لا تكن جزء من المجتمع
الناس ف الدنيا دلؤتي بقت مقسومه جزئين
(جزء ماشي علي خطي المجتمع) و (جزء نفسه حره بيفكر ف كل خطوه كويس جدا قبل ما يعملها"لأنه اتعلم من اللي بيحصل حواليه، وبيفكر ايه الصح وايه الغلط ف مش بيمشي ورا المجتمع وخلاص")
#الجزء_الاول:
هتلاقيه بيدخل ثانويه عامه ع (المجتمع) حتي لو هو مش بيحب المذاكره أو ماعندوش طموحات عاليه.
هو اللي بيموت نفسه ف المذاكره وأهله بيضغطوا عليه يدخل كليه من كليات القمه علشان اللقب (والمجتمع) حتي لو عنده اهتمامات وميول تانيه.
هو اللي بيشتغل وظيفه ثابته ومضمونه ع هتجبلو معاش لما يكبر (حتي لو ملاليم) ع ماينفعش يشتغل حاجه بيحبها بس مش مضمونه ع (المجتمع) .
هو اللي بيتجوز اول حد قدامه أو فاهم أنه نصيب واحنا مش بنختار ف مش بيشغل عقله اصلا، لانه لو شغله يا هيتاخر ف الزواج يا مش هيتجوز (والمجتمع) مش هيوافق علي أنه يشغل عقله كده!.
هو اللي لازم ينجب اول ما يتجوز ع طول حتي لو هو مش شخص مسئول أو مايقدرش يتحمل مصاريف بيت واولاد دلؤتي أو مش فاهم يعني ايه تربية اصلا بس ع (المجتمع) مش هيوافق بردوا وهيقول ايه ده هما كل ده ما جابوش ولاد، ده اكيد يا حرام حد فيهم عنده مشكله !.
هو اللي لو لقي نفسه اختار غلط"خصوصا لو ست" هيفضل أنه يعيش في جحيم مع شخص مش مرتاح ومش مبسوط معاه طول حياته ع(المجتمع).
لو أم فاهمه عن الامومه يعني أنضف واعمل اكل واذكر و اودي مدرسه ودروس وتمارين بس
لو أب فاهم أن الابوه يعني يضيع عمره كله ف شغل علشان ولاده يدخلوا احسن مدارس حتي لو بيضغط ع نفسه حتي لو مش بيشوفوه أو مايعرفش عنهم حاجه وشايف أنه التربيه دي مسئولية الست وهو مسئول عن الفلوس
ولما يكون في غلط بالصوت العالي والضرب والأهانه ع انا الاب وربنا ادالي الحق اني اعمل فيك اللي انا عاوزه حتي لو هقتلك عادي حقي !
#الجزء_التاني (بيشغل دماغه وعقله اللي ربنا خلقهوله ع يفكر بيه والله):
ف ممكن مايدخلش ثانويه عامه عادي ويروح للحاجه اللي المناسبه ليه علشان نفسه حره .
ممكن مايدخلش كليه أصلا ويكتفي بالشغل، أو ياخد سنه بريك بين المدرسه والجامعه ع يعرف ايه اهتماماته وهو ممكن يكون شاطر فيه ويعملوا .
بيشتغل الحاجه اللي بيحبها وبيعرف يعملها وبتجيب فلوس وممكن يعمل اكتر من حاجه ف يبقي معاه فلوس بردو تأمن مستقبله حتي لو الناس هتتريق عليه.
مقرر أنه مش هيتجوز اصلا (لانه مش عاوز، أو لأنه شايف أنه مش قد المسئوليه دي) أو أنه عاوز يحقق نفسه الاول ويبقي شخص ناضج كفايه و ذو خبره تؤهله أنه يعرف ازاي يختار صح بقدر الامكان، خصوصا بعد الكم الهائل من الطلاقات والمشاكل اللي بتحصل بسبب الاختيار الغلط وعدم تحكيم العقل ف مالوش دعوه مين بيعمل أو عمل ايه قبله وهو لسه..
هو اللي قرر مش هينجب لانه مش عاوز اطفال اصلا، أو شايف انها مسئوليه كبيره جدا وهو مش قدها، وفي اللي بيأجل القرار ده لحد لما يحس بالاستقرار النفسي والمادي والمعنوي اللي يخليه قادر أنه يتحمل مسئولية بني آدم قدام ربنا وأنه ازاي يطلع شخص سوي عنده اخلاق عارف ربنا ودينه #بجد
هو اللي مش بيربي بنفس التربيه اللي اتربي بيها حتي لو كلها أخطاء وهو نفسه كان بيعاني منها
بيقرا كتب وبياخد كورسات ف التربيه وبيعمل مجهود حقيقي ومش بيكابر ولا بيتريئ ع بتوع التربيه الإيجابيه.
لو أم عارفه أن الامومه أكبر بكتير من المهام المنزليه والرعاية وأساسها التفهم والحب والاحتواء والصداقه ألخ بينها وبينهم.
لو أب ف عارف أنه وجوده مع أولاده اهم من أي حاجه(إحساسهم بوجوده جنبهم وأنه فحياتهم) وأنه لازم عليه أنه يشارك في تربيتهم وان مافيش حاجه اسمها الام بس هي اللي بتربي والاب بيجيب بس فلوس
لما يكون في غلط عارف أنه مش من حقي اني اهين باي طريقه من الطرق او اظلم أو أأمر حد لمجرد أنه ربنا من عليا باني ام اب للشخص ده ف هو مش شئ ملكي .
علينا اننا نختار هنكون اي جزء منهم.
