صعوبة المناهج الدراسيةالجديده.هل هي فعلا صعبة ام اننا نرفض التغيير؟

​مقدمة عن أزمة المناهج الجديدة
​بتشتكي كتير من الأمهات من صعوبة المناهج الدراسية الجديدة على مواقع التواصل الاجتماعي، وتتحول المجموعات على فيسبوك وواتساب مع بداية كل ترم لساحات مفتوحة للغضب والإحباط. وأنا كأم زي كل الأمهات دي، بنزل السوق وبدخل الجروبات وبشوف التوتر ده كله، بس المرة دي حابة أقولها بوضوح وبشكل مباشر: "كفاية صياح".  

​سر التحول من الحفظ إلى الفهم
​تعالوا نقف مع نفسنا لحظة صراحة ونفكر بعقلنا مش بمشاعرنا المتوترة؛ إحنا كنا بنذاكر إزاي زمان؟ كنا بنذاكر ونحفظ لدرجة إننا بنحفظ السؤال وإجابته النموذجية، واتبرمجنا على كده من صغرنا. ولو السؤال جه في الامتحان بأي صيغة تانية—مع إنه نفس السؤال ونفس المعلومة—الطفل ساعتها مش بيعرف يحله وبيتصدم، لأنه ببساطة "حافظ مش فاهم".

​فلسفة المناهج والمنظومة الحديثة
​المنهج الجديد والمناهج الدراسية عامة لما اتطورت، بقينا بنشوف السؤال كأنه "فزورة" صعبة الفهم والحل. والسبب في ده مش إن السؤال تعجيزي، لكن ببساطة علشان إحنا ما اتعلمناش في صغرنا نفهم ونحلل ونستنتج، وده بالضبط الأساس اللي مبني عليه تطوير التعليم الجديد.

​التخلي عن أسلوب الحفظ والتكرار
​المنظومة الجديدة بتقولك بصريح العبارة: "إحنا مش عاوزين بغبغان يحفظ ويردد". إحنا هنا بنعلم الطفل إزاي يفكر، يفهم، يحلل، ويربط المعلومات اللي بياخدها بالحياة العملية. ولو اتدربنا شوية وتعودنا على الأسلوب ده، هنلاقي الموضوع أسهل بكثير، وأمتع لينا ولأطفالنا في البيت.

​خطوات عملية للتعامل مع المذاكرة في البيت
​علشان نسهل المذاكرة في البيت ونرفع العبء عن أنفسنا وعن الأطفال، لازم نغير أسلوبنا تماماً. نركز على شرح الفكرة العامة للدرس، وتطبيقها بأمثلة من الواقع، والتوقف عن الحفظ الحرفي. كمان نتعامل مع الأسئلة والمسائل الكلامية كأنها ألعاب وتحديات ذكاء ممتعة، ونعود الطفل يحل المفهوم بأكثر من طريقة، مع فصله تماماً عن دراما السوشيال ميديا وطاقة التوتر السلبي

​كيف نجعل المذاكرة ممتعة ومجدية؟

​تنسيق الوقت والتعامل بحب وشغف مع المعلومة هو السر الحقيقي للنجاح في النظام الجديد. بدل ما نعتبر وقت المذاكرة عقاب يومي وتوتر، نقدر نحول المادة لقصة شيقة أو تجربة بسيطة بننفذها مع بعض في البيت. لما الطفل يحس إن المعلومة دي ليها فائدة في حياته اليومية وإن أمه بتمتدح تفكيره ومحاولته بدل ما تأنبه على عدم الحفظ النصي، شغفه هيزيد وهتتحول المذاكرة من عبء ثقيل لنشاط ممتع ينتظره بكل حب وثقة

​خاتمة ورسالة لكل أم:
​في النهاية، أي تغيير في بداية تطبيقه بيكون معاه نوع من اللخبطة والصعوبة، لأننا بطبيعتنا كبشر بنخاف نخرج من منطقة الراحة والتكرار اللي اتعودنا عليها سنوات طويلة. لكن لو غيرنا طريقة تفكيرنا، وغيرنا أسلوب مساعدتنا لأولادنا، هنكتشف إننا بنصلح أخطاء نظام تعليمي قديم عانينا منه كلنا، وبنأسس طفل ذكي، قادر يفكر ويفهم بجد، مش مجرد شريط تسجيل بيعيد الكلام اللي سمعه

جيل قادر وواعي  ومدرك
​الموضوع محتاج صبر وتدريب، ولو بدأنا صح، هتكون النتيجة جيل مختلف وقادر يواجه المستقبل بوعي وثقة.