مقال (الاحساس الوحيد والرغبة الوحيدة اللي بقت مسيطرة علي)
الاحساس الوحيد والرغبة الوحيدة اللي بقت مسيطرة عليا واكيد علي كتير غيري اننا نفسنا الناس تسيبنا في حالنا وبس ..
محدش يتدخل في امورنا الشخصية وحياتنا ..
محدش يركز معانا ويشغل نفسه بينا عملنا ايه و روحنا فين و كلمنا مين .. وهكذا من التفاصيل الكتير في حياتنا واللي المفروض انها تخصنا احنا لوحدنا وبس .. ماتخصش حد غيرنا ..
نفسنا محدش يدور ويفتش عن الحجات اللي احنا مش عايزين نقولها واللي مش من حق حد انه يعرفها ..
نفسنا القلوب تبقي صافية ونضيفة ...
احنا عمرنا مااتمنينا للناس غير كل الخير والله ..
الغريب قبل القريب ..
عمرنا مابصينا للي في ايد غيرنا ..
عمرنا مااستكترنا النعمة علي حد ولا اتمنينا انها تزول بالعكس دايما بنتمني من ربنا انه يزيد كل واحد من فضله وكرمه .. وانه يهون علي اي حد حزين او مكروب ..
وكل اللي بنتمناه ان الناس هي كمان تعمل معانا كدة .. او عالاقل بلاش يأذونا بسواد قلوبهم ..
والله ياجماعة اللي مستخبي ورا الصورة اللي بتشوفونا بنضحك فيها ألف دمعة مدارية .. ..
اللي مستخبي ورا الابتسامة الحلوة والشياكة واللبس ألف صرخة وجع وحرقة قلب ...
اللي متاخد مننا كتير والله واللي اتحرمنا منه كتير .. واللي اتوجعنا منه كتير ..
بس الفرق ان احنا بنعرف نقول الحمدلله ... بنعرف نكون راضيين باللي ربنا كتبه لينا ... بنعرف نشوف النعم اللي ربنا انعم علينا بيها ونحاول نتبسط ونكتفي بيها عشان نقدر نكمل حياتنا ونعيش ...
فبلاش تحكمو علي حد من شويه صور ولا فسحة ولا لمة صحاب ولا ضحكة طالعة تغسل هموم ربنا وحده أعلم بيها ...
بلاش تحكمو عالمظهر واللبس والشياكة والاهتمام بمظهرنا من برة عشان نداري بيه المكسور جوانا ...
احنا وصلنا لـ مرحلة اننا لو طولنا نهاجر لبلد مانعرفش حد فيها ولا حد يعرفنا فيها ... هنعمل كدة
لو طولنا نروح لجزيرة معزولة عن كل البشر هنعمل كده .. كفايه علينا اوي اللي شايفينه من الدنيا مش ناقصاكم كمان تشغلو نفسكم بينا وتركزو في تفاصيل حياتنا اكتر مننا
احنا مش عايزين من حد حاجه ... ولا عايزين نعرف عن حد حاجه .. وكل اللي بنتمناه تسيبونا في حالنا وبس ..
