القصة الحقيقة لسفاح الجيزة

سفاح الجيزة القصة الحقيقة كاملة

ايه قصة سفاح الجيزة ،الي اتعملت مسلسل اليومين دول وهل فعلا الأحداث الي فيه دي حدثت حقيقة ولا لا ؟

بداية حكاية سفاح الجيزة 

بتبدء الحكاية مع شاب اسمه قذافي فراج عبد العاطي  المعروف بسفاح الجيزة  ودا لانه من مواليد الجيزة وسفاح بمعني الكلمة لذلك اشتهر بسفاح الجيزة .

زواجه من فاطمة الزهراء 

سنة 2014 راح يتقدم لواحدة اسمها فاطمة الزهراء  وكانت يدوب لسه مفركشه مع خطيبها الأولاني  القذافي أول ماراح يتقدملها اترفض علطول من أول مرة ودا لان لبسوا مكانش مترتب مكانش لابس كويس يعني وحتي طريقة كلاموا كان بيتهته ومش عارف يقول كلمتين علي بعض ولحيته من تحت كان مربيها حبتين المهم  يعني الدخله بتعته معجبتهمش وكان لابس جلبيه قصيرة وتحتها بنطلون بس شكله كان غلبان حبتين حبتين تلاتة يعني 

ولكن قذافي مستسلمش  علي نهاية السنة راح واتقدم تاني بس ساعتها كان مقصر لحيته وكان لابس بدلة وشكله شيك واوخد كمان ناس من قرايب فاطمة علشان يتكلموا كلمتين حلوين لعيلتها ويوافقوا علي الجوازة   وبالفعل اهلها وافقوا مبدئينا عليه وبعتوا بقي عشان يسألوا عليه ويشوفوا اخلاقه ويعرفوا دنياتوا عاملا ازي ويتفاجئوا ان الناس كلها في المنطقة بتحلف بإخلاقه وإن هو رجل تقي ويعرف ربنا وكويس جدا شاب غلبان وملتزم وعينه دائما في  الأرض دا حتي قالوا عليه مبيسلمش علي ستات المهم وافقوا علي الخطوبة 

وهنا القذافي بدء يتعرف علي فاطمة  كويس وعرف كل حاجة عنها بتحب ايه وبتكره ايه وبدء ان هو يكون قريب اوي منها وفاطمة فعلا حبته في الآخر واتجوزوا هما الاثنين 

صدمة زوجة القذافي ،وأول ضحاياه، وعلاقته بإختها !

 فاطمة مكانتش تعرف ان هي اتجوزت سفاح وقاتل متسلل ودا لانه قبل ما يتجوزها كان متجوز واحدة تاني وخلص عليها 

دا كمان هخلص علي أختها هي كمان وبيقال اصلا إن القذافي كان متجوز فاطمة عشان يعرف يقرب من أختها نادين ويخلص عليها وينتقم منها هتسأل نفسك دلوقتي طب ليه عايز يخلص علي أختها ايه الي بينهم يعني الحقيقة هو كان علي علاقة بيها و إنه الفترة الأخيرة بدءت تهدده ييجي ويتقدملها 

طبعا أخت فاطمة والي كان اسمها نادين  كان عندها حلم وإني هي تبقي ممثلة  وتعمل اعلانات كتير وتبقي مشهوره وأول ما لقيته بيتقدم لإختها بدءت تهدده إني تعرف اهلها كل حاجة وتبوظ الجوازة بس قذافي كان ذكي وبدء يلعب علي حتة إني نفسها في التمثيل وفعلا نادين وقتها كانت عاملها كذا اعلان ولكن كانوا اعلانات صغيرة متنشرتش حتي علي التليفزيون اتحطت علي اليوتيوب بس وقالها إنها لو كتمت السر هكلملها منتج سوري هعمل فيلم كبير هتصور في الأردن وهي تسافر تصور الفيلم هيبقي الفيلم كبير وضخم وبعدها هتعمل اعلانات كبيرة وتتشهر في الوطن العربي كلوا وبالفعل في الأخر نادين وافقت 

موقف أهل نادين من سفرها بره مصر لتصوير فيلم كبير؟

 أهلها كانوا رفضين المبدء دا مكنوش عايزين البت تسافر وتسبهم عشان  المفروض اني العقد بتاعها هقعد تلت سنين هتفضل التلات سنين دول بره مصر مبتنزلش ولا أجازة بس نادين فضلت إني هي  تقنع فيهم وتقولهم ان هي هتكلمهم فيديوا كول علطول   ومش هتسبهم وهتفضل معاهم اليوم بيوم بس بعد الزن بتاعها طبعا في الأخر وافقوا وبالفعل البنت سافرت ولكن للاسف البت مكلمتش اهلها فيديوا كول خالص

 ولمدة سنة كاملة ومحدش شاف وشها تاني وحتي المكالمات الي كانت بتعملها في التليفون كانت بتكون دقيقة دقيقتين بالكتير مش أكتر من كدا وبتقفل وفي معظم الأوقات كمان كانت بتتحججلهم اني رجليها واجعاها وعندها مغص مش هتقدر تتكلم وحاحات من دي  والمرعب في كل دا اني الأرقام الي كانت بترن عليها منهم كانت ارقام مجهولة مش متسجلة ولا باينه

 وفضل الوضع كدا لحد لما اهل نادين بدءوا يشتكوا لقذافي ويقولولوا  دا حصل واحد اتنين تلاتة  بس المريب بقا اني قذافي كان بيبرر الكلام دا كلوا وانه المدافعة بتاعته والمبرارت الي كان بيقولها خلت الاهل يبدءوا  يشكوا فيه وخصوصا كمان بعد  ما طلب منهم انهم يدولوا اللابتوب بتاعها عشان يوديهلها ام نادين كانت حاسه اني بنتها في خطر ولكن قذافي قالها لو خفت وبقيت كويسة انا هكلم صاحبي السوري وتروحي تزوريها بس بعد الكلام دا اهل نادين مسكوه ضربوه فعلا وبعدين بعدها بيجيلهم  مكالمة من نادين والمكالمة كان فيها حاجات شخصية اوي زي ذكريات قديمة وحاجات كانت بتعملها هي وصغيرة حاجة تأكدلهم يعني اني نادين الي بتتكلم واني هي كويس يعني ومفيش حاجة والمكالمة دي صبرت أهل نادين شوية كل دا لحد ما قذافي خلاص بيجهز اني هو يتجوز اختها فاطمة

 وقتها قذافي قرر هو يسيب وظيفته الأساسية ويتجه يشتغل في العقارات وبالفعل الموضوع بدء يلعب معاه ويجيب منه فلوس ودا بسبب اني صاحب عمره البشمهندس رضا كان مسافر بره وكان دائما بيبعتلوا فلوس عشان يشغلهالوا ويشتري بقي عقارات او يأجرها والحاجات دي  ويجيبلوا من وراها عائد

قصة البشمهندس رضا وتسميمه وقتله علي يد سفاح الجيزة

 البشمهندس رضا صاحب القذافي كان الوضع المالي بتاعه حلو جدا وكان شغال في السعودية فكان القذافي بيقنعوا  اني هو يشتري عقارات يأجرها وياخد من وراها مكسب ويشتركوا هما الاتنين  فيها فهنا البشمهندس رضا فلوسوا بتزيد والعقار تمنه بيزيد وبيأجره والقذافي بياخد عمولة زيوا زي  اي سمسار وبالفعل البشمهندس رضا وافق وكان بيبعتلوا فلوس كتير علشان يشغلها دا كمان خلي عيلته كلها الي عندوا اي عقار او عنده اي شقة عاوز يأجرها كان بيخلي قذافي يأجرهالوا

  بس البشمهندس رضا مكانش يعرف ان الفلوس الي بيبعتها لقذافي هو بيصرفها علي نفسوا مبيعملش بيها حاجة زي ما بيقول فمع الوقت بدء البشمهندس رضا اني هو  يشك في قذافي فقرر اني هو ينزل بنفسوا مصر ويتأكد انه بالفعل الكلام الي بيقولوا قذافي صح وعموما في نفس الوقت كان فيه ست غريبة بتكلم قذافي وكانت بتشتموا وتسبلوا وبتطلب منوا فلوس بطريقة بشعة والغريب كان بيبعتلها فلوس فعلا مكانش بيرفضلها طلب وعلي حسب وصف فاطمة مراتوا  كان بيبعت للست دي فلوس حتي  لو  طلبتها في نص الليل .

البشمهندس رضا ساعتها لما قرر ينزل مصر قال لمراتوا اني لو لقي اني القذافي بيضحك عليه او في اي حاجة مش علي هواء   هفض الشركة الي ما بينهم وياخد الفلوس وعلي عكس المتوقع اول ما رضا نزل مصر قذافي استقبلوا احسن استقبال دا حتي رحلوا في المطار وقاعد يحضنه وكان هيطير من الفرحة وقرر كمان انه هو يعزموا علي الأكلة الي بيحبها  وهو  الكشري انا عايز اقولك انه البشمهندس رضا اول ما شاف قذافي وشاف الفرحة الي في عينيه لما استقبله اي شك في دماغه كان خلاص  اتشال ولكن قذافي الطيب البرئ الهادي سمم الكشري الي كل منه البشمهندس رضا واول ما رضا حس انه فيه حاجة غلط بدء يستغيث قذافي جاب حديدة ونزل بيها علي دماغه عشان يتأكد أنه هو خلاص مات واول ما خلص عليه مش يندم بقي ويسيبوا هو ويروح يدفنوا لا حطوا في كيس في شقة كان محضر فيها مكان زي القبر وراح رامي فيه الاكياس دي ودافن عليها

هل استخدام القذافي للسم لقتل رضا كانت اول مرة يعملها ؟!

 انا عاوز اقولك انه المره دي ماكانتش اول مرة القذافي يستخدم فيها السم لانه سمم مراته الأولانية برضوا إلي بالصدفة كان اسمها فاطمة وخلص عليها لانه كان سالف منها تقريبا ربعمائة الف جنية ومردهمش ولما كانت بتطالبوا بفلوسها بدء انه هو يتعصب وجاتلو  بقي فكرة انه يخلص عليها  وبعد ما سمها راح مقطعها برضوا حتت وحطها في الفريزر عشان تتجمد ومفيش ريحة تطلع وبرضوا نقلها لنفس الشقة الي ادفن فيها صديق عمره البشمهندس رضا

 وخلي بالك نفس السيناريو دا كان بيحاول يعملوا مع عيلته الأصلية الي هي فاطمة الزهراء وعيالها وكان بيحاول يسمهم اكتر من مرة ولكن لحسن حظهم انهم كانوا بينجوا  منها وبيروحوا للمستشفي ويلحقوهم وينقذوهم من التسمم

موقف عائلة البشمهندس رضا بعد اختفاءه 

  قذافي بعد ما عمل كدا في صديق عمره رضا لقي انه اهله عاملين بيسألوه علي ابنهم راح فين ومن كتر الشك الي هما كانوا فيه والأسئلة الي كانوا بيسألوهالوا  قرر انه هو يسيب القاهرة خالص ويبعد عنها 

 طاب ياتري القذافي هيختفي ازي من غير ما حد يعرف راح باعت رسالة للمحامي بتاع عيلة رضا وقالهم انه هو اتقبض عليه من أمن الدولة وبسبب انه اللحية بتاعته كبيرة فمحدش شك في دا  ونفس الكلام باعته في رسالة لمراته فاطمة وقالها نفس الحوار ان هو اتقبض عليه من امن الدولة بسبب  لحيته الكبيرة.

قصة ضحية السفاح ياسمين نصر ابراهيم 

 القذافي بعد ما ساب القاهرة  اتعرف علي واحدها تاني اسمها ياسمين نصر ابراهيم  وبدء يلف عليها واكتشف انه هي كان معاها مبلغ كدا حاجة واربعين الف جنية فبدء يقنعها انه هو يشغالها الفلوس دي ويدخلها عائد شهري وبالفعل اقتنعت بكلاموا واداتوا الفلوس بس زي ما متوقع مرجعلهاش حاجة والوقت بيعدي فبدءت انه هي تشك فيه وتطالب بفلوسها

 فلما عرف انه هي ممكن تعملوا مشاكل راح قالها تعالي في المخزن بتاعي الي في العصافرها وخدي بفلوسك اي إجهزة كهربائية وهعمل معاكي الصح وبالفعل البنت راحتلو هناك واول ما وصلت راح خنقها وخلص عليها بس ساعتها بقي دفنها مكانها 

قصة نها وسرقته لذهبها !؟

ولسه ما استريحش من جريمة ياسمين الي عملها دي ويتعرف علي بنت من عيلة كويس جدا وغنية اسمها نها وكانت دكتورها صيدلينها طبعا هتسأل نفسك ازي واحدة زي دي توافق بواحد زي قذافي فحب اقولك انه هو في الفترة دي كان منتحل شخصية صاحبه رضا لانه معاه البطاقة بتاعته وكل الأوراق بتاعته فكان مش معروف انه هو قذافي ولا حاجة هو اسمه البشمهندس رضا وكان باين كمان انه هو معاه فلوس مش حد كحيان يعني فبشمهندس وغني فساعتها لفت نظرها وبالفعل اتجوزوا وقاعدوا مع بعض فترة 

بس هنا القذافي معرفش يعمل حاجة في نها لانه بعد فترة طلبت منه الطلاق وبالفعل طلقها وسابها ساعتها قرر انه هو ميخلصش عليها وكفاية عليه انه هو يسرقها وياخد الدهب بتاعها وبالفعل لبس نقاب وطلع للشقة بتاعت عيلتها وهما مش موجودين فيها وسرق كل الدهب الي جواها عيلتها كانت غنية زي ما قلتلك فكان معاهم شوية دهب حلوين اوي في الشقة وفيه فلوس كمان هو خد الهبرة دي كلها وهرب طبعا عيلة نها مكانوش شاكين في اي حد غير القذافي الي اختفي فجاه من الوجود  فبلغوا عنه وبلغوا عن كل الحاجات الي اتسرقت من الشقة 

قصة حبه لمي والقبض عليه 

في الوقت الي بلغ فيه عيلة نها عن القذافي وسرقته،   قذافي ساعتها  كان بيتعرف علي واحدة تانية اسمها مي وساعتها اتعرف عليها باسم تاني خالص وهو مصطفي محمد وكان مفهمها انه هو غني جدا وعلي الاساس دا فضل يتعامل القذافي علي انه معاه فلوس وغني علشان يبهرها  ويلفت انتباهه

 وبالفعل الفلوس بتاعته بدءت انه هي تخلص ،ساعتها بقي مي دي مكانش بيلف عليها ولا حاجة بالعكس دا هنا حبها بجد وقع يعني وكان بيحاول بكل الطرق  انه هو يتجوزها وتبقي بتاعته

 وبدء بقي لما الفلوس تخلص انه هو يبيع في الدهب الي كان سارقه من عيلة نها فمش يبيع شوية شوية وفي اماكن متفرقة لا دا جاب الشنطة كلها الي سارقها وراح بيها لمحل واحد وبما انه الدهب دا كان متبلغ عنه من فترة قصيرة فالراجل بتاع المحل شك فيه وبلغ البوليس وحاول انه هو يأخره شوية وهو واقف عنده لحد ما الشرطة جات وقبضوا عليه

 بس ما اتقبضش عليه باسم مصطفي محمد ولا قذافي حتي لا باسم البشمهندس رضا وطبعا اهل البشمهندس رضا كانوا مبلغين انه ابنهم اختفي فجاتلهم رسالة وجالهم خبر انه ابنهم موجود في القسم ومقبوض عليه وعلطول سافروا اسكندرية عشان يشوفوا ابنهم ويتفاجأوا  انه هو قذافي فبلغوا بقي الشرطة الي حصل قبل كدا وبدءوا يضغطوا علي قذافي واعترف بكل الجرائم بتاعته طبعا بعد كل الي عملوا قذافي دا اتحكم عليه بالاعدام

اسئلة مرعبة

  في نقطة لسه مفتوح هي البنت نادين راحت فين الي كان معرف اهلها انه هي مسافرها الأردن بتصور فيلم ولحد النهارده ما حدش عارف هي عايشة ولا ميتة ولا فين المكان بتاعها وحتي الأماكن الي قال عليها قذافي انه هو دفن فيها نادين الشرطة اول ماراحت ملقتش الجثة بتاعت نادين دا بالعكس دا لقوا عضم وبقايا جثث لناس تانية ميتة ملهمش علاقة بنادين دا الغريب انه اهل نادين قالوا انه قذافي لما كان بيقنعها للسفر كان المفروض معاها بنتين اتنين هسافروا معاها فهل البنتين دول بردوا ضحايا ولا ايه الدنيا 

طاب ياتري مين الراجل الي مثل انه هو منتج

 ومين بردوا  الست الي كانت بتطلب من قذافي فلوس وكان دايما بيبعتلها وميتأخرش عليها

الخاتمة

 تفتكر فعلا شخص واحد يقدر يعمل الجرائم دي كلها في وقت قصير من غير ما يتمسك عليه حاجة ولا قذافي فرد من عصابة وفي ناس تاني معاه، وعموما دي تكون قصة سفاح الجيزة ،عرفني بقي انت رائيك في الكومنتات هل تفتكر فعلا انه هو لوحده ولا فيه معاه ناس تانية وهما تشكيل عصابي ،اصل الجرائم دي كلها بالسرعة والدقة دي يعني  صعب انه واحد يعملها وتفتكر برضوا نادين راحت فين عرفني رائيك وعرفني علي اي موضوع حابب يتعمل الفترة الجايه .