واحد مختارش يفضل زعلان او مكسور ، انت اخترت انك تشوف الدنيا حلوة لما انت بقيت قوي و بقيت جميل من جوه .
ازاي تجدد طاقتك وروحك لو حسيت انهم خلصو..؟
مفيش ريموت يقدر يختار الحلو لو مكنش فيه طاقه تخليه يختار . وهنا نقف عند الي طاقته خلصت ، وتعب وزهق والحزن متملكه ، الشخص الي عاجز يختار علشان طاقته خلصت ، ومش قادر يختار او خايف يختار تاني . وهنا فعلا دور الي حوالينا ف خليك ديما جنب الناس الي بتدي طاقة . جنب الاهل او الصحاب او الحبيب . المهم اول ما طاقتك تخلص تلاقي الي يسندك . مش عيب انك تقع لكن عيب انك متعملش recovery بسرعه. مش عيب انك ترمي همومك لحد، لكن عيب انك تفضل ضعيف ومعندكش طاقة بالعكس
خليك انت الطاقة والحياه لمن فقد ريموته
