ثقافة الوقت المناسب
الرفض بدون مقدمات
في بنت اتخطبت لمدة سنتين بالظبط كان فاضل على كتب الكتاب ١٣ يوم مش اكتر
وفجأه كدا ودون اي مقدمات قررت انها مش هتكمل وبموت اسباب واضحة
وقالت لأهلها و بمنتهى الثقة انها مش عاوزاه
كل اللي حواليها يسألوها عن السبب وهي مش راضية حتى توضح
لحد ما ف الاخر اعترفت وقالت “ مادانيش اي حاجة ف وقتها ”
“بيطمن عليا بعد ما اخف”
"بيسأل عن امتحاني الصعب اللي مرعوبة منه وحكياله عليه بعدها بإسبوع"
"هدية عيد ميلادي حتى بتيجي متأخر"
"كل حاجه كنت بشوفها منه كانت باردة وفاترة ومالهاش اي طعم."
-
نيجي لواحدة تانية متجوزة وف يوم حصل مشكلة بينها وبين جوزها وصلت المشكلة دي انهم فضلوا مخاصمين بعض اربع ايام بحالهم
هما متجوزين ف محافظة تانية بعيد عن أهلها
وف ايام خصامهم نزلت تشتري حاجات ليها من مكان جنبهم
هي كانت فاكرة انها عارفة شوارعه كويس نزلت واشترت ولفت كتير والمفروض مروحة بقى
ماعرفتش هى فين بتبص حواليها مش عارفة اي محل ولا مألوف ليها اي يافطة او عنوان تروح هنا تروح هناك مش عارفة ترجع تانى وتدخل من اي شارع تتوه اكتر
قامت واقفة ف مكان وفضلت تعيط و طلعت تليفونها واتصلت بجوزها فورا
رد عليها وقالت له " انا تايهة ومش عارفه انا فين ولا عارفه أعمل حاجة " وده كله طبعا بعياط وفزع
الاهتمام فى االوقت المناسب يفرق كتير
قعد يقول لها “ اهدى بس انا معاكي اهو ، قومي بس اسألي اي صاحب محل عندك واعرفي منه أسمه ايه عشان أعرف اجيلك ياحبيبتى ، اطمني انا معاكي ومش هسيبك ومش هقفل الخط وجايلك دلوقت حالا ”
وبعد لف كتيير وصل ليها وشافها وجري عليها وهي من الخوف ماكنتش مصدقة انه هو ، وبعد مااستوعبت قامت معيطة ومستخبية فيه ..
عدى كام سنة ع الموقف دة وهي مش نسياه
بتقول انه كل ما شيطاني يوزني انكد عليه
قلبي مايطاوعنيش و تيجي ف بالي صورة الوقت اللي كنت عاوزة فيه امان وكان هو اماني وحمايتي...'
وفى الختام
في ثقافة اسمها "ثقافة الوقت" كتير منا مش واخد باله منها
حاجة معينة عاوزينها ف الوقت دة
لو اتأخرت لحظة واحدة عن وقت احتياجنا مش هنعوزها وهنستغنى عنها حتى لو اتقدمت
كل حاجة ليها وقتها .. كل حاجة حرفيا
"الإحساس - و الكلمة - و المعايدة - و الطبطبة - و الحضن - والنظرة- الخ.."
زى ما الحاجة الساقعة لو سخنت مش بيبقى ليها طعم
وزي لما الدوا بيجى متأخر مابيبقاش ليه فايدة ولا بينفع
وزي الجدعنة اللي لو ماظهرتش ف الشدة مش بتبقى جدعنة وملهاش طعم ولا معنى
كل حاجة وتوقيتها .. ولو خرجت عن التوقيت دة بتفقد قيمتها وينطفىى رونقها
دمتم فى صحة وسعادة
