قصيدة الرصاصه لاتزال في الجيب الشاعر محمد الليثي
الرصاصه لا تزال في الجيب
٠
٠
مبسوط كدا
واقف لوحدك ف الحروب
ميت وساند ع السلاح
عيبك عيشت الحياه وحدك
ودي حرب ما ينفعش فيها عيبك
الكل بيقتل ف بعضه بدون قلوب والدم ساح
وانت الرصاصه لا تزال في جيبك
مبسوط كدا !!؟
ضيعت روحك بين الحياه والناس
وانت اللي تملك م الزمن أحداث
تسرد تاريخ الدنيا بالمللي
مثلا وقوع الطفله دي ف حبك
مثلا وقوع الدنيا دي ف جبك
لحظة ما عينك فتحت ع الناس
لحظة ما شيلت الدنيا دي ف قلبك
واشتد ازرك بالوحده والأحداث
وأبيض شعرك م قبل وقت الشيب
لسه الرصاصه لا تزال في الجيب
لحظة ما عينك فتحت ع الناس
احكي الرواية بدون زيادة شيء
ازاي تكون والرصاصه معاك
ازاي تعيش وتموت بهواها
وانت اللي قاتل كل البنات بهواك
ازاي يا قاتل دمعتك بالضحك
تيجي هي تضحك تقوم قاتلاك
قالي الرساله تحت عنوان الهوى
قلب هوى
اول ما عيني جت عليها
كانت الرصاصه لا تزال في عنيها
وكنت حر
أسعى وأحب م الناس السعيه
وأضحك كأن الضحك رزقي م الحياه
وارقص كأن الرقص من عينهم نجاه
وافرح معاهم وأبكي وحدي
واضرب حياتي كفين طناش
يعلموا ع خد عينها المتداريه
واقول تمام
زي التمام اللي خدناه ف السريه
أهو كل دا ولا فارق معايا اي شئ
ولا تفرق معايا الدنيا دية باللي فيها
كانت الرصاصه لا تزال في عنيها
وقلبي عمال ينتفض ٠٠ قالت سلام
قولت اما اقرب
يمك ف يوم يصبح ما بينا معاهدة سلام
حبة كلام
م اللي يطير قلبي مع سرب الحمام
واللي يهون عني كام شيله عفيه
قربت أكتر
وكل اما اقرب أحس شوق ٠ أحس شوق
اشتقت لعنيها وهي قدام عنيا
عيشت معاها الثانيه عمر
وكأن عمري بجد ما يسوى إلا ثانيه
خدنا الكلام بالحب وشوية خناق
خدنا الحنين واللين الي كل اتفاق
صبحت معايا الحلوه ع الحلوه وشقايا
صبحت معايا ف كل شيء يصبح معايا
لون الحياه البمبي والنور والمرايا
أصبح حقيقه ف عين مناضل زيي
اهو بيروي الحكااايه ...
عايش حياته حروب ولا بيعرف سلام
قالت سلام
كبرت وياها الحقيقه وشوفت منها حاجات كتير
ولا عدت انا بفرق معاها
ولا عاد مشاعر بينا غير سطرين ف شعر
شاريه اللي بايع واغلى مافيها كوم سلع انا بصنعه
وبرغم ذلك انا ارخص الناس كلها واقل سعر
قالت سلام ٠٠ قولت اما اقرب
يمكن تحس بأن قلبي نضيف وخام
لكن ماليه الحزن والشوق والملام
لكن ما ليه الفرح والطير واليمام
قولت اما اقرب يمكن ف يوم أصبح تمام
قالت سلام ٠٠
سلام م اللي مالهوش معنى أصلا غير سلام
وداع بكل ما تحمل معاني الكلمه من فرقه ووداع
متاع الدنيا يتحول ضياااع
ويضيع معاها الحلم على حبة سراب
خراب عشش ف قلبي الجنه واتحول خراب
وغراب بينوح يبوح بالعزف بالناي والرباب
وعذاب مطروح جروح من بعد الغياب
سواح بين فرقه وأنين سواح
مرتاح ؟! هئ! مين يجي الحياه ويعيش مرتاح
كداب من قال ان الحياه حلوه كداااب
كام باب مقفول بيئول للوحدة ولحالة اكتئاب
وحاجات بتتملك حاجات وقلبي اهو مسلم وراضي
ازاي يا قلبي ف حرب الدنيا والناس والظروف تأمن لحوا
ازاي يا عقلي ماردتوش عن خوض معارك مش سلاح
عن حب جب من ينزله يستنى سيارة العزيز
يطلع يقابل زوجته والنسوه الضعاف
انا مش جبان ف الحب ولا عيل كفيف
لكن دي جوا وكيدهن يخليك تخاف
إن تسيب القصر وتعيش ع الرصيف
انا مش هضيع عمري ع وهم الكلام
قالت سلام ؟!! ما تقول سلام ٠٠ مليون سلام
م اللي يريح عقلي م الفكر الكتير
م اللي يطمن قلبي على عمري اللي جاي
اتأكد اني تمام واني خلاص بخير
وأطيب القلب العليل وارتاح وأنام
وأرجع لوحدي ٠٠ لوحدي احلى
بدون ما افكر مين يروح او مين يغيب
وأرضى بحياتي كلها بحلوها وبمرها وهقول نصيب
واضربها كفين م الطناش ! واستحلى صوتي لما أغنى
وارقصلي، يمكن لما اموت اهو تحكوا عني
وتقولوا كان بايع حياته لكل واحد مشتري
وتقولوا طيب مفتري على نفسي اهو وراضي بعيوبي
لما اموت ٠ !! فتشوا كويس جيوبي
هتلاقوا ظرف لأمي ولزوجتي ولكل الصحاب
مكتوب عليه من غاب يغيب
لما اموت ٠!! فتشوا كويس جيوبي
لسه الرصاصه لا تزال في الجيب ٠٠
محمد الليثي
