ترندات للشهرة و بس
في هفوة كدة من الزمن لقينا حد طالع و راكب الترند و قال ايه بيدافع عن الرجالة .. ايوة بالظبط زي ما سمعتوا كدة بيدافع عن الرجالة ..
طب ازاي .. هما الرجالة محتاجين حد يدافع عنهم .. دة ما شاء الله طايحين بالطول و بالعرض
هقولكو انا عرفت ازاي الحكاية دي
انا واحد من الناس مش بتفرج على التليفزيون نهائي .. مش عشان حاجة والله بس عشان انا مش ميال للجهاز دة الا فيما ندر لو عيني وقعت على حاجة كدة ولا كدة و انا معدي من قدام الاستاذ تليفزيون
في يوم لقيت ناس كتير بتتكلم عن واحدة في التليفزيون بتدافع بقلب جامد عن الرجالة و قال ايه ماسكة مدافع الهاون و عمالة ترش في الستات يمين و شمال
مين دي بقا ؟
هو دة السؤال اللي انا سالته .. لقيتها ياسمين عز
و طبعا بما ان مفيش اي علاقة بيني و بين التليفزيون ف معرفتهاش
فتحت مستر جووجل اللي بيعرف كل حاجة ده و سالته مين دي بقا
جاب لي صورتها
هي حلوة و قمر بصراحة
بس برضو ايه الحكاية
اشمعنا دي و اشمعنا الوقت دة ولا دي حاجة بالصدفة
أنا كنت برضو سمعت سمع كدة عن رضوة الشربيني اللي هي عكس كل حاجة في اللي ياسمين عز بتقوله
برضو انا لسه مقررتش اتفرج على ياسمين و مش جايالي الفكرة الصراحة
بس و انا في عيادة من كام يوم لقيت مساعدة الدكتور مشغلة التليفزيون و شفتها اخيرا
اول حاجة قالتها في البرنامج " بصي بقا يا ست الكل لو انتي متجوزة دكتور اسنان يبقا يا سعدك يا هناكي .. دة حاجة زي العسل .. دة لسانه بينقط سكر "
افتكرت على طول اصحابي و معارفي دكاترة الأسنان اللي عارفهم انا شخصيا و بقيت اقارن اللي هي بتقوله باصحابي دول و قعدت اضحك ضحك
بقا فيه حد يقول كدة يا جماعة
حد يقدر يعمم مواصفات و سلوكيات بني ادمين عشان بس وظيفتهم او شغلانتهم
هو فيه حاجة اصلا في المطلق شغالة كدة بالمسطرة
طالما دكتور تبقا عسل و طالما مدرس تبقا قمر و طالما محامي تبقا جميل
عارفين القصة كلها في ايه
القصة كلها في الرقم
رقم ايه بقا
تعالو اقولكو
القصة كلها في رقم المشاهدات اللي هتيجي على القناة و على الفيديوهات اللي هتتحط في المنصات
الرقم دة يعني اعلانات يعني فلوس يعني دولارات
و طالما الحكاية عاجبة الناس و فيه مشاهدات بالملايين و ارقام داخلة الخزائن يبقا جميل و حلو و نكمل في التريند
انما هل دة له علاقة ب معتقدات القنوات او معتقدات المذيعين او معتقدات اي حد
الحكاية مفيهاش غير " ايه بيجيب مشاهدات " و طالما احنا كمنتفعين دة شغال معانا يبقا دوس ميهمكش
الفكرة فينا احنا بقا هيحصل لنا نضج امتى و نسيب التفاهات عشان نشغل نفسنا بالمنافع
احنا قدامنا وقت طويل عشان نعرف نفك دماغنا من قيود التليفزيون و الاعلام الموجه و نبص على حاجات تانية تنفع
الكلام دة بس للي فينا عاوز ينفع .. خلصت
