جولة سياحية داخل مدينة مرسي علم
من أجمل مدن البحر الاحمر و أروعها هي مدينة مرسي علم و اللي بتعتبر من المدن الحديثة داخل مصر لأن تاريخ انشائها بيرجع لسنة ١٩٩٥ وهي واحدة من اهم أماكن الجذب السياحي داخل مصر لأنها مركز عالمي للصيد و الغطس.
المدينة كان اسمها مرسي العلم و العلم هنا بمعني الجبل لأنها بتقع علي منطقة مرتفعة المنطقة كانت معروفة قديما ً من ايام مصر القديمة لوجود مناجم الذهب فيها و تم العثور فيها علي العديد من الآثار و النقوش الفرعونية و الرومانية الموجودة علي الصخور بالقرب من مناجم الذهب.
و كمان تم العثور علي طريق قديم بيربط المنطقة بمصر القديمة بيرجع لعهد بطليموس التاني.
يوجد بها محمية صمداي أو بيت الدرافيل او محمية الدلافين, و هي من أجمل و أندر بقاع البحر الأحمر و تعتبر أكبر محمية خاصة بالدلافين في العالم كله لأنها بتضم حسب آخر احصائية ٥٠٠٠ دولفين، بتنام اثناء النهار بين شعاب الصمداي و تنشط بالليل.
توجد بها أيضاً محمية وادي الجمال، و المحمية مقسومة لجزئين جزء بري و جزء بحري، و الجزء البحري بيشمل حوالي ٦٠ كم من ساحل البحر الأحمر.
و في بداية المحمية هنلاقي في نبع مياه عذبة بيمتزج مع مياه البحر و بيشكل مستنقع منخفض الملوحة.
و هنا جزيرة وادي الجمال اللي بتعتبر تاني اكبر تجمع لطائر صقر الغروب و العديد من الأنواع النادرة للنباتات و الحيوانات المهددة بالأنقراض.
كمان هنلاقي الوادي مشهور بنبات المانجروف الممتد علي طول شاطيء البحر.
كمان داخل المياه في مجموعه نادرة من الشعب المرجانية و الكائنات البحرية النادرة زي السلاحف البحرية.
و من أجمل مناطق مرسي علم شاطيء حنكوراب و القلعان داخل وادي الجمال اللي بيصنف من جمل ٢٥ شاطيء علي مستوي العالم.
المياه هنا بتتميز بالصفاء النادر و الرمال شديدة النعومة و المناظر الطبيعية الخلابة، و أهم الجبال المشهورة داخل الشاطئ هو جبل حماطة الشهير.
مرسي علم هي واحدة من أغني المناطق المصرية بمناجم الدهب خصوصاً منجم السكري الشهير اللي بيعد ضمن أكبر ١٠ مناجم منتجة للذهب علي مستوي العالم.
نتمني أن تكونوا قد استمتعتم بتلك الرحلة القصيرة و ما قدمناه لكم من معلومات.
