حل مشكلة عدم الزواج بسبب القدرة المادية

 " الزواج خيرٌ لابد منه "
محاربة مني لكلمة " شر " لإن الله لا يجعل سنته في كونه شرا أبدا ..
شُفت تعليقات متعبة نفسيا كلها بتدور في فلك
هات نص مليون وأنا اتجوز
هات مليون وأنا اتجوز
وقال أحسنهم حالا .. هات ربع مليون وأنا اتجوز
والله الذي لا إله غيره قد شهدت زواجا كاملا لم يكلف غير 20.000 جنيه وسُعداء جدا وحياتهم جميله وهادية ومستقرة..

تعال أقول لك إزاي بقى ‼️
🔘هتعمل ثورة وانتفاضة حقيقية على أعراف المجتمع البالية والموروثات المتـخــ..ــلفة والتباهي والعنطزه والأنعرة الكدابة، ومقارنة الناس ببعضها.
🔘انت كرجل حط لي ده حلقة في ودنك... 
بتصدق النبيﷺ؟ 
أكيد بتصدقه.. 
كلامه وحي؟ 
أكيد كلامه وحي من عند الله.. 
هل ممكن ربنا يوعدك بحاجة ويُخلف؟ 
حاشاه جل وعز ... 
طيب خد يا باشا وعد من رب العزة أهو قال ﷺ {ثلاثةٌ حقٌّ على اللهِ عونهم المجاهدُ في سبيلِ اللهِ، والْمُكَاتَبُ الذي يريدُ الأداءَ، والناكحُ الذي يُرِيدُ العفافَ} ربنا جعل حقا على نفسه إنه يعينك.. خذ خطوة الزواج إذا كنت تقدر عليها نفسيا وعندك شغلك اللي تفتح بيه بيتك، حط رجلك على أول سلمايه وهتلاقيها مشيت معاك زي السكينة ف الحلاوة.. إن الله لا يُجرَّب .. يعني صدِّق وعد ربك على لسان نبيك ﷺ وشوف فتوحات الرب الكريم الذي لا يعجزه شيء في الأرض ولا في السماء.
🔘إنت كأب وعندك عروسة رزان جميلة وعايزلها الخير ركز معايا جدا.. وانتي كعروسة قادرة على الزواج ركزي كمان
قال سيدي ﷺ {إِنَّ مِنْ يُمْنِ الْمَرْأَةِ: تَيْسِيرَ خِطْبَتِهَا ، وَتَيْسِيرَ صَدَاقِهَا ، وَتَيْسِيرَ رَحِمِهَا} 
بص كده يا أيها الأب الكريم.. قال سيدي ﷺ { أَعْظَمُ النِّسَاءِ بَرَكَةً ، أَيْسَرُهُنَّ مُؤْنَةً } 
وقال { أعظم النِّكاح بركةً أيسره مؤنة } طيب هو انت عايز لبنتك البركة والكرم وحياة مستقرة وسعادة ولا الدنيا ايه؟
🔘زواج يعني اتنين عندهم الكفاءة اللازمة لإقامة بيت متزن وهادي ومستمر، ومستقر..  يعني سكن ومودة ورحمة.. ده ببساطة تعريف الزواج.. أرجوك فكر في أبعاده علشان تستوعب ايه حقيقة المطلوب منك، يعني مفيش في تعريف الزواج نفرش عزالها في سوق الجمعة ونصوره لايف ونعمل الفيديو ممول على انستجرام.. خالص يا حاج .. خالص يا بنتي .. خالص يا ولدي والله..

آخر حاجة هقولهالك ونبدأ الجد بقى .. انا كـ أُسَيْم في يوم من الأيام كنت بقبض 300 جنيه أول عن آخر في بداية شبابي، وتمنيت بس وكنت بنام أحلم بإني أقبض 500 جنيه .. كنت حاسس إني كده هابقى ملك والله، بعد سنة واحدة من هذا التمني قبضت 3500 جنيه .. عارف إيه اللي حصل؟ تمنيت لو يبقوا 6000 بس وكنت حاسس إني هابقى ملك .. لكن بعد معافرة كتير في الحياة عرفت إنك بتحط نفسك في المستوى اللي تقدر تعيش بيه، وإن أكثر حاجة تتعبك وتخنقك هو بس انك حاطط نفسك في مستوى لا يناسب دخلك، أي دخل هيبسطك وهيعيشك والله .. انت اللي ساجن نفسك وحابسها في احتياجات غير حقيقية " الإنسان أسير احتياجه " وكل شيء بيتم تسويقه ليك معتمد على خلق احتياجك للشيء الأول.. وأي حاجة بعد كده سهله.
انت عارف النبيﷺ لما قال عن حد إنه عنده الدنيا كلها بحذافيرها كان إيه التفاصيل؟ 
{ مَنْ أَصْبَحَ مِنْكُمْ آمِنًا فِي سِرْبِهِ مُعَافًى فِي جَسَدِهِ عِنْدَهُ قُوتُ يَوْمِهِ فَكَأَنَّمَا حِيزَتْ لَهُ الدُّنْيَا بِحَذَافِيرِهَا }
عنده قوت يومه 
مش قوت الشهر 
مش مصاريف السنة 
أكل النهارده بس .. ده كده مالك الدنيا باللي فيها والله .. أصل أنا بصدق النبي وباخد كلامه مينفعش يتراجع :)

يلا ندخل في الجد ‼️
علشان تقدر تُحد نفقات الزواج لأقل شيء ممكن
▪اختار بيت محترم وأب لعروستك راجل بحق، مش بتاع أنعرة كدابة، عايز يسعد بنته ويسترها ويبني بيها أسره مستقرة، مش جاي يقشطك.

أقرا المزيد
الاستعداد الجنسي قبل الزواج بشهرين

▪خليك راجل بتتقي الله علشان تستحق فضله وكرمه معاك وإعانته لك.
▪حدد إمكانياتك واستطاعتك وقدرتك وقدرة أهل زوجتك بدون ما تضحك على نفسك، خليك صادق مع نفسك .. الـ 20 ألف يزوجوك والــ 50 كذلك وربما أقل من كده يزوجك والأكثر أكيد يتم الأمر .. انت بتحدد إمكانياتك ولا تتجاوزها بحال من الأحوال .. بل لو معاك 100 ألف اعتبر ان معاك 70 واشتغل على كده وهي هتمشي.. علشان غيرك معاه عشرين ومشيت. 
▪هم دبلتين أو خاتمي زواج .. فكك من الشبكة علشان هي بتاعت منظرة وخليك راجل ولما ربنا يمن عليك برزق واسع هات لزوجتك دهب وابسطها.
▪مفيش حفلة خطوبة وصرف عا الفاضية والمليانة.. الأسرتين يتجمعوا عند العروسة والدنيا تتلم ببيسي وعلبة جاتوه تجيبها في إيدك من أي محل معقول.
▪لو عندك شقة تمليك وجهزتها ف انت مستثنَى من اللي هقوله ده، لو مجزتهاش ف انت معانا في اللي هقوله .. إيجار جديد في منطقة بسيطة في عمارة بسيطة بمدة معقوله 3 سنين مثلا، بإيجار بسيط، تديها وش نظافة وتلم الأمور بأقل أقل أقل التكاليف.
▪مش محتاج تجهز غرفة الطفل دلوقتي، ولا محتاج تجيب النيش، وأنتريه واحد في الصالة، ومتفرشش غرفة صالون، وحتى لو هتقفل غرفة في البيت وهتبقى فاضية خالص محدش واقف لحضرتك يتفرج عليك .. ولا انت اصلا محل تقييم .. ولا محل مقارنة بحد، ومتسمحش لحد سـخــ..ـيـف يمارس سخافــ..ــته عليك، وأي حد رأيه ملوش لازمه حطه تحت رجلك وعدي، في الآخر انت اللي هتعيش انت وهي في الشقة دي البيه ده مش هييجي يبات عندك .. فـ فكك
▪كل العفش تجيبه قبل ما يتدهن، يعني خشب سادة، وأي ورشة كويسة تدهنهولك، هتوفر رقم كبير فعلا.
▪اكتب كل العفش اللي هتحتاجوه علشان عينكم متزغللش على حاجة وانتو بتشتروا ومتقدروش تمسكوا نفسكم، يعني حدد هدفك بكل نضج وفكك من احتياجات نفسك اللي ملهاش لازمه.
▪أساسيات العفش بدون اعداد غير منطقية يعني متروحش تجيب 30 لحاف و 130 فوطة، انت مش هتفرش قرية سياحية، الأساسيات من غير اشتغالات لنفسك، الأساسيات دي يعني مالا يمكن العيش بدونه، يعني غسالة الاطباق ملهاش لزمه دلوقتي، المايكرويف ملوش لزمه، الفرن الكهربا المنعزل ده ملوش عازه، بوتاجاز بفرن اربع شعله مش 150 شعله، غسالة بسيطة جيدة تقضي الغرض، ثلاجه عادية جدا مش 450 قدم، ادوات المطبخ البسيطة بعدد منطقي وبسيط يقبل العزومات العادية اللي هتتم عندك، وهكذا، خليك واعي ومحترم هتوفر رقم محترم جدا
▪عفش البيت إذا كنتو هتجيبوه كل واحد فيكم عليه شوية حاجات، ابعد عن الماركات الكبيرة، الغاليه، ركز في جودة اللي انت تجيبه، ابعد عن فترات الزواج الموسمي، دور على أفضل سعر للحاجة اللي انت هتجيبها، استفيد من أوقات التخفيضات، ومتسربعش نفسك في الشراء على وقت الزفاف، ف من الأول كده حدد وقت للزفاف تكون عارف انك هتاخد نَفَسَك وانت بتجهز شقتك.
▪بلاش تدخل جمعية بكل قبضك وتكون الجمعية دي مكملة معاك بعد الزواج، لإنك هتشد شعرك، ركز بحيث إنك تقبض وتفرش وتخلص الجمعية وبعدين تتزوج. 
▪العقد والفرح في مسجد بسيط، ويكون فيه مكان للنساء، تخلصوا العقد وتوزعوا عصير للمعازيم وبلح وتركبوا عربية صاحبك اللي جاي يوجب معاك وتروحوا على بيتكم .. لو البنت عايزه تفرح هي وصاحباتها سيبها في بيتها مع صاحباتها قبل الفرح بيوم يعملوا هيصة وزمبليطه ويرقصوا براحتهم.
▪الفوتوسيشن بيموت بعد كام مرة من مطالعتكما للصور وفرحتكما بها، ولا ليه اي تلاته صنف اللازمه، البدلة بتاعتك اجرها، فستان العروسة يتاجر .. ده هو يوم وبعدين مش هتحتاجوه .. كل اللي اشتروا لبسوا في إنهم مش لاقيين مكان اصلا يحطوه فيه. فـ فكك من كل الأنعرة الكدابة دي، كل ده لحظي وفرحته لحظية.. اللي بيدوم لكما في حياتكما الود والاحترام والرحمة والتآلف وتكاتفكما علشان تعدوا المطبات اللي هتقابلكم..

صدقني يا حبيبي طول ما انت شايف ان الزواج محتاج مليون ونص مليون مش هتتجوز والله .. وهتفضل عايز في الفزاعة غير الحقيقة دي، كل ده وهم يا غالي، انت اخويا وابني وانا خايف عليك من الوهم ده، الزواج مش محتاج غير امكانياتك البسيطة دي ووعيك الكافي وبيت محترم تاخد منه بنت الناس المحترمة.
اعتمدوا مبدأ طــ..ــظ في رأي الناس، وهاتوا المهم بس، ولا تخضعا أبدا لإغراءات العروض وخلق الاحتياجات اللي بتدبسكم في شراء ما ليس له قيمة  وليس له استخدام غير انه ينفض جيوبكم، اعتمدوا على تصديقكم لموعود الله عز وجل الذي جاء على لسان نبيه ﷺ اتقوا الله في تعاملكم مع بعض، الخطوبة مفيهاش تلامس ولا حب ولا غرام ولا اي من كل ذلك " هسيب لكم رابط بوست عن الخطوبة وعن العقد في التعليقات "
استعينوا بالله على العفاف.. ربنا هيخلص لكم كل حاجة، وهتبص تلاقي ربنا فتح لك ابواب الرزق والكرم، والام ساعدت والاب ساعد وصاحبك يساعدك في الزفاف، وبتمشي والله.. بعد ما تتزوجوا لما ربنا يكرمكم ياكش تجيبوا قصر وتفرشوه على أفضل ما يكون .. الله يوسع عليكم ويبارك زيجتكم ويملأ حياتكما حبورا ونورا ورحمة.

اللهم زوج الأيامى من شباب المسلمين يا كريم.
انشر على صفحتك بعد إذنك، فـ أنا أرجو أن يكتب الله القبول لكلامي ومنفعة الناس منه وهدم التابوهات الكذابة.