مين اللي قال إن الإهتمام مبيتطلبش؟

مين اللي قال إن الإهتمام مبيتطلبش؟
لا بيتطلب عادي يا اخواننا !! أو بصراحة أنا شايفه انه بيتطلب و مبيطلبش الاتنين !.. 
يعني ليه احط اللي قدامي في حالة المفتش كرومبو طول الوقت و يبقي مطالب يفهم و يخمن حاجات انا نفسي مش فاهم اسبابها ايه او عايزها ليه.. او حتي لو فاهم فهي برضه مازالت جوايا !! ليه بنعمل كده ؟ 
طبعا مطلوب اوقات اني اتفهم من غير ما اتكلم بس متطلبوش المعجزات يعني قبل ما ابقي مستني ده من اللي قدامي لازم افكر ف شوية حاجات..
يعني هل هو يعرفني لدرجة انه يقدر يكون فهم ده !؟
طب هل الشخص ده علي مستوي من الامكانيات من قوة ملاحظة و ادراك لنفسيات البشر و خبرات في الحياة اللي تخليه يفهم انه يعمل اللي انا عاوزه ده
طب هل اللي انا عاوزه ده منطقي اطلبه ؟ هو مطالب بيه؟ 
و اسئلة كتير بصراحة مش دول بس.. 
لما يبقي منطقي ان اللي قدامي يفهم ده.. هو يعرفني كويس.. عشنا مواقف زي دي قبل كده و عارف انا عامل ازاي و بحتاج ايه.. قادر نفسيا يعمل ده.. واخد باله.. مطالب بده.. لمحتله.. لما يبقي كل ده او اللي يكفي منه ساعتها ممكن نتكلم و نقول إن الشخص ده مش مهتم.. أو مش بيفهمني.. و نحس بالإهمال أو عدم التقدير.. 
انما غير كده احنا مش هنخترع بصراحة .. مفيش ما يمنع انك تيجي للي بتحبه و تقوله علي فكرة في الموقف الفلاني كنت محتاجك تعمل كذا و كذا .. 
مش لازم لما تبقي متضايق و محتاج حد يديك اهتمامه تفضل ترميله في كلام انك مخنوق و لو ماخدش خطوه و قالك احكيلي مالك يبقي الدنيا خربت !! مفيش ما يمنع انك تكلمه تقوله عايز احكي معاك شويه .. متضايق !! ايه الصعوبه ف كده.. 
ايه اللي يمنع اننا نعبر عن اللي جوانا مشاعر الاحتياج مش معناها انك بتقلل من كرامتك ! و المفترض ان الدايره الصغيره اللي حوالينا تكون فيها ما يكفي من الاريحيه اللي تخلينا مبنحطش حسابات ل مين بيبدأ كلام ف ايه ! مفهاش الحسابات العويصه بتاعت انا مش هروح اقوله اسمعني.. طب و فيها ايه لما تقوله اسمعني لو مسمعكش ابقي ازعل يا سيدي.. 
رغم أنه ممكن ميكونش قادر يسمعك لإنه أصلاً ضايع من جواه و فيه اللي مكفيه و أكتر و ممكن يكون محتاج لحد يحكيله و مش شرط الحد ده يكون انتا علي فكرة ..
مش بلغي فكرة اني احيانا طبعا هحتاج حد يحس بيا و ياخد خطوه تجاهي لما اكون مش قادر ابادر بده.. لكن مش علي طول.. مش دا العادي.. العادي في نظري اننا نبقي بنتعامل اوضح و بتلقائيه اكبر.. بنطلب وجود بعض و بمنتهي السهوله و السلاسه .. بنفهِّم بعض احنا بنحتاج ايه و بنشرح لما حد يكون مش فاهم.. كلنا لينا مفاتيح غير بعض.. اللي قدامك بنسبه كبيرة مش هيبقي فاهم كل حاجه مش هيفهم غير اللي انت هتظهره من كلام .. افعال .. مواقف.. فلو فضلت قافل علي افكارك و الحاجات اللي بتحبها و الحاجات اللي بتحتاجها و مستني منه إنه يفهم و يتعامل مضمنلكش ان ذكائه يسعفه فاانه يفهم اكتر من ٣٠% من كل ده و الباقي هيفضل محبوس جواك و هيفضل الطرف التاني مش عارف يتعامل معاه.. 
الاهتمام بيتطلب و بيتفهم و بيتشرح "احيانا" عادي علي فكرة !..