لما تمشي ورا دماغك وتفوق متأخر: تجربة غيرت حياتي
لما تمشي ورا دماغك وتفوق متأخر: تجربة غيرت حياتي
الفترة اللي فاتت كانت أصعب فترة عدّت عليّ، يمكن أصعب عشر شهور في حياتي. شوفت فيها حاجات كتير قوي، واتعلمت منها أكتر. في وقت كنت فاكر إنّي اتعلمت كل حاجه وعدّى عليّا كل شيء، وإن بعد كده هعرف أتعامل مع أي موقف. الحمد لله الواحد شاف كتير، بس برضه في حاجات بتبقى خارج الصندوق، حاجات بتفاجئك وتوقفك، وساعتها لو ما أخدتش بالك ممكن تعكها جامد.
المشكلة إنك أحيانًا تحاول تحل بعقلك وتقول أنا مسيطر، وفي الآخر تلاقي نفسك بتلف في دايرة مقفولة. لا أنت ماشي صح، ولا مرتاح، ولا حتى مبسوط. تمشي ورا دماغك شوية، ورا شيطانك شوية، وفي الآخر تاخد على دماغك. ساعتها بتفهم إن لا المشاكل بتنفع، ولا الجدعنة الزيادة بتنقذ، اللي بينفع بجد هو شخصيتك وحدودك.
خليك فاهم إن وجودك وحدودك مهمين. مش أي قعدة تبقى قعدتك، ومش أي سكة تمشي فيها. مش معنى إنك وسط شلة يبقى لازم تعمل زيهم في كل حاجة. سيجارة؟ خناقة؟ مش لازم. خليك عارف أنت مين، وواقف فين، وحدودك لحد فين. الغلط وارد، بس خلي غلطك عليك، الناس مالهاش غير اللي بتشوفه.
أنا مش بشجع حد يخطط ويخدع، أنا بقول خليك صاحب قرار. ما تركبش الموجة وخلاص، ما تمشيش ورا أي حاجة لمجرد إن الكل ماشي. لأن في الآخر اللي بيدفع التمن أنت، مش حد غيرك. والتجربة دي مش مرتبطة بفترة معينة، دي سنين شوفت فيها كتير بسبب دماغي واختياراتي.
أهم نقطة بجد: ما تبعدش عن الناس اللي بتحبك. حتى لو كلامهم قاسي، حتى لو أسلوبهم مش عاجبك. أغلب الكلام اللي بيطلع من اللي بيحبوك بيطلع من خوفهم عليك. خليك وسط ناسك، لأن في وقت الجد محدش هينفعك غيرهم، خصوصًا اللي بيحبك من غير مقابل وعايزك كويس وبس.
الوقت بيجري، والعمر بيعدي في ثانية. الفرصة اللي تسيبها النهارده، بكرة ممكن ترجع تدور عليها وتلاقي الدنيا اتغيرت وانت اتغيرت. وساعتها كلمة “ياريت” ما بتنفعش. عيش لنفسك، بس بكرامة، وبعقل، وباختيارك، مش مساق.
لو عندك طاقة أو شغف لحاجة، حط نفسك فيها. ابني لنفسك مكان، مش مكان جغرافي، مكانة. في شغلك، في أسلوبك، في اسمك وسط الناس. ابعد عن السكة السهلة والفلوس اللي بتيجي غلط، لأنها ما بتدومش، وكل حاجة ليها تمن وضريبة، وربنا ما بيسيبش.
