قبل قرار الزواج
قبل ما تقرر/ى إنك تتجوز/ى
يبقى لازم تكون انت/ى الأول جاهز/ه للجواز
قبل ما تقول انا عايز واحده محترمه وبنت ناس وتكون كمان ست بيت شاطره تاكل من ايديها لقمه حلوه وتحافظلك على بيتك و اولادك ف غيابك وتلبسلك اللى انت عايزه وتملا عينك وتكون نضيفه ف نفسها و فبيتها شوف انت الاول هتقدملها ايه 
وانتى كمان يا اللى هتبقى زوجه و أم قبل ما تقولى عايزه راجل يحتوينى ويريحنى ويبقى اد المسؤوليه ويكون سند و أمان ليكى ولأولادك ويخليكى عايشه عيشه كريمه شوفى انتى ياترى جاهزه للمسؤوليه دى وتساعديه يغض بصره ويعف نفسه ويلاقى فعلا معاكى السكن اللى ربنا قال عليه " وخلق لكم من أنفسكم أزواجا لتسكنوا إليها "
أصل التجهيز مش بس فلوس وشقه وشبكه وأجهزه..دى اسمها وسائل مساعده للمعيشه وممكن تتقضى بأى حاجه حسب الامكانيات
لكن المهم انك انت/ى نفسك تكون/ى اد مسؤولية الجواز وعارف/ه إيه المطلوب منك فالعلاقه اللى ربنا سماها ميثاق غليظ
ولو بصينا حوالينا ف حالات الطلاق هنلاقى في منها نسبه كبيره بيكون سبب الطلاق ان طرف من الاتنين غير مؤهل اصلا ولا يصلح للجواز..
سواء كان شاب متدلع من صغره ومش متعود ع المسؤوليه وفاكر ان كل دوره ف الجواز هو انه يجيب مصاريف البيت وخلاص لكن ملوش دعوه ب اى حاجه تحصل جوه البيت ولا يهتم ب زوجته ولا اولاده ويرمى الحمل كله على مراته
أو تلاقى واحده مهمله ف نفسها وكسوله ولا بتعرف تسلق بيضه حتى وتدور على فارس الاحلام اللى يحبها ويحترمها ويحتويها
الجواز مشاركه وهات وخد مش طرف واحد بس هو اللى يشيل كل حاجه والتانى يتفرج عليه ومش عايز يساعد ان البيت يستقر ويبقى قائم على الموده والرحمه والمشاركه وتحمل المسؤوليه
كل ده هينعكس على حياتكم بعد الجواز وهيخلى اولادكم يفتخروا بيكم لو كل واحد عرف ايه اللى بيسعد التانى ويعمله
مش عيب ان الواحده ف بيتها ولجوزها تلبس اللى يحبه وتتزين وتملا عينه وتساعده على غض البصر بدل ما يغلط و يبص بره
ومش هيقلل من رجولتك انك تساعدها ف البيت وتقف معاها وهى بتعمل الاكل او تنشر الغسيل بدالها
والنبى عليه الصلاة السلام كان بيعمل بعمل أهل بيته ويخيط نعله
فياريت قبل ما تقرروا تتجوزوا شوفوا الاول مؤهلاتكم الشخصيه ايه للجواز مش تتجوزوا بمبدأ الحق اتجوز عشان القطر بيجرى وجوازه والسلام
استقرارك هيبدأ من اختيارك
