اسس اختيار المدرب
لما يبقى عندى فريق فيه ادوات هجومية مميزة يبقى كفائتى كمدرب تبان فى الحاله الدفاعية
لما ابقى فريق مهاجم طول الوقت اكبر خطر عليا هو الهجمة المرتدة بالتالى اقدر استغنى عن اى حد الا لاعب الوسط المدافع الفكاك اللى بينزع فتيل القنبلة قبل ما تنفجر فى وشى
لما يبقى عندى ادوات هجوميه كتير و اهاجم بيهم كلهم و اسيب خط الظهر مكشوف ابقى ساذج و مغيب
فى فرق عندها اتنين مهاجمين بيطلقوهم على اللى قصادهم و يمتلكوا خط الوسط و يآمنوا الدفاعات
الكورة البريئة بتاعت ييجى فيا و اجيب اكتر دى عمرها ما تجيب بطولات حتى لو معاك منتخب البرازيل فى عز مجده
مش بيكون فى حكم على مدرب لحد ما تشوفه كذا ماتش و يدخل تحديات لكن فى حاله تقدر تحكم عليه بسرعه من خلالها
نوعية الفكر و رؤيته للاعبيين و تقييمهم بشكل خاطىء هنا تفك ارتباطك بيه مهما كانت النتايج ايجابيه حتى لو كانت ايجابيه يمشى
فرق البطولات عاوزة مدرب بيعرف يحكم الملعب و يحافظ على اتزان الفريق دفاعيا وهو الكورة مش معاه
الكورة الحديثة بتقول ان المدرب المنضبط دفاعيا هو اللى بياخد بطولات ...الفرق الكبيرة كده كده هتجيب اجوال كتير بحكم قدرات اللاعبين الفرديه انما المدرب الكبير بس هو اللى يعرف يستغل اسلحته الهجوميه فى احراز اهداف و فى نفس الوقت مايدخلش فيه عدد كبير من الأهداف
و بصوا ...اى مدرب يسيب الملعب مفتوح يبقى مش كوتش و بالتالى هو و العدم سواء .اصعب حاجة فى الكورة لما تلعب بطريقة هجومية لمجرد ان اسم ناديك كبير هنا بتبقى مآساة لما الفريق مايكونش بحجم النادى
الزمالك مش هيعرف يكسب غير لما يلعب على تحولات و ينزل يسايس الجيم و يتعامل بواقعيه
غياب الواقعيه خلى سيراميكا يخسر قصادهم لأنه كان بيهاجم و مصدق نفسه فى حين انه لو لعب تحت الكورة كان الزمالك بفعل ضغط المكسب هيفتح خطوطة
الزمالك لو عاوز يوصل لحته حلوة ينزل زى يوم سيراميكا كده يلعب تحولات و ينزل مش متسربع عالمكسب و يقفل دفاعاته انما لو فضل عايش الوهم و انا جامد ونزل يهاجم هيتلب كل ماتش لأن امكانيات فريق الزمالك غلبانه لأقصى حد يمكن غلبانه اكتر من السنين اللى فاتوا كمان ...عموما هما هيلقطوا رزقهم على حساب المدربين الغلابه اللى عاملين مفتحين و بينزلوا يهاجموا بعباطة ...من الآخر نصيحتى الفنيه للزمالك وعارف انهم مش هيعملوها لذلك هقولها ...أنت فريق وسط جدول إلعب كورة انتهازيه على قد قدراتك وقتها هتروح لحته ابعد من مستواك٤٣٣ خطة حلوة كل الطرق حلوة اصلا
بس فى حاجة
٣ فى خط الوسط اتنين ادوارهم هجوميه اكتر و متطرفين شوية يبقى لازم الثالث ده يكون دفاعى بحت
ده سن البرجل اللى من غيره البرجل يتفشخ
ده الصداده و المظله
مش مطلوب منه يطلع بالكورة ماعندك اتنين و عندك رباعى الدفاع !!!
لما تبقى عاوز من لاعب الوسط المدافع ده جنب كل شغله كمان يطلع بالكورة اقولك درب برشلونه او ريال مدريد هتلاقى الكواليتى ده هناك جايز
كمان لما تركن اللاعب القوى دفاعيا ده عشان لاعب ضعيف دفاعيا بس بيطلع بالكورة كويس تبقى كده زيك زى اللى بيوقف حارس شوربه بيلعب كويس برجليه و تركن حارس قوى بيصد بلاوى بس مش بيلعب برجليه كويس
العبرة هى واجبات المركز الأصليه الحيويه
المدرب بقى اللى يستغنى عن الأساس و يمسك فى واجب فرعى ده يبقى عنده خلل فى الإدراك و عن نفسى انا لا يمكن اثق فى طريقة تفكيرة
الكورة مش مجال للمثالية و مفيش افكار بتطبق بحذافيرها لكن الشطارة انى دايما اهندم افكارى بحيث تتناسب مع ادواتى المتاحه ...محدش بيغيرالواقع الشاطر هو اللى يغير تفكيره عشان يتناسب مع الواقع
عشان كده لو عندى نادى و هجيب مدرب هشوف اكثرهم قدرة على التأقلم و التلون و محاكاة الوسط مش هدور ابدا على واحد صاحب فكر ثابت بيصر على تطبيقة لأنه هينجح مرة و يفشل ١٠٠ مرة ..كلنا لازم نتكلم بلغة الكورة لأن الكورة عمرها ما هتتكلم بلغتنا
