عظيمة هي عطاياك يارب
بنسي اشكره …
علي كل مرة قولت مش هتعدي وعدت.
علي كل مرة محاضراتي تخلص متأخر وميكنش فيه مواصلات تروحني والاقيه بعت من عنده.
علي كل مرة قولت المادة دي مش هتعدي وعدت وبتقدير عالي كمان .
علي كل مرة نجاني فيها من خطر .
علي كل مرة بيعرفني ويعلمني فيها سواء من أشخاص أو مواقف بتحصلي يومياً.
علي كل مرة كنت فاكره اني وقعت ودي النهاية لكن وقفني علي رجلي من تاني .
علي كل مرة عاتبته بسبب خروج ناس معينة من حياتي وكان ده في مصلحتي علشان تيجي ناس شبهي .
علي كل مرة معرفتش احكي انا فيا ايه والاقي ربنا بيراضي قلبي التعبان والموجوع واللي مش قادر يعبر .
علي اني شخص مكنش فيه اي عوامل أو مجريات حياتي كانت لا تدل نهائيأ اني ممكن اطلع شخص سليم.
علي كل مرة اقعد احسب فيها يمين وشمال والاقيها فجأة اتحلت من عنده
علي أنه بيسمع ويستجيب لطلباتي الصغيرة زي يارب الاكله تطلع حلوة ، يارب الاسانسير يستناني ، يارب العربيه تتحرك بسرعة ، يارب ابعتلي حد يعديني من الكلاب ، يارب اليوم يبدا لذيذ وخفيف.
شكراً يارب انك بعدت ناس من حوالينا مفيش في قلبهم حب وكنت حياتنا هتبقي صعبة معاهم وبعت ناس حوالينا في قلبهم حب حقيقي.
شكرا يارب لانك ساتر علينا وحامينا حتي لو مش فاهمين .. بس مطمئنين.
شكرا يارب لانك غيرت اللي انا رتبته ورتبت اللي انا غيرته.
شكرا علي احساسك بيا علي العين اللي سهرانه عليا وقت ما عيني انا بتنام .
شكرا يارب علي صبرك واحتمالك لنا .
شكرا يارب انك تحتمل قسوة قلبنا وعنادنا وانك بتحتمل أننا نهرب منك وننام وننساك ونعصي اوامرك يارب .
شكرا يارب انك بتحتمل بلا حدود وتعطي بسخاء .
شكرا يارب لانك كثير الرحمه جزيل التحنن .
شكراً يارب لأننا استغلينا رحمتك ومازلت رحيم بينا .
شكرا يارب لاننا استهنا بوصاياك وما زلت محتمل يارب وصابر علينا .
شكرا يارب لانك بتقفل باب وتفتح الف باب غيره .
شكرا يارب لانك ما زلت مصدر الامان وحيد ليا في عالم مرعب مفهوش امان .
أشكرك يارب لانك معايا النهاردة ومش سايبني حتي وانا مستاهلش مفيش مرة اتخليت عني .
اشكرك علي الألم اللي ماتشالش بس قربني منك وعلي الاحتياجات اللي ماتسددتش بس عرفتني اني ممكن اعيش من غيرها.
نفسي اشكرك على كل دقيقة ، علي كل فرحة وكل ضيقه ، علي كل انسان قربني منك ،علي كل كلمة سمعتها عنك ، على كل حاجة كنت فاكرها حلم حولتها حقيقة ، علي كل سنده منك في كل لحظة في عمري .
شكرا يارب لانك سترتني وانا بعمل خطية واعنتني وانا بعيد عنك وحفظتني من كل صراعات العالم وحروب الاكتئاب وقابلني برغم كل اخطائي وعيوبي .
اشكرك يارب علي كل يوم جديد تعطيه ليه كفرصه لكي اتوب وارجعلك .
اشكرك يارب علي نعمة الغفران التي تعطيها لي بدون اي مقابل .
شكرا لان حتي لو تيارات الحياة أخدتني أحيانا بعيد شوية بتفضل نعمتك شايلاني بشكل مبهر عمري ماكنت استحقها .
يارب اشكرك لانك برغم انك خالق الكون بكل ما فيه إلا انك تراني ، تهتم بي ، ترعاني .
اشكرك لان تفاصيل حياتي مهمه لديك وانك تسمع لصلواتي وآهاتي وتنهداتي وتري دموعي وخفايا قلبي وتشعر بمشاعري.
ساعدني أن أرفع عيني عليك لاراك مهما كان ما أمر به .
شكرا يارب علي عائلتي واصحابي شكرا انك دايما حاميهم وساترهم .
شكرا علي صحتي يارب .
المرة دي مش هطلب حاجة انا بشكرك علي كل ما لدي .
