اعرف شخصيتك من طريقة انتظارك
في طابور طويل أو مكتب إجراءات ، في انتظار طائرة أو قطار ، استخراج رخصة او تأشيرة ....الخ
١-تحاول اثناء الانتظار تنتهز الفرصة علشان تخلص اي شغل عندك مستعجل بالتليفون او الايميل او تحاول تبعث بوست هام علي الفيسبوك او تحاول تعرف اخر الأخبار علي الساحة ..... انت شخص عملي وطموح والوقت عندك من ذهب.
٢- مش قادر تعمل اي حاجة وزهقان بالرغم من ذلك مش عايز تدخل علي الايميل وتحاول تنجز أي حاجة.... انت شخص نمكي ومحنتف وماتقدرش تعمل حاجة الا بشروط وطقوس معينة.
٣- تهز احدي ساقيك او كلاهما بشكل متناوب وسريع قد يضايق من يشاركونك صف المقاعد.... انت شخص عصبي وربما طموح وتسعي الي الكمالperfectionist
٤- بتعضعض ضوافرك بين الحين والآخر او عندما لا ينتبه إليك الاخرين تبدأ في العبث بفتحات انفك ، السيدة او الفتاة التي تبدأ بنتف شعرات من رأسها او حاجبيها ....دي علامات وسواس قهري كامن او صريح يظهر في المواقف المزعجة.
٥- تبحث عن جريدة او مجلة لتتصفحها او تحل الكلمات المتقاطعة و الألغاز او تفتح الفيسبوك لمتابعة اخر الأخبار ......انت محب للحياة ولا تدع للملل فرصة يخطط لك حياتك
٦-تمزح وتضحك مع المحيطين وتداعب الأطفال وتبادر بمساعدة الأبوين اذا بكي طفل... انت مرح واجتماعي وعطوف وعندك قدرة علي العطاء
٧- صعبان عليك حالك انك مضطر تنتظر كتير ثم تبدأ تجتر أحزان الماضي ايام مراة ابوك لما كانت بتحط لك السيخ المحمي في صرصور ودنك وتبدأ عيونك ترغرغ بالدموع .... انت شخص حساس وتميل للاكتئاب ولامؤاخذة نكدي
٨- سيجارة ورا سيجارة اذا المكان يسمح بالتدخين او كل شوية تطلع برة تدخن وتبحث عن أماكن للقهوة
والشاي او الطعام...... انت شخصية تميل الي الادمان الحسي ( في العلاقات) او ( المادي( في الكيف او الطعام) او كلاهما،
مع الوضع في الاعتبار ان الميل الي الادمان ليس معناه ان الشخص مدمن حتي لا ينزعج المدخنون والمتطافسون
٩- بتكلم اللي حواليك بشكوي وتذمر ومفيش حاجة عاجباك ولا يهدأ لك بال الا اذا وصلت طاقاتك السلبية للآخرين وبدأوا يتذمرون مثلك ........ انت متشائم ومشاغب والعيشة معاك هباب والبعد عنك غنيمة
١٠- قاعد هاديء و ساكت وحان دورك وانت ولا هنا، وينادوا علي اسمك او رقمك وانت في عالم آخر.... ... اما ان عندك مشكلة أكلت عقلك وألهتك عن الوجود او انك بطبيعتك بطيء او لا مؤاخذة تعاني من بعض البلادة .
١١- اول ما يحين دورك... أوراقك تقع منك وتضطرب وكأن ماس كهربائي سري في اوصالك ......انت تفكر كتير ا في المستقبل وربما تكون بتحمل الهم عمال علي بطال
١٢- كل شوية تعيد ترتيب أوراقك وتعيد فحصها وخايف تكون نسيت حاجة .... احتمال يكون عندك التركيز ضعيف وعندك إخفاقات سابقة بسبب ضعف التركيز ولذلك انت حاسس ان صوابعك علي طول في الكوبس
١٣- تحب تتأمل المارة وملبسهم وتصرفاتهم وطريقة كلامهم ولا تشعر بالملل طالما ان في ناس قصادك رايحة جاية .... غالبا عندك ميول فنية او ادبية والابداع عندك صفة مميز ك في كل حاجة ان شاالله حتي في الطبيخ.
١٤- نظمت أوراقك ورتبت أمورك ثم جلست هادئا مطمئنا وعندما حان دورك قمت بثبات وأجريت معاملتك بهدوء ثم انصرفت دون ان تلفت اي انتباه... انت غالبا شخص متزن ومنظم وهاديء وصبور ومتصالح مع الدنيا ومع نفسك....
تري أي شخصية أنت؟
