حروف إسمك غنوتي / الشاعرة عايدة جابر
حروف أسمك غنوتى
مفتتح
الميم ...ماشيه فى نورك مهما شوفت ومهما كان
والصاد ...صلاتى فى كل وقت وفى القيام
والراء ... رأيتك يا حورية كان دعائى تعيشى ليا أمنة دايما وفى سلام.
القصيدة
سنين شابت وتتعكز على الأحلام
وادى الأحلام كمان حانت
أوام مالت على الأيام
وادى الأيام هتتبسم
وتتنسم نسيم أنغام
وترسملك شباب غنوة
هتتغنى عن الأنسان
ندوب فيها
ومهما اديتها ما اوفيها
دى كل الدنيا وما فيها
ما تكفيها
والومها فى ايه
حبيبتى الغالية بنت الأيه
أنا دايبة غرام فيها
وجوه عيونى اخبيها
تكحلنى
بكحل تراب أراضيها
وتهدينى عبير الورد بايديها
ولو غضبت علي فى يوم أراضيها
ولو فرحت أحب الفرحة ف عنيها
ولو حستنى أنا خايفه
فى سواد ليلك أغنيلك
تنادينى على بحرك أنا اجيلك
وانورلك قناديلك تحضنينى
وتقوليلى شدى حيلك
حسه وجعك حسه قهرك
م اللى باعك واللى خانك
واللى كان لك يوم أسيرك
يا أصيلة يا كريمة بكل خيرك
ساكنه ضيك عاشقة نيلك
نفسى أرد فى يوم جميلك
واللى أهداه ربى ليا
كله ليكى مش لغيرك
ياللى قلبى عاش أسيرك
باحتوائك كان أميرك
وارتوى من عطف نيلك
عاش فى ضلك
عاش فى خيرك
يا أميرة فى عرش قلبى
مهما أدارى والا اخبى
انت لونى وانت كونى
وانت كل الدنيا عندى
يا احتوائى وقت خوفى
يا ارتوائى من جفوفى
روحى منك وانت منى
نبض قلبك من حروفى.
